Landa

De Biquipedia
Ir ta: navego, busca
Ta atros emplegos d'o termin Landa se veiga Landa (desambigación).

Landa, Lanna, Lanya u Lana ye una palabra d'orichen celta que s'emplega en idioma aragonés.

En castellán de sustrato aragonés encara s'emplega con diferents significatos en Navarra y Cinco Villas:

  • En Artaxona, Jimeno Jurío documenta o significato de finca que no se cautiva.
  • En a Ribera Navarra, Irribaren documenta o significato de terreno estepario, arenoso, campo plano.
  • En Azagra, significa extensión de terreno yermo.
  • En Taust, significa fondón d'un campo, terreno a lo costato d'una zaica.

Toponimia[editar | editar código]

En a toponimia la trobamos a sobén en l'Alto Aragón, Navarra y Ribera d'Ebro: Landa (Azagra, Alfacharín, Villafranca d'Ebro, Mallén, Grisén, Alcalá de Moncayo), Landas (Granyén, Lo Bust, Anyón, Val Tierra, Fontellas, Fustinyana, Taust, Pratiella, Alcalá d'Ebro, Cabanyas d'Ebro, Alborche), Landilla (Alcalá d'Ebro), Landillas (Fuent de Xalón), Boca Rasa de las Landas (Cabanyas d'Ebro), Landar (Los Fayos), Lanazas (Chaca), Lanas y Lana Mayor (Tramacastiella de Tena), Fuent de Landeta (Ansó, Fago).

Documentación[editar | editar código]

A documentación més antiga en fuents navarras y aragonesas ye de 1102:

concedo vobis quantum potueritis ibi laborare et examplare in illo ermo. Et confirmo una lanna quam vobis donavit ibi illo abbate don Eximino pr vineam facere.

A gran batalla contra los almuades en 1212 la claman Landas de Tolosa en a Cronica de Sant Chuan d'a Penya.

A zaguera documentación d'o termin como bella cosa emplegata en a parla viva ye en Borau en l'anyo 1796, en unos manuscritos municipals en castellán pero con aragonesismos:

estatuimos ordenamos y mandamos que por quitar un abuso que abia en vender campos y lannas de unos vezinos a otros por lo cual el concello a recibido notables daños y por tanto se izo este estatuto, que ninguno puede vender campos ni lannas ninguna que deba al concello […]. Item ordenamos y mandamos que ninguno vecino de dicha villa no pueda vender ni logar campos ni lanas ni heredades de bienes sitios a ninguno que fuere eytranjero [sic] que no sea vecino de dicha villa

En diferents puntos d'Aragón s'han trobato derivatos de Lana como lanyazo, llanazo, lanizo y lanyón.

Etimolochía[editar | editar código]

En protocelta LANDA significaba campo plan y con poca vechetación, y ye corradical d'o latín PLANTA. Esta palabra existe tamién en occitán (especialment en gascón) y vasco.

En navarro-aragonés, o grupo -ND- se conservaba en Navarra, (landa), pero evolucionó ta -nn- cheminata (lanna) en bellas zonas de l'Alto Aragón (por eixemplo en Bielsa, a ón se diz Barannato). Esta -nn- prenió dos camins diferents, u siguió lo destín d'a -NN- latina tornando-se -ny- (lanya), u se simplificó ta -n- (lana).