Grease (cinta)

Grease
Títol	Grease
Póster teatralizau d'a cinta.
Ficha tecnica
Dirección	Randal Kleiser
Aduyant de dirección	Jerry Grandey
Producción	Robert Stigwood Allan Carr
Disenyo de producción	Philip M. Jefferies
Guión adaptau	Bronte Woodard Allan Carr
Basau en	Grease, de Jim Jacobs y Warren Casey
Musica	Michael Gibson
Fotografía	Bill Butler
Montache	John F. Burnett Robert Pergament
Escenografía	James L. Berkey
Vestuario	Albert Wolsky
Peluquería	Christine George
Actors	John Travolta Olivia Newton-John Stockard Channing Eve Arden Frankie Avalon Joan Blondell Edd Byrnes Sid Caesar Alice Ghostley Dody Goodman Sha Na Na
Datos y cifras
País(es)	Estaus Unius
Anyo	1978
Debantadera	13 de chunio de 1978 Estaus Unius
	16 de chunio de 1978 Estaus Unius
Chenero(s)	Cine musical Cine de comedia Cine de romance
Durada	110 min.
Idioma(s)	Anglés
Companyías
Productora(s)	Paramount Pictures Allan Carr Productions RSO Records Polydor Records
Distribución	Paramount Pictures
Presupuesto	6 millons de dólars
Recauto	366,2 millons de dólars
Succesión de cintas
Succedita por	Grease 2
Informacions en bases de datos especializadas:

Olivia Newton-John, Sandy, en una imachen d'o mesmo anyo d'a cinta.

John Travolta, Danny Zuko, en una imachen de 1983.

Stockard Channing, Betty Alexander Rizzo, en una imachen de 1984.

Eve Arden, Directora McGee, en una imachen d'os anyos 1940.

Frankie Avalon, Ánchel d'a guarda, en una imachen de 1963.

Jeff Conaway, Kenickie Murdoch, en una imachen de 1998.

Barry Pearl, Doody, en una imachen de 2017.

Sid Caesar, Entranador Calhoun, en una imachen de 1961.

Eddie Deezen, Eugene, en una imachen de 2012.

Susan Buckner, Patty Simcox, en una imachen de 1980.

Lorenzo Lamas, Tom Chisum, en una imachen de 1989.

Dody Goodman, Blanche, en una imachen de 1958.

Alice Ghostley, Mrs. Murdock, en una imachen de 1970.

Edd Byrnes, Vince Fontaine, en una imachen de 1973.

Sha-Na-Na, Johnny Casino & The Gamblers, en una imachen de 1972.

Joan Blondell, Vi, en una imachen d'os anyos 1930.

Jonh Travolta, Danny Zucco, y Olivia Newton-John, Sandy Olsson, en un fotomontache.

Grease (títol orichinal en anglés, enguerada en Aragón con o suyo títol orichinal, en aragonés Brillantina) ye una cinta de l'anyo 1978 de cine estausunidense de comedia musical romantica dirichida por Randal Kleiser seguntes un guión adaptau por Bronte Woodard sobre un guión adaptau por Allan Carr basau en o musical Grease, de Jim Jacobs y Warren Casey. Producida por Robert Stigwood y Allan Carr ta las productoras Paramount Pictures, Allan Carr Productions, RSO Records y Polydor Records, l'autor d'a suya Banda Sonora Orichinal ye Michael Gibson y la dirección de fotografía ye obra de Bill Butler. Entre l'elenco d'a cinta, destacan en os suyos papels principals os actors John Travolta, Olivia Newton-John, Stockard Channing, Eve Arden, Frankie Avalon, Joan Blondell, Edd Byrnes, Sid Caesar, Alice Ghostley, Dody Goodman y lo grupo de baile Sha Na Na.

