Ocho apellidos vascos

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Ocho apellidos vascos
Títol Ocho apellidos vascos
Póster d'a cinta.
Póster d'a cinta.
Ficha tecnica
Dirección Emilio Martínez-Lázaro
Producción Álvaro Augustin
Ghislain Barrois
Gonzalo Salazar-Simpson
Guión orichinal Borja Cobeaga
Diego San José
Musica Fernando Velázquez
Fotografía Gonzalo Fernández Berridi
Actors Clara Lago
Dani Rovira
Carmen Machi
Karra Elejalde
Datos y cifras
País(es) Espanya
Anyo 2014
Debantadera 14 de marzo de 2014
Chenero(s) Cine de comedia
Cine de romance
Clasificación
Idioma(s) Castellano
Basco
Companyías
Productora(s) Lazonafilms
Kowalski Antonio Films
Telecinco Cinema
Distribución Universal Studios
Cirko Film
Presupuesto 3 millons d'euros
Recauto 78,8 millons d'euros
Succesión de cintas
Succedita por Ocho apellidos catalanes
Ficha en IMDb
Ficha en FilmAffinity

Ocho apellidos vascos (títol orichinal en castellano, en aragonés Ueito apellius bascos, enguerada en Aragón con o títol orichinal en castellano) ye una cinta de comedia romantica de cine espanyol de l'anyo 2014 dirichida por Emilio Martínez-Lázaro seguntes un guión orichinal de Borja Cobeaga y Diego San José, con una Banda Sonora Orichinal de Fernando Velázquez y una dirección de fotografía de Gonzalo Fernández Berridi. Producida por Álvaro Augustin, Ghislain Barrois y Gonzalo Salazar-Simpson ta las productoras Lazonafilms, Kowalski Antonio Films y Telecinco Cinema, en l'elenco d'a cinta amanixe, entre d'atros, actors como Clara Lago, Dani Rovira, Carmen Machi u Karra Elejalde.

O títol d'a cinta fa referencia a una scena d'a cinta a on Rafael Quirós "Antxon" diz tener ueito apellius d'orichen basco y quan li preguntan que quals en son, improvisa en inventando-se-los rechirando ta trobar personas que conoixca d'orichen basco: Gabilondo (por Iñaki Gabilondo), Urdangarin (por Iñaki Urdangarin), Zubizarreta (por Andoni Zubizarreta) y Argiñano (por Karlos Argiñano), por vía paterna; y Igartiburu (por Ane Igartiburu), Erentxun (por Mikel Erentxun), Otegi (por Arnaldo Otegi) y Clemente (por Javier Clemente), por vía materna, pero sin parar cuenta que l'apelliu Clemente no ye d'orichen basca.

Argumento[editar | modificar o codigo]

Amaia Zugasti ye una choven taxista basca que vive en Argoitia (un lugar ficticio) y ye amán de casar-se con Antxon. Tanimientres, Antxon creva lo compromiso y l'albandona. Las amigas d'Amaia li heban preparau una despedida de soltera en Sevilla y la fuerzan a fer lo viache. Dentran en un bar a on treballa Rafa Quirós, sevillán, socio d'o Real Betis Balompié y costalero d'una d'as confrarías d'a Semana Santa sevillana. Lo treballo de Rafa consiste en fer no nomás de cambrero, so que tamién d'humorista en o scenario y empecipia a contar chistes sobre bascos, y ixo fa que Amaia s'enaltere y Rafa la fa fuera d'o local. Pero una vegada fuera amanixe una atracción entre ells, que remata con Amaia dormindo en casa de Rafa.

