Vikingo

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Territorios y viaches d'os vikingos.

Vikingo ye como de diz a los guerrers, piratas y saqueyadors medievals d'orichen escandinavo. En sentito muito amplo y en bels contextos s'aplica o termin vikingo a toz os norrens, (habitadors d'os países escandinavos en l'alta Edat Meya), encara que no fuesen guerrers ni saqueyadors.

Son clamatos vikingos por o vik (badía protechita, en chermanico escandinavo). Tamién recibiban a denominación d' "hombres d'o norte" en as luengas chermanicas d'os francos y os saxons, (north men, norse men, nort manni), orichinando a palabra romance "normand(o)" que dimpués se fació servir pa dicir un grupo etnico naixito en Normandía por fusión d'os vikingos y a población autoctona galorromana y franca.

En grupos mas o menos numerosos, os vikingos atacaban con os suyos barcos as costas europeas en os sieglos VIII-XI.

Os vikingos iban por os ríos de Francia, Alemanya y Rusia, conquerioron os territorios de l'antiga Rusia, habitatos por eslaus y finlandeses y sozmetioron Irlanda y Anglaterra. Tamién, a vegatas, atacaban a Mediterrania.

Pueblos vikingos

Bi heba tres grupos de vikingos:

• Daneses: Con una fuerte organización militar, feban escardas piratas rapedas, con a solo fin d'o botín. Yeran o pueblo mas numeroso. Viviban en Chutlandia y dominaban as rutas de comercio.
• Noruegos: Plegoron a Groenlandia y Islandia.
• Suecos: Facioron grans viaches por toda Europa en os sieglos VIII y XI.

Primeras incursions

Os vikingos noruegos arriboron en las Islas Shetland a principios d'o sieglo VIII, establindo-se dimpués en as Islas Orcadas y Islas Hebridas. Estos archipelagos sirvioron como escala pa atras expedicions dimpués de ser colonizatos.

En zaguerías d'o sieglo VIII los noruegos s'expansionan por as costas d'a Mar d'Irlanda ocupando a Isla de Man y establindo-se en as costas d'o sud y este d'este mar. Ye un periodo en o que os monesterios irlandeses son sistematicament saqueyatos. Desnde as Islas Shetland plegoron a las Islas Feroe arredol de l'anyo 800

Mencions d'os vikingos en fuents aragonesas y navarras

Entre os pocos textos en navarro-aragonés que parlan d'os vikingos tenemos a "Grant Cronica d'Espanya" y a "Cronica d'Espayna" de García d'Eugui a on los mencionan como almochuces fendo servir a denominación arabe d'os vikingos que tamién aplicaban os musulmans a zoroastristas y pagans en cheneral, tot en meyo d'unos parrafos con temas mitolochicos celtas como a "Batalla d'os árbols" y l'asalto a una torre en a costa:

Apres algun tiempo q(ue) el rey Pirr(us) fue muerto los naturales espanyoles q(ue) eran e(n) espanya biuie(n) en diuision co(n)los geretanos / supiero(n) se por las t(ier)ras uezinas las diuisiones q(ue) entre ellos eran. & la ora los almoiuzes qui eran d(e)las yslas frias fiziero(n) grant armada & uiniero(n) en espanya enla p(ar)tida de gallicia & arribaro(n) enla Corunya los quales uinieron fraudolosame(n)t & dissimulada por que trayero(n) todos los uaxiellos cubiertos de rama por que no fuessen uistos en(e)l espeio del far / & arribaron de nochi / & prisiero(n) la uilla. & p(r)isiero(n) el far. & crebaro(n) el espeio & de alli (con)quiriero(n) toda espanya. & tuuiero(n) la senyoria de espanya por .C.Lxxa.iij. anyos & aq(ue)llos poblaro(n) la çiudat de Tholedo & fiziero(n) hi un templo do adoraua(n) el fuego por lur dios / & fiziero(n) la cabeça de lur senyorio. & estos tractaro(n) mal toda espanya. & cruelme(n)t assi alos espanyoles naturales como alos que se dizie(n) geretanos qui eran poblados en Espanya Et poblaro(n) Cigue(n)ça la uiella la q(u)al es dicha Muruiedro. la q(u)al fue poblada de unas ge(n)tes d(e)la ysla / q(ue) fue clamada Cigue(n)ça / q(ue) es enlas yslas frias. la q(u)al dentro a breu t(iem)po q(ue) fue poblada fue en gra(n)t grandeza de poblaçion. & fue en aquel t(iem)po la mayor çiudat q(ue) fues en espanya

En atros textos como a "Cronica de los Conquiridors" los mencionan como "normandos" (d'o francico nort(h)manni, "hombres d'o norte") a l'igual que en atras luengas occidentals y sin ixe component mitolochico u lechendario.