Se tracta d'una cinta con a-saber-lo d'exito, plegando a convertir-se en a cinta con un recaudo mas gran de todo l'anyo 1978, amás de recibir opinions muit favorables d'a critica especializada. Antiparte, lo disco Grease: The Original Soundtrack from the Motion Picture con a banda sonora d'a cinta estió lo segundo disco mas vendiu de l'anyo 1978 en Estaus Unius, curiosament dezaga de Saturday Night Fever, banda sonora d'a cinta Saturday Night Fever, una atra cinta musical de l'anyo 1977 que tamién heba protagonizau John Travolta, dirichiu por John Badham. Tanimientres, a cinta no aconseguió garra Oscar y nomás que en recibió una nominación y en os Premios Globos d'Oro no tenió so que cinco nominacions.

Grease tenió una continación con Grease 2 (1982, Patricia Birch), encara que no en conservaba los actors d'a primera cinta. Tamién ye previsto emitir en 2023 una serie de televisión, Grease: Rise of the Pink Ladies, que se tracta d'una precuela ambientada cuatro anyadas antes de Grease y que amostrará los inicios d'as Pink Ladies.

Argumento

En 1958, mientres as suyas vacacions de verano en a placha, lo choven Danny Zuko y una mesacha australiana, Sandy Olsson, qui tamién bi ye de vacanzas, s'enamoran en un amor de verano, que parixe que plega a lo final en rematar las vacanzas porque Sandy torna en Australia. Cuan Danny torna en o suyo instituto, l'instituto Rydell, torna a trobar-se con a suya colla d'amigos greasers, os T-Birds, ye decir, Doody, Sonny, Putzie y lo suyo millor amigo Kenickie. Tanimientres, os pais de Sandy en zagueras han decidiu remanir en Estaus Unius y casualment han inscribiu como alumna a su filla en o mesmo instituto Rydell, a on Sandy ha conoixiu a las Pink Ladies, una colla de greasers formada por as amigas Frenchy, Marty, Jan y la suya líder Rizzo.

Danny y Sandy contan a la suya colla respectiva la historia d'o suyo romance en a placha, pero las versions de cadagún d'els son una mica diferents: Sandy conta una experiencia muit romantica pero Danny explica una relación muito mas fisica. Cuan Sandy diz o nombre d'o suyo amor de verano, Danny Zuko, Rizzo decide preparar una trobada sorpresa entre els, con l'obchecto de mortificar a Danny porque sabe que debant d'os suyos amigos Danny tiendrá que amostrar indiferencia respecto de Sandy, y asinas s'escayece, efectivament. Sandy marcha escocida y Danny mira d'espique a Rizzo, qui sonríe.

Asinas, Sandy conoix a Tom, un atleta de l'instituto, chugador de fútbol americano y prencipia a quedar con él; d'atra man, Kenickie presenta a los suyos amigos un auto viello, en estau muit lamentable, que acaba de mercar, y toda la colla decide con entusiasmo aduyar-lo a fer-lo convertir-se en un auto de carreras de calidat. En una fiesta de pichamas organizada por as Pink Ladies se presentan por sorpresa os T-Birds con l'auto nuevo y Rizzo marcha con els, pero Kenickie los fa fuera a toz ta quedar-se solo con Rizzo, con qui finalment tien relacions sexuals encara que lo preservativo que heban de fer servir s'heba rompiu.

Simultaniament, Sandy y Danny se troban a faltar l'un a l'atro. Sandy para cuenta de que ye fundament enamorada d'él y Danny decide de cambiar, asinas que prencipia a practicar esporte, decantando-se finalment por l'atletismo. Bien luego Sandy se troba en o estadio veyendo chugar a Tom cuan Danny ye practicando atletismo y caye; cuan Sandy corre t'aduyar-lo rematan por marchar chuntos, dixando a Tom. Alavez Rizzo s'ha barallau con Kenickie en pensar ella que ye embarazada y no querer decir-le cosa.

L'instituto Rydell ha estau seleccionau ta celebrar-ie un concurso de baile y los T-Birds asistirán, mesmo que las Pink Ladies, pero Rizzo no asistirá y Kenickie se presenta con Cha-Cha, una antiga novia de Danny, y Sandy prencipia a tener celos d'ella. Mientres o concurso, Cha-Cha consigue fer fuera a Sandy y ganar o baile como parella de Danny, sin que Danny amuestre masiada resistencia a tot ixo. Dimpués Danny s'excusa pero cuan son en un autocine y Danny s'abalanza, Sandy fuye.

