Alifonso I d'Aragón

[[{{{4|Wikipedia:Articlos destacaus|...]]

Alifonso I d'Aragón
Rei d'Aragón y Navarra

Rei d'Aragón
28 de setiembre de 1104 - 7 de setiembre de 1134
Predecesor	Pero I
Succesor	Remiro II
Rei de Navarra
Predecesor	Pero I
Succesor	García Remíriz

Atros títols
Rey de Leyón, Castiella y Galicia (Chunto a Urraca I dica 1114)
Naixencia	c. 1073
Muerte	8 de setiembre de 1134 Polinyino (Uesca, Aragón)
Enterreco	Sant Pero lo Viello
Conchuche/s	Urraca de Castiella
Casa reyal	Casa d'Aragón
Dinastía	Ximena
Pai	Sancho Remíriz
Mai	Felicia de Roucy
Sinyal	Signum Regis de Alifonso I

Alifonso I d'Aragón dito lo Batallero (1073 u 1074 - † Polinyino, 7 de setiembre de 1134) estió o rei d'Aragón y de Navarra entre 1104 y 1134.

Se feba decir «Emperador de Espanya» , «Rei y Emperador de Castiella, Toledo, Aragón, Pamplona, Sobrarbe y Ribagorza». Emperador, emparau en la teoria politica que li atorga l'imperio a qui domine tres u mes reinos. Os cronistas musulmans li deciban Ibn Rudmir («fillo de Remiro») per una error, pos en realidat yera lo fillo naixiu de lo segundo matrimonio de Sancho Remíriz (o rei d'Aragón y Pamplona d'entre 1063 y 1094) y de Felicia de Roucy. Ixo ye, que en realidat yera lo nieto de Remiro I d'Aragón y no pas lo fillo.

Estió lo chirmán chicot d'o rei anterior, Pero I, per a man de su pai, anque fuesen fillos de diferents mais. As muertes casuals y prematuras d'o chirmán Pero, y d'os fillos d'iste (lo prencipe Pero, muerto en 1104, y la infanta Ainés, muerta en 1103), y una miqueta d'antes que Pero, l'infant Ferrando tamién (primer fillo de Sancho y Felicia de Roucy) lo facioron estar o primer en a linia de succesión, cosa que no heba estau dica ixe inte.

O caracter personal suyo, que diz que yera tan furo y capezudo (alimentaus talment tamién per o mito), y la formación que heba puesto tener como infant no hereu (ta estar militar l'educoron) debuixan a fegura que la historia mos ha quiesto mostrar, d'un rei encapuzau con las guerras y las conquiestas, extremadament relichioso, que no s'estaba de pretensions anque pareixesen masiau grans ta lo modesto reino que heba heredau. Personache controvertiu ta los historiadors, beluns l'han tractau como un heroi, encara que ta altros no yera si que un pretencioso, que destacaba per las victorias militars que obtenió contra los musulmans de la marca septentrional, resaltando-se-ne lo seche y conquiesta d'a que dimpués habría d'estar a capital d'o suyo reino, la ciudat de Saraqusta (enguán, Zaragoza).

As voces de las suyas victorias trescruzoron as mugas d'Aragón. En la Cronica de Sant Chuan d'a Penya (sieglo XIV) se i lei:

«clamabanlo Don Alfonso Batallador porque en Espanya non ovo tan buen cavallero que veynte y nueve batallas venció».

Prenió parte en a conquiesta d'a ciudat de Uesca, que esdevenió dempués d'a batalla d'Alcoraz (l'anyo 1096), en chunto con o chirmán suyo, cuan iste encara reinaba. Con Ruy Díaz, o Cit Campeyador, i colaboró en contra d'os almurabiz, indo-se-ne enta lo reino de Valencia con una expedición ta aduyar a lo famoso caballero castellano y prenendo parte en as maniobras que permetioron consolidar-ie lo primer (anque efimero) dominio cristiano d'ixas tierras.

Infancia y choventut

Perque no heba naixiu lo fillo hereu d'o rei Sancho, los primers anyos d'a suya vida los pasó en o monesterio de Ciresa (val d'Echo, Pireneu de Uesca) formando-se en «letras» y artes militars, ta no servir si que de sinyor baixo gubierno de lo suyo chirmán gran Don Pero cuan iste reinase. Lo suyo mentor diz que estió Lope Garcés, a qui mes luego en plegar Alifonso enta lo trono entregó la sinyoría de Pedrola en agradeixemiento.

As primeras mencions d'a suya actividat como gubernant diz que son de diferents localidaz en la Chacetania y las Cinco Villas, que ta par d'alavez, yeran en l'extremo meridional d'o Viello Aragón, villas que estioron Biel, Luna, Ardenés (amán d'Embún) y Bailo. En ixes tiempos sinyaba los documentos como «Alifonso Sánchiz», fillo de Sancho.

Coronamiento y innovacions de lo reinau

Dimpués que lo rei Sancho Remíriz, pai de Pero, Ferrando, Alifonso y Remiro, morise d'un sayetazo en o seche de Uesca, lo 4 de chunio de l'anyo 1094, lo trono recayó en o suyo fillo mayor, que habría d'estar Pero I d'Aragón y Navarra dillá d'ixa calendata. O reinau de Pero I estió curto (només duró que 10 anyos) y en estió carateristica la continidat con a politica d'os suyo predecesors: lo seche de Uesca, que s'heba visto periglar en morir-ie lo rei Sancho, se replantificó dica que la ciudat se conquerió en 1096, perdida la zaguera esperanza d'os soldaus moros que la guardaban per haber-ie redotau los aragoneses l'exercito que lis veniba a auxiliar, en a dita batalla d'Alcoraz. En 1100 yera conquiesta la ciudat de Balbastro, la villa de Sarinyena y lo bastión de Boleya, que heba quedau de posesion mora adintro d'o territorio aragonés cuan a muga meridional d'o reino s'heba dentrau en a plana de Uesca con as zagueras conquiestas en vida de Sancho. Tamién se miró de conquerir per primera vegada la villa de Tamarit de Litera (1104) anque l'intento fracasó y habioron d'alzar-ne lo seche.

Toz os seches que fació Pero se facioron con a mesma tendencia que su pai; ixo ye, sin d'alianzas con altros países independients d'a Europa cristiana (u cuasi que sin garra alianza, pos lo condau d'Urchel heba estau aliau tradicional d'os monarcas aragoneses, y Chenova aduyó en o primer y fracasau intento de conquerir Tortosa, aportando-ie bellas galeras) y bien poquet a poquet, con gran esfuerzo ta lo reino, que yera chicot y montanyoso encara en ixes tiempos. Amés, en o reino d'Aragón pareix que per ixes tiempos encara no s'heba puesto posar a rodar garra equipo de maquinaria de seches competitivo (pos istas yeran caras de fer, y s'heban de manullar con inchenieros que yeran bien caros de tener), como sí que los emplegaban en los altros territorios cristianos. En todas las concaradas que tenió Pero I, Alifonso, que yera destacau per as suyas aptituz en a guerra, bi estió present y diz que ya soleba conducir personalment as tropas aragonesas en combate.

