Tartaros

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Tartaros
татарлар

Tartaros

Población total

7.000.000

Rechions con comunidaz importants

Rusia	5.554.601
Uzbekistán	467.829
Cazaquistán	204.229
Ucraína	73.304
Kirguizistán	31.500
Tachiquistán	19.000

Idiomas

Tartaro

Relichión

Islam

Mapa

Arias habitatas por comunidaz tartaras

Tartaro^[1] (en tartaro татарлар) ye o nombre común que se da a bels pueblos de luenga turquica de Siberia y Europa Oriental.

Etimolochía y significato

O nombre tien un caracter ambigo, no s'aplica a toz os pueblos de luenga turquica, pero bels pueblos de luenga turquica que huei no son ditos tartaros lo yeran dica fa poco. Por atra parte con o termin tartaro s'ha dito tamién a los pueblos mongols en cheneral y en l'Imperio Ruso a os musulmans en cheneral.

Pareix que lo nombre derive en parte de Ta-ta u Dada, un pueblo mongol que habitaba lo norueste de l'actual Mongolia en o sieglo V. S'emplegó por primera vegata pa describir a los pueblos que dominoron parz d'Asia y Europa dende Chenguis Khan. Dimpués lo termin s'estendilló pa incluir a cualsiquier invasor nomada d'orichen asiatico, tanto de Mongolia como d'Asia Occidental.

En aragonés lis dicen tartaros en o Libro de Marco Polo, y en a versión A d'as Cronicas d'os Chudeces de Teruel:

Anno Mº CC LXXXXVIII. Don Simón de Corvon. Prisieron los tartres a Jherusalem

pero los dicen tartaros en as atras versions d'as Cronicas d'os Chudeces de Teruel u Efemerides turolenses, lo cual mos fa pensar que existió una alternancia tartaro/tartro como sepulcre/sepulcro u cuatre/cuatro, u talment que a espardidura d'a traducción d'o Libro de Marco Polo cheneralizó a conoixencia d'a forma tartaro, que por atra part yera usual en catalán medieval, luenga que podió estar transmisora d'este etnonimo oriental, igual que a denominación "vin grec" ("vin griego"), referindo-se a la "malvasía".

Antes d'a decada de 1920 os rusos feban servir a palabra Tatar pa dicir lumerosos pueblos, dende os azerins dica a bellas tribus de Siberia. Dimpués o termin s'ha restrinchito a bels grupos etnicos como por eixemplo os tartaros de Kazán y Siberia que charran una luenga turquica d'o grupo quipchac (como os cazacos, kirguizes y nogais), os tartaros de Crimea, que en charran una d'a mesma branca que o turco d'Anatolia, y os tartaros de Lituania, Polonia y Belarrusia aislatos de tot respecto a los atros.

Os diferents pueblos tartaros, dimpués d'estar chusmesos a los rusos, han desembolicato tendencias nacionalistas como o panturquismo, manimenos os tartaros de Crimea gosan considerar-se a parte d'os atros pueblos tartaros grans, unificatos por a gran diaspora d'os tartaros de Kazán en Siberia.

Lista de comunidaz tartaras

Tartaros de Siberia
Tartaros de Astrakhán
Tartaros d'a Volga-Ural
- Tartaros de Kazán
- Tartaros de Casim u Riazán
- Mixars
- Diaspora tartara en tot o mundo, en especial Asia.
Tartaros de Crimea
- Tartaros de Crimea refuchiatos en Rumania, Bulgaria y Turquía.
Tartaros de l'antiga Unión Polaco-Lituana

Os tartaros de Crimea u atras d'atras zonas refuchiatos en a Turquía moderna recibiban o nombre de Muchatchirs (como atras minorias musulmanas d'orichen europeu refuchiatas tals como os bosnios u os pomacos), y s'han ito asimilando a los turcos d'Anatolia.