Kenickie s'ha chugau lo suyo auto en una cursa pero cuan ha de conducir tien un percance y no puet conducir l'auto y Danny opta por substituyir-lo, ganando la cursa. En veyer tot ixo, Sandy decide que ella ha de fer cambios si quiere tener l'amor de Danny. Con l'aduya de Frenchie, fa una transformación total d'o suyo aspecto fisico y de vestuario y asinas consigue recuperar a Danny. Finalment, todas as parellas se consolidan en a fiesta de final de curso.

Elenco

Actor	Papel	Notas
John Travolta	Danny Zucco
Olivia Newton-John	Sandy Olsson
Stockard Channing	Betty Alexander Rizzo
Jeff Conaway	Kenickie Murdoch
Barry Pearl	Doody
Michael Tucci	Sonny LaTierri
Kelly Ward	Putzie
Didi Conn	Frenchie
Jamie Donnelly	Jan
Dinah Manoff	Marty Maraschino
Eve Arden	Directora McGee
Frankie Avalon	Ánchel d'a guarda
Joan Blondell	Violett
Edd Byrnes	Vince Fontaine
Sid Caesar	Entranador Calhoun
Alice Ghostley	Mrs. Murdock
Dody Goodman	Blanche
Sha-Na-Na	Johnny Casino & The Gamblers
Susan Buckner	Patty Simcox
Lorenzo Lamas	Tom Chisum
Fannie Flagg	Enfermera Wilkins
Dick Patterson	Mr. Rudy
Eddie Deezen	Eugene
Darrell Zwerling	Mr. Lynch
Ellen Travolta	Cambrera
Annette Charles	Cha-Cha DiGregorio
Dennis Cleveland Stewart	Leo Kapinski
Barbi Alison	Bailarina
Helena Andreyko	Bailarina
Jennifer Buchanan	Bailarina
Carol Culver	Bailarina
Cindy DeVore	Bailarina
Deborah Fishman	Bailarina
Antonia Franceschi	Bailarina
Sandra Gray	Bailarina
Mimi Lieber	Bailarina
Judy Susman	Bailarina
Dennis Daniels	Bailarín
Larry Dusich	Bailarín
John Robert Garrett	Bailarín
Daniel Levins	Bailarín
Sean Moran	Bailarín
Greg Rosatti	Bailarín
Andy Roth	Bailarín
Lou Spadaccini	Bailarín
Andy Tennant	Bailarín
Richard Weisman	Bailarín
Lennie Baker	Miembro de "Johnny Casino & The Gamblers"	No acreditau
Jon "Bowzer" Bauman	Miembro de "Johnny Casino & The Gamblers"	No acreditau
Brian Beltran	Miembro d'a banda d'os Scorpions	No acreditau
Paula Beyers	Bailarina	No acreditada
Michael Biehn	Mike, atleta d'a escuela	No acreditau
Greg Bradford	Bailarín	No acreditau
Tod Burton	Chugador de baloncesto	No acreditau
Johnny Contardo	Miembro de "Johnny Casino & The Gamblers"	No acreditau
Jay Crimp	Bailarín	No acreditau
Carole Demas	Mesacha arreglando-se lo pelo en l'autocine	No acreditada
Dennis Falt	Estudiant	No acreditau
Donna Felix	Bailarina	No acreditau
Barry Fisher	Qui lanza la tarda	No acreditau
Vinny Genna	Bailarín	No acreditau
John Michael Graham	Bailarín	No acreditau
Kristine Greco	Bailarina	No acreditada
Frederick "Dennis" Greene	Miembro de "Johnny Casino & The Gamblers"	No acreditau
J. Andrew Kenny	Andy, luitador	No acreditau
Jocko Marcellino	Miembro de "Johnny Casino & The Gamblers"	No acreditau
John Mooney	Camara	No acreditau
Arlene Parness	Bailarina	No acreditada
Bob Quinn	Bailarín	No acreditau
Stan Rodarte	Estudiant bailarín	No acreditau
Dave "Chico" Ryan	Component de "Johnny Casino & The Gamblers"	No acreditau
"Screamin" Scott Simon	Component de "Johnny Casino & The Gamblers"	No acreditau
Wendie Jo Sperber	Bailarina	No acreditada
Lora Marie Taylor	Mesacha en o primer día d'escuela	No acreditada
Wendy Wessberg	Mesacha sentada en o baile	No acreditada
Donald "Donny" York	Component de "Johnny Casino & The Gamblers"	No acreditau
Jamie Zemarel	Estudiant	No acreditau