A muerte de Pero I en a val d'Arán (alavez, parte d'o condau de Ribagorza), lo 28 de setiembre de 1104, poquez meses dimpués que lo chirmán d'Alifonso y d'iste, l'infant Ferrando, y que los dos fillos d'o rei (lo prencipe Pero y la suya chirmana Agnés) deixó a Alifonso en o talle d'estar o primero en a linia de succesión, cuan nunca no l'heban preparau ta ixo, con as cuatre muertes escaicidas en menos d'una anyada.

Matrimonio (1109 - 1114)

O coronamiento d'Alifonso en 1104 suposaba tamién un problema dinastico que heba de subsanar-se como mes rapedo se podese: lo nuevo rei pasaba d'os 30 anyos y yera encara soltero. Ixa condición, que no se lis feba banal a los altros reis cristianos d'a peninsula, bien rapedo li aganó amigos entre las casas reyals con fillas casaderas. L'alavez rei de Castiella, Alifonso VI, teneba una filla vídua (donya Urraca) y sabendo como buen yera lo monarca aragonés en a guerra, pensó que talment si se casasen bi habría buen aliau contra los moros y un eventual líder ta los exercitos de Castiella.

O matrimonio entre Alifonso y Urraca se fació en a villa leyonesa de Safagún, en l'anyo 1109 (l'anyada mesma d'a muerte d'o pai d'Urraca), anque en o futuro ixe matrimonio habría de tener consecuencias desastrosas.

As motivacions d'ixe fracaso son bien diversas: per un costau, la politica nobiliaria d'Alifonso en Aragón y Navarra s'heba caraterizau dica ixe inte per premiar siempre os meritos, especialment os militars, un fenomeno posiblement esplicable perque surtiba de territorios chicoz y demograficament pobres, sin de guaire nobleza pre-existent, y alavez heba basau la concesión de títols nobiliarios ta las nuevas tierras conquiestas en a caballería y los meritos militars, fendo-se con bien poquet costumbre de quitar-se con nobles de luengo linache, como en heba muitos en Castiella. O reino castellano, con una nobleza que i yera bien consolidada, dende os prencipios estió un puesto poco comodo ta lo rei aragonés, muito mes encapuzau con as valors morals d'o rito cristiano romano (s'ha de pensar qué relichioso yera), d'entre ellas destacando-ne la fidelidat. Amés, o rei aragonés se miraba d'introducir en os suyos territorios bels focos de burguesía (artesanos, comerciants, etc) que contrarrestasen o poder d'a nobleza.

Urraca, a la contra d'ixo, diz que yera una muller tan capezuda como él, pero que per a formación que heba teniu en a cort d'Alifonso VI més s'estimaba de formar una cort de nobles conoixius y, despreciando-los, no deixar que los burgueses tenesen cosa que decir en a politica d'os reinos. Cuan o monarca aragonés decidió (unilateralment) que sería bueno que los burgueses s'establisen en diferents villas y ciudaz d'o camín de Sant Chaime en territorio de Castiella y de Leyón, alentando que se i comerciase, arrulló posiblement sin pensar-se-lo guaire lo mensache de que yera él qui disposaba qué s'heba de fer en Castiella, y no pas a suya muller. Ixo causó gran malestar en a nobleza castellana, que no veyoron mica bien que un rei foranio fese ixas cosas, y amés, ignorando la voluntat d'a suya reina que yera, a lo cabo, la reina lechitima de Castiella y de Leyón.

Fracaso d'a politica d'Alifonso en Castiella y rebelions nobiliarias y clericals

Antes de casar-se, pareix que Urraca y Alifonso heban sinyau un convenio per o cual os dos se designaban reciprocament en soberana potestas («Potestat soberana») en as posesions de l'altro. D'estar cierto ixo, alavez Alifonso no habría feito cosa que no li estase permesa como co-rechent d'os territorios d'a suya muller. Talment, a oposición nobiliaria contra d'Alifonso, que teneba lo foco mes important en o reino leyonés, y mes que mes, en os condaus de Galicia, se basaba de primeras mes en as nulas posibilidaz de convertir-se en rei que li quedaban a lo fillo d'o primer matrimonio d'Urraca, lo prencipe Alifonso Remúndiz (lo pai heba estau Remundo de Borgonya, † 1107), mes amparau d'os intreses suyos que no lo rei aragonés.

Alifonso continó con a suya politica de designar tenenzas de castiellos y plazas fuertes ta los nobles d'a suya confianza, companyers de batallas y caballers fidels, y ixo li fació ganar-se mes enemistaz en Castiella, pos nombró bels sinyors d'oríchen aragonés ta bels castiellos d'ixe altro reino y de Leyón. Veyendo los castellanos y leyoneses que perdeban poder en as corz, prencipioron a conspirar contra lo rei d'Aragón. Estió lo conte de Candespina Gomo González lo primer d'alzar a voz, anque no prenió garra acción contra Alifonso, pero ixo sí que lo facioron cualques miembros d'a nobleza de Galicia, que se devantoron en armas contra lo matrimonio reyal y enristioron intereses reyals en a suya rechión.

A respuesta d'Alifonso, veterano guerrero y curto de pacencia, estió rapeda y violenta, y replegando-ie las suyas huestes navarro-aragonesas en Castiella, se'n fué dreito enta Galicia y lis infrinchió una vergonyant redota en o castiello de Monterroso (actual provincia de Lugo), en 1110. Si s'analiza con a perspectiva historica, la batalla de Monterroso estió una forma planera de decir lo Batallero que yera bien resuelto a escannar cualsiquier intento de rebelión en contra suya fendo uso d'as armas; ixo significaba que de venidero, si os nobles castellanoleyoneses quereban librar-se d'él, habrían d'organizar-se millor, y ixo estió lo que pasó en os anyos siguients, afogando los reinos hispanicos en un contino estau de guerra civil.

