Wikipedia:Biquiprochecto:Grafía/Grafía SLA/Equus africanus
| Burro salvage africano | ||||||||||||||||
 Equus africanus | ||||||||||||||||
| ||||||||||||||||
| ||||||||||||||||
| Equus africanus | ||||||||||||||||
 Esta fuella está escrita en fovano.
|
O burro salvage africano (Equus africanus) ye un mamifero salvage d'o continente africano, parellano a o pullino domestico, que anque hoi se troba recluyiu en os paises d'o norueste d'Africa (Etiopia, Somália y Eritrea) d'antes más va tener un ária de destribucion que incluyiva Sudan, Egito y Líbia.
As suyas midas alcançan mesmo os 2 metros de longitut, con d'entre 230 y 275 Kg de peso. O pelo lo tien curto y a color la tien grisa clareta, con una faixa escura que s'estira d'a nuca t'a coda (como os burros) y con rayetas negras en as patas, por debaixo d'o genullo. A subespécie núbia (Equus africanus africanus) tien, amás d'a faixa longitudinal d'a espalda, un otra que le baixa por o huembro, que anque son compartidas con bels burros, faltan de tot en la otra subespécie (E. a. somalicus).
Os burros africanos viven por un regular en ambientes deserticos u semideserticos, an que nomás que os suyos estamagos pueden fer bella honra d'os radius pastos. Os sistemas digestivos d'estos animals son duros e capaces, que mesmo quitan l'augua d'o poquet que minjan. Se conoce que pueden tamien tirar bels días sin gota d'augua, anque bien luego han de baixar a mirar-ne, lo menos cada 3 dias. A diferiéncia d'a mayoria d'equidos, os burros africanos no precisan mica companyia, y se mueven solencos (defuera d'as fembras con burrez). Cuando se troban solos, fan servir a voz suya, que ye prou grave, y asinas se comunican os unos con os otros en a distáncia, distáncia que puede alcançar hasta 3 km.
Tamien s'ha pensau que os burros africanos podesen ser os antecesors d'os burros domesticos. Se conoce que os sumérios ya en van fer uso fa sieglos pa tirar de vagons y carros. Otros autors se piensan que ixos animals devevan de ser onagros u burros ya más modernos.
O estau de conservacion actual d'a espécie ye dramaticamente perigloso p'a suya supervivéncia. As capturas masivas que se'n fevan d'antes pa domesticar-los y tamien a mescla con os burros domesticos ha aladiau a espécie, d'a que actualmente no en quedan sique bels poquez centenars. Amás, en Somália y Etiopia, an que los caçan pa usar-los en a merecina tradicional, o incremento d'armas en circulacion con as recientes guerras cevils no ha fecho sique agravar o descenso poblacional. A competicion, finalmente, con o bestiar domestico por o minjar d'o suyo duro hábitat ha fecho baixar mesmo más a demografia que teneva.