Banda Sonora Orichinal

Ta más detalles, veyer l'articlo Grease: The Original Soundtrack from the Motion Pictureveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

O disco con a Banda Sonora Orichinal de Grease remató l'anyo 1978 estando lo segundo disco mas vendiu de l'anyo en Estaus Unius, superau nomás que por un atro disco d'una atra banda sonora, Saturday Night Fever (banda sonora d'a cinta Saturday Night Fever, que tamién protagonizaba John Travolta). Una d'as cancions incluyidas en a banda sonora, Hopeless Devoted to You, interpretada por Olivia Newton-John y con letra y musica de John Farrar, estió nominada a l'Oscar a la Millor Canción Orichinal y a lo Globo d'Oro a la Millor Canción; y una atra canción, Grease, de Barry Gibb, interpretada por Frankie Valli, estió tamién nominada a lo Globo d'Oro a la Millor Canción. A canción You're the One That I Want s'engueró como un disco sencillo antes mesmo d'enguerar-se la cinta y se convertió a escape en un exito de vendas encara que la cinta no s'heba pas enguerau encara ni ista canción amaneixeba en a versión teatral anterior.

En o Reino Uniu, os dúos interpretaus por a parella Travolta/Newton-John, You're the One That I Want y Summer Nights fuoron numero 1 en vendas, y en 2018 encara se trobaban entre los 20 discos sencillos mas vendius de toz os tiempos, en as posicions 5 y 28, respectivament, y Grease, cantada por Frank Valli y que da lo suyo nombre a la cinta, tamién estió numero 1 en o Reino Uniu.

A canción Look at Me, I'm Sandra Dee, en a suya versión teatral orichinal, mencionaba a l'actor Sal Mineo, pero en haber estau asasinau a cultradas en 1976, s'optó por cambiar-lo enta Elvis Presley; curiosament, a escena a on se canta ista canción se filmó o 16 d'agosto de 1977, coincidindo exactament con a calendata d'a muerte d'Elvis. Sí que amanixen en a versión orichinal en os escenarios as referencias a Troy Donohue, Doris Day, Rock Hudson y Annette Funicello.

Belunas d'as cancions que amanixen en o disco no yeran presents en a cinta. As cancions que son en a cinta pero no en o disco d'a banda sonora son La Bamba, de Ritchie Valens, Whole Lotta Shakin' Goin' On, de Jerry Lee Lewis, Alma Mater, Alma Mater Parody y Rydell Fight Song. Antiparte, Alone at a Drive-in Movie (Instrumental), Mooning y Freddy My Love no se troban presents en la cinta, encara que las tres amanixen en los creditos finals amás d'estar en a banda sonora. De feuto, tanto Mooning como Rock'n'Roll Party Queen (ista zaguera finalment sí ye en a cinta, como musica ambiental) yeran escritas en o musical orichinal ta un personache, Roger, que fue eliminau en l'adaptación cinematografica d'o guión y a qui substituyoron por o nuevo personache de Putzie, que no canta garra canción en a cinta. En cheneral, todas as cancions d'o musical orichinal que no cantan os personaches de Danny, Rizzo, Sandy, Johnny Casino u l'Ánchel d'a guarda se suprimioron en a versión cinematografica u s'adaptoron ta que las cantasen otros personaches, como s'escaició con as cancions que en o teatro cantaban Marty Maraschino (canción Freddy My Love, suprimida), Kenickie (canción Greased Lightnin', interpretada por Danny Rizzo), Doody (canción Those Magic Changes, interpretada por Johnny Casino).