Et ap(re)s el Emp(er)ador ensemble con su fillo el Rey karles et co(n) Roldan p(r)incep dela Caualleria et con todo el otro ex(er)citu deuasto toda la Saxonia que es entre Guisara et el Rio Albia fin ala mar occeana et subiugo los normandos qui corseauan la mar / Et por guarda et defension de aquellas p(ar)tidas constituyo nauilios en aq(ue)lla mar / et lexo alli Karles p(r)imogenito suyo Rey de G(er)mania et delos Ulcos et de Saxonia / con partida de su exercitu qui p(ro)curasse aq(ue)llas p(ar)tidas

En a "Cronica d'Espayna" de García d'Eugui tamién fan servir a denominación de "normandos" tractando-los a part d'os almochuces en campanyas bien testimoniatas:

estonçe vinjero(n) de Norma(n)dia corredores por mar & fiziero(n) gra(n)t dayno con armas & con fuego enlos puertos despues pasaro(n) alle(n)t mar en Mauritanja et destruyero(n) la Ciudat de Bacor & Mayorq(ua)s. & Minorq(ua)s et Euiça et mataro(n) muchos moros. & despues consus nabes tornaro(n) asu tierra

Jt(e)m enel .ij. ayno q(ue) regnara los norma(n)dos consu Rey Gundierno Ribaro(n) en Galicia destruyendo lo q(ue) fallaba(n) & plegaro(n) fasta Honagro & mataro(n) a don Sisimu(n)do q(ue) era ob(is)po de Santiago & al IIIº ayno qu(an)do qujsiero(n) tornar asu tierra con gana(n)çia Goncalbo Sanchez firio enlos p(r)ime(r)os enel no(m)bre de Santiago & vincio los & mato al rey & atoda su conpayna & q(ue)mo todas sus nabes

Esta denominación de "normando" no se fa servir guaire en historiografía actual pa referir-se a los vikingos porque s'aplica a los normandos baixo-medievals, o pueblo de luenga romanz orichinario de Normandía que intervinió en a historia d'o sud d'Italia y en as cruzatas. Por atra part orichinariament o termin nort(h)manni se referiba a los habitants d'o norte d'Europa u escandinavos independendientment de si se dedicaban a la piratería u no.

Naus vikingas

Drakkar en un museu d'Oslo.

As naus vikingas son conoixitas como drakkars. L'arqueolochía documenta como antes de tiempos d'os vikingos os norrens desembolicoron a suya tecnolochía de navegación. Tácito ya parlaba d'os barcos maniables sin vela d'os svear. As estelas funerarias d'a isla de Götland amuestran a evolución d'as naus dende o sieglo VII a lo XI, encara millor conoixitos por as excavacions d'as tumbas de barco de Vendel y Valsgärde. En os sieglos VII y VIII se produció un progreso tecnico important que permitiría as celebres incursions d'os vikingos: milloró a carena, construyoron cascos cubiertos, introducioron l'uso d'a vela.

Son un exponent d'as naus vikingas os drakkars d'as tumbas reyals d'Oseberg (850) y Gokstad (900), y tamién as naus funditas voluntariament en Rolskilde (Dinamarca).

Bibliografía

• (es) Bo Bramsen, Christopher; Erkoreka, Anton. Los vikingos en la Península Ibérica. Fundación Reina Isabel de Dinamarca, 2004. ISBN 978-87-7667-000-9.
• (no) L'Orsa, Vigdis. Blodige oppgjør: vikingene på den iberiske halvøy. Kolofon, 2009. ISBN 978-82-300-0585-9.
• (en) Hollander, Lee Milton. The Saga of the Jómsvíkings. University of Texas Press, 1955. ISBN 978-0-292-77623-4.
• (en) Sturluson, Snorri; Hollander, Lee Milton. Heimskringla: History of the Kings of Norway. University of Texas Press, 1991. ISBN 978-0-292-73061-8.

Vinclos externos

• Se veigan as imáchens de Commons sobre Vikingo.

• Datos: Q12567
• Multimedia: Vikings / Q12567