De maitín, Amaia torna enta lo País Basco, pero s'ha dixau ixuplidau lo suyo telefón móbil en casa de Rafa y Rafa, d'atra man, s'ha enamorau d'Amaia. Rafa truca enta lo numero de l'aita (pai) d'Amaia sin saber que pai y filla portan anyos sin veyer-se. Encara que los suyos amigos preban de disuadir-lo porque Rafa mai no ha pasau de Despeñaperros enta lo norte, Rafa marcha enta Argoitia con l'enchaquia de tornar-li a Amaia lo suyo telefón, pero muit preocupau en estar ell andaluz y saber que en o País Basco no lis cuacan os andaluces. Quan se troba ya amán d'o suyo destín conoix a Merche, una simpatica muller que li diz que ye extremenya. En plegar en casa d'Amaia, la quimica no funciona entre ells y Amaia lo fa fuera. Desanimau, Rafa marcha por a carrera pero por un malentendiu se troba en a garchola, a on se fa pasar por un independentista basco miembro d'ETA en tener medrana d'os suyos companyers de celda. fa que truquen por telefón a Amaia, pero Amaia diz que no el conoix.

alavez plega en Argoitia Koldo, lo pai d'Amaia, como respuesta a la trucada de telefón que creye que li ha feito la suya filla. Quan charra con Amaia, creye que la voda entre Amaia y Antxon marcha bien y diz que quiere conoixer a Antxon antis d'a ceremonia. Amaia piensa que nomás que Rafa la puet aduyar y en zagueras marcha enta la garchola ta sacar-lo y li proposa de fer-se pasar por Antxon, nomás que ta cenar con Koldo una nueit. En primeras, Rafa no accepta, pero finalment diz que sí, y Amaia transforma a Rafa ta que no sía tan evident que se tracta d'un andaluz. En plegar ta la cena s'escayece la scena a on Koldo pregunta a "Antxon" por os suyos apellius y que, como s'ha dito, da lo suyo nombre a la cinta. Quan rematan la cena, Koldo quiere levar a "Antxon" a la suya casa y casualment Rafa troba la casa a on i vive Merche. Tot remata con Merche fendo-se pasar por "Ane" (Igartiburu, fan bromas con que se clama Ane Igartiburu), la mai de "Koldo". Ta sorpresa d'Amaia, que no comprende muito, "Ane" y Koldo, que sienten atracción mutua, queden ta fer un paseyo en o barco de Koldo a lo día siguient, i ixo que Koldo no sabe que "Ane" ye en realidat Merche, y quala ye la suya historia personal... Mica en mica s'embolica la cosa dica que plega lo día en que Amaia ha de casar-se con "Antxon", y ye que Amaia ha escomencipiau a enamorar-se de Rafa...

Elenco[1][editar | modificar o codigo]

Actor Papel Notas
Clara Lago Amaia Zugasti
Dani Rovira Rafa Quirós
Carmen Machi Merche
Karra Elejalde Koldo Zugasti
Alberto López Joaquín
Alfonso Sánchez Curro
Aitor Mazo Mosén Inaxio
Abel Mora Pedro
Aitziber Garmendia Iratxe
Miriam Cabeza Edurne
Iñaki Beraetxe Ertzaintza
Egoitz Lasa Ertzaintza
Lander Otaola Kale borroka
Mikel Roman Kale borroka
Santi Ugalde Conductor de l'autobús
Telmo Esnal Cambrero
Itziar Atienza Vendedora
Antonio Romero Ell mesmo (Los del Río)
Rafael Ruiz Ell mesmo (Los del Río)
Pedro Piqueras Presentador de l'informativo No acreditau

Rodache[editar | modificar o codigo]

O rodache d'a cinta s'escayece en a ficticia localidat d'Argoitia, que en realidat se tracta de Zarautz, Getaria y Zumaia en Guipuzcua, y Leitza en Navarra (ta la casa d'Amaia), que son os puestos a on realment se filmoron as scenas. Tamién se filmoron en Sevilla as scenas exteriors d'a ciudat, pero lo bar a on treballa Rafa, Los Muelles, se troba realment en Arrasate.