As cancions que se cantan en a cinta son, por orden d'aparición:

Numero	Títol	Cantaire
1	Love Is a Many-Splendored Thing
2	Grease	Frank Valli
3	Alma Mater
4	Summer Nights	Danny, Sandy, as Pink Ladies y os T-Birds
5	Rydell Fight Song	Rydell Marching Band
6	Look at Me, I'm Sandra Dee	Rizzo y as Pink Ladies
7	Hopelessly Devoted to You	Sandy
8	Greased Lightnin'	Danny y os T-Birds
9	La Bamba	Ritchie Valens
10	It's Raining on Prom Night
11	Whole Lotta Shakin' Goin' On
12	Beauty School Dropout	Ánchel d'a guarda y ánchels femenins
13	Rock n' Roll Party Queen
14	Rock and Roll Is Here to Stay
15	Those Magic Changes	Johnny Casino & The Gamblers
16	Tears on My Pillow"	Johnny Casino & The Gamblers
17	Hound Dog	Johnny Casino & The Gamblers
18	Born to Hand Jive	Johnny Casino & The Gamblers
19	Blue Moon	Johnny Casino & The Gamblers
20	Sandy	Danny
21	There are Worse Things I Could Do	Rizzo
22	Look at Me, I'm Sandra Dee (repetición)	Sandy
23	Alma Mater Parody	Instrumental
24	You're the One That I Want	Danny, Sandy, as Pink Ladies y os T-Birds
25	We Go Together	Todo l'elenco
26	Grease (repetición)

Producción

O director d'a cinta, Randal Kleiser, fació fundos cambios respecto de l'obra orichinal, estando-ne lo principal o cambio d'o secenario a on se desembolica la historia: orichinalment se desembolicaba en os suburbios de Chicago, en Illinois, pero Klaiser prefirió ambientar-la en un puesto menos urbano, coincidindo con a suya propia experiencia vital como adolescent en os suburbios de Philadelphia. Tanimientres, o director no teneba pas guaire control sobre los aspectos musicals d'a cinta dica lo punto que se descartó la selección musical que heba encargau a Charles Fox y Paul Williams ta substituyir-la a zaguera hora por una atra que encargoron Robert Stigwood y Allan Carr a Barry Gibb, cosa que molestó muito a Kleiser.

Casting

John Travolta ya heba treballau ta Stigwood en a cinta Saturday Night Fever y ya heba colocau a suya canción Let Her In entre las diez cancions mas vendidas, amás d'haber interpretau lo papel de Doody en una producción itinerant d'una adaptación teatral d'o musical. Fació recomendacions de casting que en zagueras Stigwwod acceptó: la elección de Kleiser como director (Kleiser no ehba dirichiu mai una cinta, encara que si heba dirichiu a Travolta en o telefilm The Boy in the Plastic Bubble en 1976); y la elección d'Olivia Newton-John como parella d'o protagonista, Sandy. Olivia yera alavez una cantant de musica pop y musica country que ya heba ganau bels premios como cantant pero que dica l'inte no heba treballau so que en dos cintas, Funny Things Happen Down Under (un musical australo-neozelandés de 1965 dirichiu por Joe McCormick) y Toomorrow (un musical de ciencia-ficción britanico dirichiu por Val Guest en 1970). Antes d'acceptar o papel, Olivia solicitó fer una preba de pantalla ta evitar un atro fracaso en a suya carrera. La preba se fació con a escena de l'autocine y Olivia, naixida d'Anglaterra y que heba viviu siempre en Australia, no estió capable de dar a lo suyo personache un accento estausunidense adecuau, asinas que se reescribió lo guión ta que lo suyo personache se convertise en australiano. Antes de decidir-se por Olivia Newton-John Stigwood heba pensau en atras actrices, como Carrie Fisher, Ann-Margret, Deborah Raffin, Susan Dey y Marie Osmond; Marie Osmond cuasi acceptó lo papel pero renunció en parar cuenta d'a rebeldía final d'o personache de Sandy y decidió millor protagonizar Goin' Coconuts (1978, Howard Morris). En rematar la cinta, Olivia fació una transformación similar a la d'o suyo personache en a cinta, en apareixer en o suyo siguient disco, Totally Hot, como muito mas sexual y orientau enta la musica pop, amanixendo en a portada d'o disco con o pelo revuelto y un vestiu de cuero alto u baixo similar a lo que fa servir en a escena final d'a cinta.