L'altra facción contraria d'Alifonso en Castiella y Leyón estioron os numerosos eclesiasticos d'orichen francés y especialment borgonyón que s'heban establiu arredol d'o camín de Sant Chaime mientres o reinau d'Alifonso VI -perque lo primer yerno d'iste yera borgonyón, recordemos, y teneba buenas relacions con a ilesia d'allá- y que ta par d'alavez ostentaban ya muitas sinyorías en ixes territorios. Ixo significaba que, caso que se tirase ta debant a politica d'Alifonso d'Aragón d'establir-ie un poder burgués en ixas villas y ciudaz, éls teneban las de perder con a cuestión. Estes eclesiasticos estioron os que argumentoron bien furo debant d'o papa Pascual II ta que iste declarase nulo lo matrimonio d'os dos reis, esgrimendo l'argumento de que ixas vodas (que los cronistas castellanos gosoron dica decir-ne «las malhadadas bodas», "mal-habidas bodas") yeran incestuosas y contra d'a voluntat de Dios, perque tanto Urraca como Alifonso yera bisnietos de Sancho lo Mayor de Navarra.

Nulidat matrimonial, o rei d'Aragón no quiere perder os dreitos sobre Castiella

Urraca I de Castiella, en una representación d'o sieglo XII.

Entre los anyos 1110 y 1111, lo conte de Candespina miró de convencer a la reina Urraca que lo prencipe Alifonso heba d'estar o rei lechitimo de Castiella, como unico fillo biolochico d'a reina natural de Castiella y de Leyón, ta que secundase l'alzamiento d'a nobleza contra Alifonso d'Aragón. Ixo ye, ta bels historiadors, lo que decidió que las tensions d'entre Urraca y Alifonso deixasen d'estar no només que tensions maritals y politicas, y se convertesen en una guerra ubierta entre lo monarca aragonés y las faccions castellanistas.

Diz que Alifonso pensaba que la proximidat en a relación entre lo conte de Candespina y la suya muller se traduciba en infidelidat per partes d'ista a os votos matrimonials, razón que hese puesto fer que la repudiase escapau, pero en veyendo que con mans que mediaban per a nulidat matrimonial en Roma (que feba poquet que heba sabiu que tamién l'arcebispe de Toledo yera demandando-la a lo Papa) y amés con a reina conspirando con un d'os suyos confesaus detractors, yera inminent que perdese os dreitos conchugals en o reino de Castiella y Leyón, y alavez decidió de quitar-la forzosament, declarando-la unilateralment incapaz ta gubernar, y la fació trancar en o castiello de lo Castellar, en tierra aragonesa, declarando la guerra ubiertament a lo conte de Candespina y a los suyos seguidors, y encetando una sorprendentment exitosa invasión de Castiella con as tropas d'o chicot reino d'Aragón y caballers navarros, con a unica aduya en o bando castellanoleyonés d'os contes de Portugal (que encara no yera independient).

En pocas semanas chusmetió las ciudaz rebels de Palencia, Burgos, Osma, Safagún, Astorga y Orense, con una velocidat sorprendentment rapeda que forzó que d'entre los enemigos castellanistas se comenzase a decir que lo monarca aragonés y los suyos veterans talment yeran «invencibles».

Aproveitando que lo rei aragonés teneba fayena en l'occident peninsular, o conte de Candespina Gomo González fació una incursión rapeda enta Lo Castellar, liberando a la reina Urraca, qui en fuyó escapada enta lo monesterio de Safagún. As noticias que recibió d'ixa incursión prevocoron que Alifonso Sánchiz marchase con l'exercito enta lo sud d'as posesions castellanas, con a intención de castigar a lo conte González. A ciudat de Toledo cayó en a primera metat de 1111, y Alifonso d'Aragón s'aprestó a fer cambiar-ie l'arcebispe conspirador.

A batalla de Candespina ocurrió lo 26 d'octubre de 1111 en Candespina (contracción documentada de Campo del Espino), en l'actual municipio segoviano de Fresno de Cantespino. Bi prenioron parte las tropas navarro-aragonesas d'Alifonso y lo conte de Portugal, Enrique de Borgonya, per a bando aragonesista, y las tropas fidels d'Urraca y lo conte de Candespina per o castellanista. A redota d'os castellanos y la muerte d'o conte de Candespina en o combate deixó a la reina de Castiella en una situación prou mala, que resolvió fendo las paces con o suyo mariu.

En 1112 lo papa Pascual II fació oficial una menaza ta que los dos reis fesen patent a nulidat d'o suyo matrimonio, baixo pena d'excomunión si encara s'estaban chuntos. Alavez, Alifonso, fundament relichioso y con motivo d'una nueva disputa con Urraca, aproveitó ta repudiar-la definitivament. O repudio se consolidó y fació oficial en un concilio celebrau en Palencia en l'anyo 1114.

En repudiando a la reina de Castiella perdeba oficialment os dreitos sobre iste reino per os que tanto heba luitau en os anyos anteriors. Ixo significó ta Alifonso un cambio de dirección en o suyo prochecto, tornando-se-ne enta Aragón y reprenendo lo complexo prochecto de conquiesta de Saraqusta, que en 5 anyos de matrimonio (1109-1114) heba deixau cuasi de tot albandonau.

Estratechia militar, reconquiesta d'Aragón

A reconquiesta d'Alifonso en o reino d'Aragón se dividió en dos fases. A primera, rapeda y caracterizada per ganar puestos de gran importancia estratechica, escomenzó a prencipios de 1105 (poquez meses dempués que lo coronesen rei) y remató en 1107 con a conquiesta d'as villas prencipals en a comarca de Litera. O matrimonio suyo con Urraca I de Castiella en 1109 significó una pausa de 5 anyos en l'aventura de reconquerir contra los moros de Zaragoza. A segunda fase, a partir de 1114 (anque de primeras estió mes lenta), encluyó tamién l'anexión de nuclios ta lo reino de Navarra, y que se fese chugar un nuevo papel a la diplomacia exterior, que dica l'inte no en heba chugau garra: una fuerte alianza con os gascons d'o vizconte de Biarn Gastón IV, y la promulgación d'una bula papal que atorgaba los mesmos beneficios de liberación espirital a los que luitesen a lo costau d'Alifonso contra los moros que a los que se'n isen enta las Cruzadas, producto d'un exito diplomatico en o papau.

Primera etapa (1104-1109)

Tan buen día como lo coronoron rei d'Aragón y Navarra, Alifonso comenzó a sembrar a simient d'ixo que 14 anyos dimpués habría de culminar con a conquiesta de la Madinat Albaida, cambiando de tot a estratechia que heban emplegau os suyos predecesors. Encetó y remató la presa d'Exeya en 1105 y per lo fuero tan prencipal que li dió toz os suyos habitants habius y veniders estioron dende alavez caballers (per ixo tien ixe nombre). Completó en a mesma anyada la conquiesta d'a resta de Cinco Villas, fendo-se con Taust y Sadaba, y dimpués fendo un contino per a val d'Ebro dica encorralar-ie la capital de tot per l'ueste, en una operación que si se mira con a perspectiva d'ixa epoca (d'os tiempos que costaban as conquiestas), puet bien decir-se-ne "lampago".

