Punta de Treserols

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Punta de Treserols Mont Perdito - Mont Perdu
Anvista d'a punta de Treserols
Situación
Situación	Muga entre Fanlo y Bielsa (Uesca)
Latitut	42° 40′ N
Lonchitut	0° 05′ E
Vértiz cheodesico	14660
Cheografía
Cordelera	Sierras interiors pirenencas
Sierra
Macizo	As Tres Serols
Altaria	3.355 m
Alpinismo
Primera puyada
Ruta mas fácil	Dende o Cubillar de Góriz
Mapa

Esta pachina ye escrita en belsetán.

La punta de Treserols^[1] (ocasionalment Mont Perdito, oficialment Punta de Treserols / Monte Perdido, en francés Mont Perdu) ye una punta d'es Pireneus centrals adintro d'a provincia de Uesca, en a comarca de Sobrarbe. La suya altaria maxima sobre lo nivel d'el mar ye de 3.355 m y ye la punta mes altera d'el macizo de las Tres Serols, lo macizo calsinoso mes voluminoso d'Europa. La punta de Treserols ye la tercera punta mes altera de tot el Pireneu, no rebasando-la que l'Aneto (3404)y la punta de Lardana (3375 m) y igualata en altaria a la punta d'Astorg. En a suya cima bi ha un vértiz cheodesico.

Toponimia

L'adchetivo «perdito» d'el suyo nombre le'l metió lo pireneísta francés Louis Ramond de Carbonnières, lo primer a puyar-ie alto, per no poder-se veyer esta punta dende la vesant francesa per a on que él inició l'ascenso, en es prencipios d'el sieglo XIX (1802).

No existiba un termino patrimonial ta designar lo pico concreto de la punta de Treserols en garra variedat de l'aragonés, que se'l deciba como parte de las Tres Serols, estando la denominación «Monte Perdito» una adopción d'es naturals de la valle de Bielsa a partir de la expresión orichinal de De Carbonnières y es suyos companyers, que el baltizoren como «Mont Perdu», en francés. Ta comprender esto cal pensar de como feban de poco interesants ta la vida d'antes las puntas, es picos y las alturas, a on que tradicionalment no se i puyaba se no ye que fués preciso ta bel menester, y que gosaban tener nombre solo en es casos que fuesen puntas isolatas que marcasen bel·la fita cheografica que ise bien a denominar. En el caso d'el macizo de las Tres Serols, que se troba muto mes t'alto que no garra nuclio poblato, en o cul de Pineta, y que per l'altaria que tiene ye petroso y no tiene tampoco garra estiva que le faiga intrés ganader, el nombre popular que ostentaba no feba referencia sique a la montanya (macizo) entera de la que fa parte, que ye las Tres Serols. Ixo ye, que no se feba garra diferenciación d'entre es tres picos que composan el macizo.

Ciento diez anyos dimpués que De Carbonnières i puyás, en l'anyo 1912, lo macizo de las Tres Serols el nombroren en chunto con a valle d'Ordesa (que i tiene la cul pe'l costato de ponient) lo segundo parque nacional d'Espanya, baixo el nombre de «Parque Nacional d'Ordesa y d'as Tres Serols».

En a valle de Bielsa ye conoixito localment como punta de las Tres Herodes^[2].

Cualques imáchens

La punta de Treserols (ezquierda) y lo Celindro de Marmorés (dreta), vistos dende la baixant norte.
El glaciar d'as Tres Serols en 1892.
Marmorés (dreta) y la punta de Treserols (ezquierda).
La punta de Treserols en detalle.
Punta de Treserols (ezquierda) y Celindro de Marmorés (dreta).
Las Tres Serols dende Soaso (Ordesa): Celindro de Marmorés (ezquierda), punta de Treserols (centro) y punta d'Anyisclo (dreta)
Las Tres Serols (ezquierda) y las Tres Marías (cabo de la sierra d'as Zucas, dreta), anvista dende la valle de Puértolas.