Los Puertos de Moriella

Puertos de Moriella Els Ports
Comarca d'o País Valenciano
Envista dende lo Castiello de Moriella.
Capital  •Municipios	Moriella 14
Entidat  •País  •Provincia	Comarca  País Valenciano Castellón
Superficie  •Total	997,70 km²
Población  •Total  •Densidat	(2005) 7.721 hab. 7,70 hab./km²
Mapa de situación en País Valenciano

Los Puertos de Moriella (en valenciano Els Ports) son una comarca valenciana d'o norte y montanyosa, con capital en Moriella. Muga a lo norte y a l'ueste con Aragón y Catalunya (con lo tozal dels Tres Reis, adintro d'os puertos de Bezeit), a l'este con lo Baixo Mayestrato y a lo sud muga con l'Alto Mayestrato.

Ye una comarca catalanoparlant, a on que se charra o subdialecto tortosín, de transición entre o valenciano y o leridán, fueras de lo municipio d'Olocau del Rey, de fabla castellana, porque dependeba de l'arcebispato de Zaragoza y no de lo bispato de Tortosa como la resta de la comarca.

Lo clima ye muito continental y los suelos sobre las calsineras, pobres y erosionaus. Esto fa que l'agricultura mediterrania siga muito limitada y siga mas important la ganadería, en especial vacumen. En las zagueras decadas de lo sieglo XX s'ha desembolicau la recolección u cautivo de trufas por imitación de los catalans que veniban ta los Puertos pa escar-ne.

Historicament ha teniu influencia aragonesa y los ligallos como los de l'altiplano de Teruel y lo Baixo Aragón encara se manteneban en lo sieglo XX. Existe un dance, como d'antes en muitos lugars d'Aragón, y una tendencia a emigrar tanto ta la costa mediterrania como ta lo Matarranya u ta la cuenca baixa de lo río Guadalop, a on que son conoixius como Els de la Serra, Pastors, Los de la Sierra. Muita chent d'Alcanyiz, Calanda, Mas de las Matas u Val de Robres ye filla u nieta de chent que emigró en masa de lugars d'esta comarca y han feito fortuna.

Historia

La zona estió poco poblada en l'alta Edat Meya, pero teneba importancia estratechica pa los musulmans, que yeran bien establius en las tierras planas de Levant y de la val d'Ebro. Los Puertos de Moriella yeran importants pa la comunicación entre los moros de Zaragoza y Valencia, y por ixo Alifonso I lo Batallero la prenió en 1117, con l'aduya de Gastón IV de Biarn. La capital d'Ebro yera aislada de Valencia, lo suyo prencipal refirme, con la rota de Los Puertos u Al Burt bloqueyada, y preparada pa estar presa l'anyo vinient.

Quan Remón Berenguer IV prenió Tortosa, Leida y Fraga, la zona se plenó de poblacions musulmanas forachitadas u fuyidas, fendo dificil la ocupación y repoblación de lo Matarranya. Blasco d'Alagón conquirió la zona y lo castiello de Moriella. Chaime I, veyendo lo valor estratechico d'esta plaza, pensó que heba de perteneixer a lo rei y forzó a Blasco d'Alagón a da-le-ne, con la compensación o condau de Sastago.

Parte de los repobladors de la zona estioron aragoneses de la Chacetania, y por ixo ye común l'apelliu Tena, y en Lo Forcallo la diftongación en -ia- d'a y ubierta catalana y l'apichau d'a G.

Bi heba presencia templera, y dimpués de la disolución de los templers se creyó con los restos de l'antiga orden de Montesa. Lo terreno gobernau por los d'esta orden se clamó Maestrat, (Mayestrato), y d'astí lo nombre de lo nort de Castellón.

En lo sieglo XIX estió un important foco carlista. Cabrera prenió Moriella y fizo fuyir a l'exercito isabelino prou superior que quereba recuperar-la, por lo qualo lo tigre de lo Mayestrato se fizo famoso en Europa y se'n charró muito en los periodicos de la epoca.