En o mesmo anyo d'o 1105 decidió mandar que i construisen dos castiellos en a campa de l'Ebro debant de Saraqusta, a tiro d'escacilo, talment como si gosase menazar con a suya presencia a lo rei Al-Mustain II: os castiellos de Chuslivol («Deus lo vol» en aragonés d'ixa epoca) y lo Castellar.

En ixes primers anyos, s'encorraló Zaragoza en completando la conquiesta d'a Plana de Uesca, os Monegros (encara no s'heba puesto conquerir mica mes enta lo sud d'a sierra d'Alcubierre) y l'aria de Balbastro y Monzón. Conquerió Tamarit y Sant Istevan de Litera en l'anyo 1107, rematando asinas a fayena que lo suyo chirman mayor heba deixau per imposible, pero no podió estar-se mes tiempos reconquerindo per as actuals Francha d'Aragón y Leida, que quedoron como reductos musulmans dica lo reinau de su sobrina Peironela. Con ixas conquiestas, lo monarca heba establiu una muga inferior ta lo suyo reino que concidiba en a mes gran parte d'a suya largura con o río Ebro, treito de lo baixo curso d'iste y d'a Cinca, on plazas como Fraga u Mequinenza yeran encara posesions moras.

Segunda etapa (1114-1134)

Habendo feito una sola intervención en termins militars en a guerra de reconquiesta navarro-aragonesa en l'anyo 1110, lo día que redotó a Ámhad Al-Mustain II de Saraqusta (qui bi perdió la vida) en a batalla de Val Tierra (Navarra), lo rei aragonés habió d'organizar a nueva etapa en territorio propio con nuevas estratechias: s'entrevistó con Gastón IV de Biarn cuan iste tornó d'as Cruzadas en Orient, establindo una alianza que habría d'estar prencipal ta lo prochecto de reconquiesta en o canto sud d'o Pireneu. Os primers movimientos los fació en reconquerindo la comarca de Tudela en 1117, fendo-se con Fitero, Corella, Murchant, Cascant, Mont Agut y Cintruénigo en o mesmo anyo, que dende l'ataque de Al-Mustain II 7 anyos antes heban quedau en posesión musulmana.

En una calendata (que ta los historiadors encara ye confusa) entre las conquiestas en Tudela de 1117 y la primera metat de 1118, Alifonso marchó enta lo Biarn ta estreitir as relacions con Gastón IV. Gastón yera un veterano occitán d'a guerra de Tierra Santa, de costumbres guerreras y fervor cristiano similars a lo rei aragonés, sinyor d'un vizcondau como yera lo Biarn de dimensions y poder economico pareixius d'Aragón, y que heba feito construyir y emplegau armas de seches en a presa de Cherusalem l'anyo 1099, cuan i luitaba baixo las órdens de Remundo IV de Tolosa (ixa experiencia habría d'estar importantisma en a guerra de Saraqusta mes luego).

Se'n sabe poqueta cosa de cómo s'establió tan buena relación d'entre Alifonso y Gastón, talment perque teneban tantas experiencias en común, diz que se facioron dica muit amigos. Lo prencipio d'ixas relacions no se sabe cuan pasó, y bi han indicios que Alifonso I y Gastón IV ya se coneixeban d'antes mas y heban incluso colaborau (d'ixo si que no bi ha garra preba) d'antes de 1117: o vizconte de Biarn apareixe como sinyor de Balbastro en 1113, pero lo motivo que ixo fuese asinas només s'ha puesto concheturar. Se sabe per seguro que entre 1117 y 1118 celebroron un concilio en Biarn en o cual sinyoron un compromiso de cooperación en Aragón que habría d'estar decisivo en os anyos siguients.

Tampoco no se sabe si Gastón de Biarn influyó guaire en a decisión d'os altros nobles occitans d'aduyar en a reconquiesta. En 1117 se fació en Tolosa un concilio con participación de diferents bispes franceses y sobretot occitans, y tamién nobles d'ixes países, que con o respaldo d'o papa de Roma decidioron conceder os beneficios d'una Cruzada a qui convenisen en reconquerir a poderosa ciudat de Zaragoza. S'ha de pensar que en a man norte d'o Pireneu, lo nombre de Saraqusta encara i rebellaba emocions, pus que en l'anyo 778 dica l'emperador franco Carlos Magno i heba perdiu una gran batalla en mirando de conquerir-la, y ye precisament a comienzos d'o sieglo XII cuan se considera que lo poema de Rolando (o cantar que parla d'aquelo) se i yera fendo popular; alavez, a caldereta yera bien parada ta que l'esprito d'ixa nueva cruzada atrayese un gran numero de caballers ta que i aduyasen a lo rei aragonés. Una bula d'o papa Chelasio II a finals d'ixe anyo ratificó las conclusions d'o concilio de Tolosa, y alavez la tabla se fació finalment cacinglada ta que un gran exercito se concentrase pensando de conquerir a ciudat blanca.

Saraqusta

A ciudat de Saraqusta, altrament dita Madînat Al-baida «la ciudat blanca» per os poetas arabes, yera una d'as ciudaz mes importants d'a peninsula Iberica, capezana sinyoral d'un reino (la dita taifa de Saraqusta) que heba puesto mantener a suya autonomía dintro d'Al-Andalus per estar tan a lo norte, y estar a prencipal ciudat que se trobaba en o norte tan amanada d'a muga primer con l'imperio franco, y sieglos dimpués con os territorios d'a Marca Hispanica que yera convertindo-se en enemigos cosirants. Estar un bastión defensivo exitoso li heba permeso fer-se con un grau d'autonomía singular entre las ciudaz andalusinas dillá d'o reinau d'os Omeyas.

A prencipios d'o sieglo XII gubernaban Saraqusta la casa de Banu Hud, tenendo lo mes gran exponent d'a dinastía en Al-Mustaín II (perdedor en a batalla d'Alcoraz y muerto en Val Tierra en 1110). Dempués que morise Al-Mustaín, su sobrino Abdelmalik heredó lo reino, pero la contumancia per la debilidat que se trobó per haber-se cacegau tota la tropa saraqustiana en Val Tierra li fació de mirar-se protección fendo-se vasallo de donya Urraca de Castiella en ixe anyo mesmo (que yera fendo la guerra contra Alifonso). Os periglos prencipals que espantaban a Abdelmalik yeran a combinación d'o creixent poderío militar d'Aragón per o norte, y l'amenaza d'os almurabiz que ya heban conseguiu chusmeter la resta de taifas d'Al-Andalus.

