Zaborro

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Pa la pedreta chiquirrina se veiga zaborra.

Zaborros amontinaus en una marguin.

En Aragón, un zaborro ye por lo regular cualsiquier piedra suelta que no tienga un uso concreto y d'una mida tal que que faiga estorbo u que cause un mal, como por eixemplo as piedras que se desprende en un camín u en una carretera, que pueden fer que os transeúntes se trepucen u causar mal a os vehiclos, u tamién as piedras enronadas que amanece en un campo de labor y que farían mal a l'aladro si trucase contra ellas.

En agricultura, os zaborros se sacan d'as uebras pa privar que as ferramientas tomen mal en caso que trucasen contra ellos. L'acción de sacar os zaborros d'un campo se diz «espedregar». Lo normal ye que se faiga a mano, y as piedras se tiran en a marguin formando un maruenyo.

Zaborrero/a

En o lenguache coloquial, una persona «zaborrera» u un «zaborrero» ye una persona que treballa de mala traza, que para poca cuenta de lo que fa, que treballa a-escape y no ye mirau u mesmo que no en sabe. En Zaragoza s'ha documentau tamién a forma «zaburrero/a».

Con ixe mesmo significau s'emplega tamién por tot Aragón a esprisión ser u estar un «zaborras», sin flexionar-se ni en chenero ni en numero l'adchectivo. Igual como «zaborras» se comporta la palabra «zaforas» en «ser/estar un zaforas», que ye unatra que significa lo mesmo.

En l'orichen, o «zaborrero» yera l'aprendiz u o chulet de o piquero que, por no saber-ne guaire aún de l'oficio, no le deixaban fer si que de carriar os «zaborros» y atros materials pa la construcción. En Cinco Villas se documenta con o significau d' «Albañil que trabaja en zaborras».

Se veiga tamién

• Torrueco/torroco.
• Zaborra.
• Chesanco.
• Maruenyo.