Premios[editar | modificar o codigo]

Premio Calendata Edición Categoría Premiau Notas
Premios Goya[2] 2015 29ena edición Goya a la Millor Actriz Segundaria Carmen Machi
2015 29ena edición Goya a lo Millor Actor Segundario Karra Elejalde
2015 29ena edición Goya a lo Millor Actor Revelación Dani Rovira
2015 29ena edición Nominada a lo Goya a la Millor Canción Orichinal No te marches jamás, de Fernando Velázquez, por Leire Martínez y David DeMaría
2015 29ena edición Nominada a lo Goya a la Millor Fotografía Kalo Berridi
Medallas CEC 2015 Medalla CEC a lo Millor Actor Segundario Karra Elejalde
2015 Medalla CEC a lo Millor Actor Revelación Dani Rovira
2015 Nominada a la Medalla CEC a la Millor Actriz Segundaria Carmen Machi
2015 Nominaus a la Medalla CEC a lo Millor Guión Orichinal Borja Cobeaga, Diego San José
2015 Nominaus a la Medalla CEC a la Millor Fotografía Kalo Berridi
Premios Fotogramas de Plata 2015 65ena edición Fotogramas de Plata d'o Publico a la Millor Cinta Espanyola Ocho apellidos vascos
2015 65ena edición Nominau a lo Fotogramas de Plata a lo Millor Actor Dani Rovira
Premios Sant Jordi de Cinematografía[3] 2015 59ena edición Rosa de Sant Jordi a la Millor Cinta Espanyola Ocho apellidos vascos
Premios Feroz[4] 2015 2a edición Nominada a lo Feroz a la Millor Comedia Ocho apellidos vascos
2015 2a edición Nominau a lo Feroz a lo Millor Actor Segundario Karra Elejalde
2015 2a edición Nominada a lo Feroz a la Millor Actriz Segundaria Carmen Machi
2015 2a edición Nominada a lo Feroz a lo Millor Tráiler Ocho apellidos vascos

Critica[editar | modificar o codigo]

Dende que s'engueró la cinta nomás que en o suyo primer cabo de semana la veyoron mas de 400.000 espectadors, con un recaudo de 2,72 millons d'euros en taquilla, estando asinas entre os quinze millors engueros d'a historia d'o cine espanyol y a meyaus d'abril, nomás que un mes dende lo suyo enguero, esdevenió a cinta mas vista d'o cine espanyol con mas de 6,5 millons d'espectadors, y la segunda con mas recaudo en Espanya, con mas de 38 millons d'euros. Como conseqüencia d'iste notable exito se rodó posteriorment una continación d'a historia, ambientada ista vegada en Catalunya, con o títol de Ocho apellidos catalanes y en chinero de 2023 s'anunció una nueva entrega inspirada en a serie orichinal, Ocho apellidos marroquíes, ambientada en Marruecos.[5]

Tanimientres, en a critica especializada no se trobó tanta unanimidat, en haber criticas positivas pero tamién criricas negativas. Asinas, Carlos Marañón en Cinemanía deciba que "tien muitisma gracia". Federico Marín Bellón en Abc la calificaba de "cinta valient y oportuna" y Borja Hermoso en El País mesmo pensaba que podía estar la millor cinta de l'anyo.[6].

Mikel Zorrilla, en Espinof, comenta que:[7]

En definitiva, "Ocho apellidos vascos" no ye pas una gran comedia, pero sí una con a suficient capacidad como ta fer-nos pasar un buen ratet en función d'o que podamos gaudir con o suyo chuego de topicos costumbristas

En a web Cine y cine comentan que:[8]

...pocas vegadas s'ha parodiau la suponida animadversión entre la cultura basca y l'andaluza de una manera tan festiva y directa (...) (cinta) sustentada por uns dialogos esplendidos fruito d'un guión pleno d'efectivos chistes (...)

Se veiga tamién[editar | modificar o codigo]

Referencias[editar | modificar o codigo]

Vinclos externos[editar | modificar o codigo]