As peitas que pagaban a Castiella a cambio d'ixa proteción no lis facioron mica goyo a las faccions pro-almurabiz que viviban en a ciudat, perque en 1110 encara feban poquez tiempos d'a conquiesta de Toledo -d'entre altros factors- y os sentimients d'os islamistas saraqustins encara se'n resentiban. Ta muitos musulmans saraqustins, a imposición d'un poder unificau en Al-Andalus baixo lo gubierno almurabit yera una posibilidat de recuperar la hechemonía islamica en a peninsula que s'heba puesto adubir en o reinau d'os viellos califas cordobeses. Una rebelión urbana en a medina blanca remató lo reinau d'Abdelmalik en poquez meses, habendo-ne de fuyir con a cort y las riquezas enta la val de Xalón, a on i fundó un nuevo reino en Rueda. A enemistat que li quedó a Abdelmalik con os almurabiz dempués d'a suya expulsión d'a ciudat lo convirtió en un eventual aliau d'Alifonso I d'Aragón enta bels eventos posteriors.

Os almurabiz gubernoron en Zaragoza dende 1110 dica la suya cayida en 1118, con Muhammad ibn al-Hach (1110-1115) y Ibn Tifilwit (1115-1117). Muhammad ibn al-Hayy heba estau lo conqueridor de Valencia en 1102 dempués que morise lo Cit Campiador, y como gubernador de Saraqusta a partir de 1110, miró de reconquerir-le tierras a Alifonso d'Aragón, sin de guaire mes exito que de prener-le la fortaleza de Chuslivol. Dempués que morise Ibn al-Hayy, Ibn Tifilwit ocupó lo suyo puesto, nombrando visir d'a ciudat a lo filosofo Avempace, anque per desavenencias personals iste gosó deixar lo gubierno y marchar bel tiempo dempués. Dende 1117 dica la suya cayida, Saraqusta estió gubernada per o rei de Murcia.

Zaragoza yera en ixes tiempos la ciudat mes important en a val d'Ebro, protechida por una dople muralla, teneba bels 20.000 habitants, estando superada en a suya mida només que per Toledo, Sevilla y Cordoba. Ni Valencia ni la Medina Mayûrqa (Palma de Mallorca) no la superaban. O cheografo Al-Idrisí la describiba asinas:

A ciudat de Zaragoza ye una d'entre las prencipals ciudaz d'Al-Andalus. Tienei una gran extensión, populosa y ampla; tienei carreras bien amplas y vías, y bonicas casas y vivendas. Ye embironata de chardins y verchels, y tienei una gran muralla feta de pietra, inexpugnable. (...) A ciudat de Zaragoza prene tamién o nombre de medina albaida (la ciudat blanca) y ixo ye per l'abundancia de calso y enlucitos en as parez .

Al-Idrisi, Kitab nuzhat al-mustaq fi ihtiraq al-afaq (Cheografía d'Al-Andalus), S. XII

A conquiesta d'a capital

Ta mas detalles, veyer l'articlo Conquiesta de Zaragozaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

En marzo de 1118, gran numero de caballers y sinyors franceses y gascons s'achuntoron en Ayerbe baixo lo mando d'Alifonso lo Batallero. Marchoron enta lo sud y en pocos días heban completau un seche a la ciudat de Zaragoza, que habría de durar nueu meses, dica l'aviento d'ixe anyo.

Se sabe poquet de como se i desarrolló lo seche. Bels historiadors consideran que la cortera d'o subministro d'augua, que alavez dentraba en a capital per a dita canal de la Romareda, estió l'acción que gosó accelerar a cayida d'a esfensa. Os meses que heban pasau setiando la capital significoron una dificultat important ta la moral y la salut d'as tropas cristianas, por tanto l'apleganza de l'hibierno hese, segurament, forzau una retirada perque la mes gran parte d'os hombres dormiban a lo raso.

Saraqusta estió conquiesta lo 18 d'aviento de l'anyo 1118, dempués de grans penurias ta la tropa cristiana en nueu meses de seche, considerando-se-ne lo colofón prencipal la presa d'o torretón de La Zuda, que a par d'alavez yera l'edificio d'o gubierno musulman d'a ciudat, con fortificación propia en un extremo d'o recinto amurallau.

O palacio de l'Alchafaría, a residencia reyal d'os monarcas saraqustins, Alifonso les ne dió a los monches beneditins ta que en fesen un monesterio. L'Alchafaría de Zaragoza no estió emplegada como residencia reyal d'os monarcas d'Aragón que dica lo reinau de Pero IV lo Cerimonioso, dos sieglos dempués.

A cayida en mans cristianas d'a capital significó lo final d'o protectorau d'esta ciudat sobre muitas altras poblacions y villas en l'actual Aragón, que remanioron poquez tiempos independients dica que miqueta a miqueta los cristianos las conquerioron.

Zaragoza obtenió lo fuero Totum per totum, que confiaba la protección d'os intreses particulars a los cuerpos armaus seculars que se i podesen formar, garanciando asinas l'autodefensa, y con l'establimiento d'u rechimen d'alchamías, se garanciaba tamién o respeto entre las comunidaz relichiosas (a musulmana ya establida, y los cristianos nuevos arribaus) y l'emplego d'as mesquitas d'a ciudat mientres un anyo dica que se i fese lo treslau d'os musulmans enta los rabals.

O tractau d'as capitulacions que sinyoron en l'Alchafaría con os musulmans d'antes que se rendisen incluyiba lo dreito d'istes a practicar a suya relichión en a ciudat de Saraqusta, en pagando impuestos especials, y continar vivindo-ie dica l'anyo siguient, en que s'habrían de tresladar enta los rabals (l'alchamía nueva) os que se i queresen quedar, mientres que os qui tenesen garra puesto altro enta on marchar lo podeban fer librement. A intención d'Alifonso yera que la ciudat no s'espoblase de tot, y que conservase los artesans y comerciants musulmans que ya i viviban ta que no s'arruinase l'economía. Este fenomeno d'asimilación d'os moriscos habrían d'estar a radiz de tot l'arte mudéchar que floriría en Aragón en os sieglos siguients.

As condicions d'o tractau de capitulación de Zaragoza, seguntes l'historiador José Luis Corral Lafuente, incluyiban:

O dreito d'os musulmans que lo queresen de quedar-se-ie a vivir, anque habrían de pagar de venidero bels tributos per profesar una relichión diferent.
O dreito d'os musulmans que queresen marchar de fer-lo librement, levando-se las cosas que queresen.
O dreito d'os musulmans d'emplegar as mesquitas d'a Medina blanca y las suyas casas dica que, pasau l'anyo, habrían de tresladar-se enta extramuros.

Dempués d'ixas disposicions, en a medina (a ciudat viella) de Zaragoza s'establioron numbrosos cristianos de tot orichen que heban participau en a reconquiesta d'a ciudat, convertindo-la en una ciudat cosmopolita y rica, que anque no existen datos de cuanta población conservó entre los 20.000 moriscos orichinals que heba puesto tener, creixió con l'aporte cristiano y s'expandió con vicos nuevos a extramuros. Gastón IV de Biarn recibió la sinyoría d'a nueva capital aragonesa per recompensa d'haber estau tan buen aliau d'o monarca aragonés.

