Marbre

Roca de marbre

Pieza de marbre

O marbre, márbol u mármol ye una roca metamorfica compuesta mayoritariament por calcita y formata a partir d'as calsineras y dolomías por recristalización en o metamorfismo de contacto u en o metamorfismo rechional. Presenta una textura granoblastica.

Etimolochía y semantica

O concepto de marbre en cheolochía en cheneral y en petrolochía en particular no ye o mesmo que o concepto d'os canters, os que lo comercializan y os que la fan servir en as aplicacions concretas. Por un regular fuera d'os ambients scientificos u academicos se considera "marbre" a tota roca calcica que se pueda pulir, incluindo as rocas sedimentarias como as calsineras y dolomías.

A parola "marbre" u "márbol" provién d'o latín MARMOR, MARMORIS, y este d'o griego antigo marmaron, relacionato con o verbo marmairo ("brillar"). A evolución de marmor en aragonés ye paralela a ARBOR, ARBORIS y, a traviés de l'acusativo MARMOREM daría mármor, prou pareixita a márbol, bien documentata. En os textos alchamiatos d'Urreya de Xalón mos trobamos marbol.

A forma marbre se troba sobre tot en as traduccions d'a escuela de Chuan Ferrández d'Heredia, on bi heba escribans y copistas catalanoparlants u con conoixencias més grans de catalán que d'aragonés (Nicolau de Drenopoli), y a vegatas escribiban borradors en catalán pa dimpués fer una traducción a l'aragonés dende o griego bizantín u o francés.

En o "Libro d'el Trasoro" s'escribe marbre:

E el me(n)ton es asaz mas polido q(ue) no es marbre nj(n)gu(n)a leyt(e) da color a su cuello & cristal Resplandeçe en su garga(n)t

En o "Libro d'as Marabillas d'o Mundo", de traductor desconoixito, mos trobamos tanto marbre como marbol.

Et por que auia mucha leche en sus tetas & q(ue) li fazia(n) mal eilla ende ocho ailli sobre las piedras de marbor Royo Assi que encora y son las seynnales blancas sobre las piedras.

Et es la plaça b(ie)n pauada por todo de marbre blanco.

En textos comercials d'o sieglo XV de Zaragoza escritos en un luengache mixto catalán-aragonés se troba a forma mambre de Girona

En o diccionarios y textos dialectals actuals se documenta mármol por eixemplo en benasqués.

Aplicacions

O marbre ye a roca ornamental más emplegata a lo largo d'a historia. Agora, s'emplega ta fer piezas de pavimentos y revestimentos, muebles, ecetra. O suyo uso como material d'escultura privilechiato en a epoca clasica han feito d'o marbre un signo d'elegancia. Bi ha unas quantas localidatz de Grecia y Italia famosas por as suyas pedreras de marbre: Naxos, Paros, Laurion, Hymettos, Pentelicon y Carrara.

O marbre millor considerato ye lo de Carrara, por a suya pureza, por a poca porosidat y por estar translucido en losas u recholas de 2–3 cm de grosor. Miguel Ánchel, o gran escultor d'o renaiximiento italián, vesitaba as pedreras de Carrara ta trigar presonalment os marbres ta las suyas esculturas. As esculturas de marbre de Carrara son resistents a las chelatas por a suya poca porosidat (quasi no lis entra l'augua y no se i forma chelo), pero son muito sensibles a la plevia acida.

Se veiga tamién

• Alibastro.

Bibliografía

• (es) Walter Maresh, Olaf Mendenbach: Las Rocas Guías de Naturaleza Blume. 1990.

Vinclos externos

• Se veigan as imáchens de Commons sobre o marbre.
• (es) Información, muestras de marbres y molars.