Expansión d'Aragón enta lo sud de l'Ebro

Con a cayida de Zaragoza en mans cristianas, o rei d'Aragón adebantó los suyos plans de conquiesta contra las copiosas villas y lugars d'o Baixo Aragón y la val d'Ebro que heban quedau sin prener. En 1119 conquerió Fuents d'Ebro, Alfacharín, Tudela (la zaguera villa prencipal de Navarra que quedaba sin conquerir-se), toda la defesa de Moncayo incluyindo-ie Tarazona y la redolada (estes puestos, dempués d'a muerte d'o rei, habrían de tener importancia cabal per estar la muga con Castiella), la val natural d'o río Alfama (en La Rioja) con Cervera d'Alfama en a capeza, Tudillén y Castillón (fortalezas en Navarra, enguán arruinadas), Novallas, Agreda, Magallón, Alberit, Borcha, Alagón, Noviellas, Rueda de Xalón (chusmetió lo rei moro Abdelmalik a vasallache, anque respetó lo reino que i heba constituyiu) y Epila.

Probablement, en ixe anyo mesmo (1119), reconstruyó y repobló l'arruinada ciudat de Soria y bels lugars d'a comarca suya, anque bels historiadors y cronistas castellanos han atribuyiu tradicionalment ixa fayena a lo rei Alifonso VII de Castiella, lo fillo d'Urraca. Modernament, pareix que los documentos atestiguan que l'actual ciudat castellana fació parte d'o reino d'Aragón mientres cualques anyos, dica que con a muerte d'Alifonso lo Batallero (1134) la prenioron definitivament as tropas d'o rei castellano.

En 1120 yera setiando la ciudat de Calatayú cuan i recibió noticias d'un gran exercito almurabit que puyaba dende Valencia ta reconquerir Zaragoza. Bien escapau, quitó las tropas que teneba, y aduyau per lo gascón Guillén IX, duque d'Aquitania, marchó enta surtir-les a lo paso d'as tropas musulmanas d'antes que no plegasen enta Zaragoza. Os almurabiz, que puyaban per una antiga calzada romana per a cuenca d'o río Guadalaviar, pasada la villa de Tirwal (l'actual Teruel) yeran fendo camín enta la val d'Ebro cuan a fuerza aragonesa os encalzó, a par d'o lugar de Cutanda (val de Xiloca) parando la que s'ha puesto recordar como la mes gran batalla d'o Batallero; la dita batalla de Cutanda, que remanió en o imachinario popular aragonés en os sieglos siguients, dica que en o sieglo XIV encara se deciba "pior estió aquello de Cutanda" ta referir-se a las contumancias que pareixen imposibles pero que dempués encara se solventan.

En a batalla de Cutanda, las fuerzas aragonesas que yeran inferiors en o numero d'efectivos, obtenioron una victoria lo 17 de chunio de 1120 y forzoron la retacula d'as tropas almurabiz, que albandonoron garra intento posterior de reconquiesta. La fama de Cutanda s'estendilló tamién per Occitania.

En os días siguients, l'exercito victorioso prenió Calamocha y Mont-reyal, on que pareix que s'establioron temporalment (en fundando, se diz, que l'actual municipio), d'antes que no reprenesen y rematesen la conquiesta de Calatayú que significaría la consecución d'un dominio aragonés definitivo en as vals de Xalón y de Xiloca en chunto. Bubierca, Alfama d'Aragón, Daroca y Fariza se facioron conquiestas d'antes que s'acabase l'anyo 1120.

En l'anyo 1122 constituyó en Mont-reyal la primera orden militar d'a peninsula Iberica, la dita Militia Christi («Milicia de Cristo») seguindo l'eixemplo d'as que ya s'heban establidas en Cherusalem en as Cruzadas, en atorgando-lis o castiello d'a dita localidat (que, en ixas envueltas, yera en a muga con Al-Andalus), y la influyencia sobre as villas y localidaz d'o río Xiloca y Teruel (lo rebanyo de lugarons que costituyiban a suya comarca), plegando ixes dominios dica Segorb. A intención d'o Batallero yera que caso que no s'arreglasen as relacions con os contes de Barcelona (tenioron muitas tensions en ixes anyos), dende l'orient de l'actual provincia de Teruel se'n podese ixar una espedición de reconquiesta contra Tortosa (deseyau obchectivo d'os monarcas aragoneses dende Sancho Remíriz) que permetese fer-se un paso enta la Mediterrania ta lo reino d'Aragón.

A influencia de l'ideyal cruzau en Alifonso I estió grandisma, y anque nunca no marchó personalment enta Tierra Santa, prenió muitas inspiracions d'as accions d'os guerrers d'Orient meyo. A Militia Christi estió uno d'os puntos fuertes d'os siguients 14 anyos d'o suyo reinau, y anque estió remodelada per Alifonso VII de Castiella en 1136, dempués que morise lo rei aragonés, reasentando-la con seu nueva en o castiello de Belchit, Ramón Berenguer IV (princeps d'Aragón 1137 - 1162) la fusionó con a orden d'o Temple en a Concordia de Chirona de setiembre de 1143. A Militia Christi tenió los beneficios d'una cruzada permanent en a contra de l'islam, dillá d'os establimientos d'a suya fundación, per a expresa concesión d'o papa de Roma. La mes gran parte d'os datos que s'han puesto recopilar d'ixes comienzos s'han extrayiu d'una carta de l'arcebispe occitán Guillermo d'Aux, de 1122.

En 1123 s'enfrentó con o conte de Barcelona, Ramón Berenguer III (pai d'o futuro Ramón Berenguer IV), per o dreito de posesión sobre la recient reconquiesta ciudat de Leida, lo redotó y prenió la dita ciudat que estió incorporada a lo reino d'Aragón.

Expedicions per dintro de l'Al-Andalus (1124 - 1126)

Con a cantidat de nuevas villas y territorios que heba incorporaus a lo reino d'Aragón, lo Batallero precisaba de gran cantidat de personas ta repoblar os campos, villas y ciudaz, ta formar una economía que permitise lo ritmo d'as conquiestas. Sabendo que existiban muitos mozarabes (cristianos baixo gubierno musulmán) en as prencipals ciudaz d'Al-Andalus, y que heban esclatau bellas revueltas per lo fanatismo islamista d'os gubernants almurabiz, Alifonso d'Aragón veyó que talment en podeba quitar buen proveito si conseguiba atrayer-los enta Aragón.

En 1124, con 50 anyos d'edat, lo monarca aragonés emprenió un arriesgau prochecto de captación demografica en l'interior d'Al-Andalus, deixando lo reino baixo gubierno d'os suyos aliaus, marchó personalment a la capeza d'un exercito y se dentró en o reino moro de Valencia, plegando dica Benicadell (Penya Cadiella en as cronicas). L'anyo de 1225 sería prencipal en ixa clamada de pobladors: surtindo per Teruel y baixando mes luego per debant encara de Valencia, en poquet mes d'una anyata arrulló una ofensiva contra lo reino de Granada con a pretensión de formar-ie un prencipau cristiano en o sud de l'Al-Andalus, y recorrió importants localidaz d'a val d'o Guadalquivir (Cordoba) y plegó dica la costa de Motril, tornando-se-ne con un gran botín militar (os dividius reinos musulmans no heban puesto fer-le la contra) producto de saqueyar villas y ciudaz musulmanas, y replegando-ne una comitiva que s'ha calculau de bels 10.000 mozarabes andalusins que s'instalarían en territorio aragonés.

Alifonso VII de Castiella

O 8 de marzo de 1126 morió Urraca I en librando una criatura con 44 anyos, la que heba estau la suya muller y reina de Castiella, deixando la corona castellanoleyonesa en as mans d'o suyo fillo natural, Alifonso Reimúndiz, fillo de Reimundo de Borgonya, qui dende alavez gubernaría como Alifonso VII de Castiella.

As tensions d'entre Alifonso d'Aragón y lo suyo antigo entenau levoron altra vegada las dos coronas enta una situación de guerra, pus que lo rei castellano no quereba deixar-se perder as villas que heban quedau en posesión aragonesa dempués d'a redota de Candespina. L'esclatiu d'una nueva guerra entre Castiella y Aragón fació que iste perdese las posesions en La Rioja y Soria entre l'anyo 1127 y 1128, dica que la sinyatura d'una paz, la dita paz de Támara (1128), d'entre os dos Alifonsos afixó os limites de muga entre los dos reinos.

En os dos anyos de guerra, Aragón només i heba ganau que Molina d'Aragón y Longars.

En 1129 repobló Cella, Ribota y Monzón, concedindo-lis fueros. Marchó enta Valencia y i redotó a los almurabiz en Cullera y asechó la ciudat de Valencia, anque dempués alzó lo seche y se'n habió de tornar enta lo norte per haber-ie d'esfensar os condaus vasallos de Foix y Cominches, penetrando con o suyo exercito per a val d'Arán y establindo-ie lo campamento y base d'operacions prencipal en 1130.

Testamento

En octubre de 1131, mientres setiaba la ciudat vascona de Bayona, fació lo problematico testamento que habría de deseparar os reinos d'Aragón y Navarra dempués d'a suya muerte. O testamento deixaba los suyos reinos a los caballers d'a Orden d'o Temple, os caballers d'o Hespital de Cherusalem y la ilesia d'o Santo Sepulcre de Cherusalem, tres institucions relichioso-militars cruzadas que teneban una gran independencia respecto d'a Ilesia Catolica de Roma:

En o nombre d'o bien mes gran y incomparable que ye Dios, Yo, Alifonso, rei d'Aragón, de Pamplona [...] pensando en a mía suert, y reflexionando que la naturaleza mos fa mortals a toz os hombres, me proponié que mientres encara tenese vida y salut, destribuiría lo reino que Dios me concedió y las mías posesions, y las rentas, en a maniera mes convenient ta dempués d'a mía existencia. Per consiguient, temendo lo chudicio divino, y enta la salvación d'a mía anima, y la de mi mai y la de mi pai y la de toz os míos familiars, foi lo testamento ta Dios, ta lo Nuestro Sinyor Chesucristo y ta toz os suyos santos. Y con buen animo y buena voluntat le'n ofreixco a Dios, a la Virchen María de Pamplona y a Sant Salvador de Leyre, lo castiello d'Estella con tota la suya villa [...], dono a Santa María de Nachera y Sant Millán [...], dono tamién a Sant Chaime de Galicia [...], dono tamién a Sant Chuan d'a Penya, [...] y tamién, ta dempués d'a mía muerte, deixo como hereu y succesor mío lo sepulcre d'o Sinyor que i ye en Cherusalem, [...] Tot ixo yo lo foi ta la salvación de l'anima de mi pai y mi mai, y la remisión de toz os míos pecatos y ta mereixer un puesto en a vida etierna...

Este testamento, que ta muitos historiadors s'ha feito a saber-lo de controvertiu mientres muitos anyos, pos no le trobaban garra significau si que la obsesión d'o monarca aragonés con a relichión, tenió, manimenos, una explicación en o libro de 1975 d'a historiadora Elena Lourie El testamento de Alfonso I el Batallador, rey de Aragón y Navarra. Ta Lourie, la enemistat entre Alifonso d'Aragón y Alifonso VII de Castiella yera preeminent, por tanto este segundo teneba ademés d'os dominios en a peninsula, altros condaus y posesions en Francia y Borgonya que heba heredau d'o suyo pai (ixo ye, que yera un monarca muit poderoso, y con buenas alianzas), y sobrebuenas relacions con o pontificau romano. Ta lo rei d'Aragón, que heba estau casau con a mai d'Alifonso de Castiella, yera un periglo ta la independencia d'os suyos dominios dimpués que morise que talment lo rei de Castiella gosase demandar-los como hereu en no haber-ie garra altro que en estase de natural. Si las buenas relacions de Castiella con Roma s'hesen trasformau en cualque cosa d'apoyo pontifical enta ixa causa, talment lo papa hese puesto coronar rei d'Aragón y Navarra a lo mortal enemigo d'o Batallero. Alavez, en consecuencia, fer-se heredar per as órdens militars de Tierra Santa yera la unica manera que trobó lo rei aragonés ta privar-lo d'ixa situación, pus que ni l'Hespital, ni lo Temple teneban prou relación con o trono de Sant Pero como ta que lo Papa decidise que heban istes de fer.

Tamién que lo rei i nombrase herederas a bellas congregacions relichiosas con important presencia en Castiella y en Leyón s'ha d'entender, seguntes Lourie, como una manera de que los relichiosos d'ixes reinos fesen de freno ta los eventuals intreses d'Alifonso de Castiella. Estió asinas talment, tot pensau, que lo rei d'Aragón deixó bien paradas as cosas ta que lo suyo enemigo en vida no i podese fer cosa en os suyos dominios cuan fuese muerto.

Zagueras batallas

En 1131, mientres que lo rei yera esfensando Gascunya contra los franceses, os gascons Gastón IV y un caballero d'iste, per nombre Istevan, combatioron en o sud-este d'Aragón contra una nueva menaza d'os almurabiz. Prenioron lo Mayestrato y i consolidoron lo dominio aragonés que se i heba desmadaixau en os zaguers ataques moros, y en una d'ixas concaradas (que se'n tienen pocos datos) lo vizconte de Biarn i cayó muerto, fendo-se apresau lo suyo calavre en mans d'os musulmans.

Os musulmans decapitoron o calavre d'o vizconte gascón, y tenioron o suyo tozuelo en Granada, punchau en alto en una lanza, ta que los reis d'a ciudat se congratulesen per a muerte d'un d'os enemigos que heban quiesto atacar a ciudat bels anyos d'antes. O cuerpo estió finalment recuperau, a cambio de pagar-lis una important suma de diners, y s'enterró en a basilica d'o Pilar de Zaragoza, anque ixes despullas se perdioron en una remodelación en 1681 u 1717.

A muerte en Aragón de Gastón lo Cruzau significó lo retorno d'o rei enta lo reino, deixando los intreses occitans ta los suyos caballers que bien luego i marchoron. En 1133 asechó y se fació con Mequinenza, un d'os zaguers bastions musulmans que quedaban en l'interior d'Aragón, anque con l'exercito menguau per a perdida de muitos gascons que en habendo muerto Gastón lo Cruzau marchoron enta la suya tierra.

En o estiu de 1134 yera lo rei d'Aragón asitiando la fortaleza de Fraga con un exercito chicot (només que 500 caballers, cuasi toz només que aragoneses y navarros) cuan un ataque d'a fuerza mora les i sorprendió sin de guaire esfensa. A redota d'os aragoneses se produció lo 17 de chulio d'ixe anyo, en recibindo lo veterano monarca graus feridas que, anque podió salvar a vida de primeras, rematoron per matar-lo lo 7 de setiembre en a localidat monegrina de Polinyino. Seguntes a Cronica de Sant Chuan d'a Penya teneba 61 anyos y en heba reinaus a metat.

As 30 anyadas d'o reinau d'Alifonso lo Batallero s'han quiesto recordar como las mes intensas en a reconquiesta en o reino d'Aragón, cuasi triplicando-ne la suya extensión, y convertindo un chicot reino pirenenco en a primera potencia militar cristiana en a peninsula Iberica, capaz d'haber manteniu guerras en diferents frents tanto contra cristianos como musulmans, reformando la suya economía y los fueros, establindo villas y ciudaz, nuclios burgueses, y relacions diplomaticas que enantes no se bi heban feito.

Succesión

Muerto Alifonso sin de garra descendencia, lo testamento que heba deixau no fació mica contentos ni a los nobles ni a los eclesiasticos. En o sieglo XII no heba pasau nunca que un reino quedase sin de succesor dinastico, y menos encara que se querese posar de gubernant una orden militar.

L'asemblea de nobles y notables d'os reinos alcordoron que la solución habría d'estar posar-ne como rei a lo chirmán chico d'Alifonso, Remiro, que a par d'alavez yera lo bispe de Roda-Balbastro y con os suyos 59 anyos d'edat lo zaguer miembro vivo d'a casa d'Aragón. A nobleza de Navarra no acceptoron un rei eclesiastico y proclamoron lo suyo nuevo rei un d'os nobles navarros, emparentau con éls per estar fillo d'un borde de Sancho Remíriz, l'infant García Remíriz alavez García Remíriz lo Restaurador. Con a proclamación d'o nuevo monarca ta Navarra, Aragón y lo dito reino se deseparoron dempués de 50 anyos d'unión personal en a fegura d'o monarca común, ta no tornar-se a chuntar nunca.

En Aragón, a coronación de Remiro tampoco no i estió facil. Rebelions de diferents faccions nobles que no refiaban d'un eclesiastico sin d'experiencia militar fuoron esclatando per tot lo país, dica lo punto que lo recient coronau Remiro II d'Aragón en habió de fuyir enta lo condau d'Urchel dica que las cosas se calmasen. Os nobles aragoneses habioron d'esfensar a integridat d'o reino contra d'un borde de leixos relacionau con a familia reyal, Pero d'Atarés, que con l'aduya d'os navarros ocupó Taust, y tamién contra d'Alifonso VII de Castiella que como s'heba esperau querió reclamar lo trono tamién. A concesión de vasallache per a ciudat de Zaragoza a lo monarca castellano permitió firmar a paz con él, y que intervenise en expulsando los navarros d'Aragón.

Remiro lo Monche reinó entre 1134 y 1137, se casó eventualment con Agnés d'Aquitania de qui en naixió la futura Peironela, y sinyó con Remón Berenguer IV de Barcelona las ditas capitulacions de Balbastro per as cuals prometeba la man d'a suya filla a lo conte y establiba las condicions en que este heba de gubernar o reino anque sin de dignidat reyal, dica que un eventual fillo d'os dos (como finalment en estió Alifonso II) podese heredar lo reino y lo dito condau en calidat d'unión personal (como d'antes mas tamién s'heba feto con Navarra) parando asinas lo que dempués habría d'estar a Corona d'Aragón.

Árbol chenealochico

16. García Sánchez II de Navarra

8. Sancho III de Navarra

18. ???

19. ???

20. Rocher I de Carcasona

10. Bernal de Couserans-Foix

21. Adelaida de Melguèlh

5. Ermisenda de Bigorra

22. García Arnal de Bigorra

11. Garsenda de Bigorra

23. Ricarda d'Astarac

1. Alifonso I d'Aragón

24. Hildouin III de Montdidier

12. Hildouin III de Montdidier

25. Helvide de Laon

6. Hilduino IV de Montdidier

26. ???

13. Alix de Roucy

27. ???

3. Felicia de Roucy

28. Gisleberto de Roucy

14. ???

29. ???

7. Adela de Roucy

30. Rainiero IV de Mons

15. ???

31. Hedwige d'Hainaut

Se veiga tamién

Fuents

José Luis Corral Lafuente: Historia contada de Aragón. Leyere Ediciones. Zaragoza, 2007. ISBN 84-932395-7-7
Doña Urraca de Castiella en Vegavaldavia.com.
Alfonso I el Batallador en Galeon.com.
La Edad Media en la Corona de Aragón en AragonEsAsi.com.

Vinclos externos

Se veigan as imáchens de Commons sobre Alifonso I d'Aragón.
(en) Lourie, Elena; The Will of Alfonso I "el Batallador", King of Aragon and Navarre: A Reassesment.
(es) Alfonso I "el Batallador"
(es) Alfonso I de Aragón, en a Gran Enciclopedia Aragonesa Online
(es) Aragón en las ideas estratégicas del Cid Campeador y del rey Batallador

Predecesor: Pero I	Rei d'Aragón 1104 - 1134	Succesor: Remiro II
Predecesor: Pero I	Rei de Pamplona 1104 - 1134	Succesor: García Remíriz

Datos: Q81833
Multimedia: Alfonso I of Aragon / Q81833