Lucie Arnaz fació una audición ta lo papel de Rizzo, pero finalment esleyoron a Stockard Channing, de qui Carr yera representant, encara que ya feba belas anyadas d'o suyo zaguer papel important en o cine con o suyo debut en The Fortune (1975, Mike Nichols). Con 33 anyadas, yera lo miembro de l'elenco de mayor edat en interpretar a una estudiant de segundaria, y Kleiser fació que ella y los atros actors que interpretaban a estudiants fesen una "preba de patas de gallo" ta veyer si podeban pasar por mas chóvens en os primers planos. Se fació servir un enfoque mas suau en belluns d'os rostros d'os actors de mas edat.

Henry Winkler revutó lo papel de Danny Zuko en temer estar encasillau como un greaser dimpués de haber interpretau un papel similar de greaser malo, Arthur Fonzarelli, en a serie de televisión Happy Days dende 1974. Winkler posteriorment se repentió d'ixa decisión.

Ta lo papel de l'Ánchel d'a guarda en primeras s'heba pensau en Elvis Presley, pero morió antes d'o rodache. Se pensó tamién en Donny Osmond, chirmán de Marie Osmond con qui formaba dúo, y tamién s'ufrió lo papel a Frankie Valli, a qui se li ufrió u bien estar l'ánchel u bien estar o cantant d'o tema, y esleyó d'estar o cantant, estando finalment Frankie Avalon qui interpretó a l'ánchel.

Jeff Conaway interpretaba a Kenickie Murdoch; mesmo que Travolta, heba actuau en a versión teatral de Grease y mesmo heba interpretau o papel de Danny Zucco mientres a presentación inicial en os teatros de Broadway. Teneba que interpretar a canción central d'o suyo personache, Greased Lightnin' pero finalment Travolta deseyeba estar él qui la cantase y la suya influencia yera muit superior a la de Conaway. Jamie Donnelly heba interpretau o personache de Jan en os teatros de Broadway y tornó a interpretar-la en a cinta, estando ella la sola miembro de l'elenco orichinal que repitió lo suyo papel en a cinta. Los suyos cabellos en ixas envuentas ya heben principiau a blanquiar y tenió que tenyir-los t'acomodar-se a lo suyo personache. Kelly Ward ya heba actuau con un personache segundario sarcastico con Travolta y Kleiser en The Boy in the Plastic Bubble y l'esleyoron ta fer o papel de Putzie.

Ta lo papel de Tom Chisum yera previsto que l'interpretase l'actor Steven Ford (fillo de Gerald Ford), pero tenió un ataque de miedo escenico y albandonó. Pensoron en o chugador de béisbol Mark Fidrych pero amanixioron problemas d'achenda con a suyas actividaz esportivas y finalment se decidiron en o zaguer minuto por Lorenzo Lamas, qui tenió que decolorar o suyo cabello ta que no se li confundise con un d'os T-Birds.

Ta lo papel d'o entrenador Calhoun se pensó en primeras en a estrela de cine pornografico Harry Reems pero los executivos d'a Paramount Pictures lo rebuyoron en considerar que la suya reputación d'estrela pornografica perchudicase la taquilla, mas que mas en o conservador sud d'Estaus Unius, y los productors esleyoron alavez a Sid Caesar. Caesar ye un d'os actors veterans procedents d'o mundo d'a televisión d'os anyos 1950 que amanixen en a cinta en papels segundarios, con Eve Arden, Frankie Avalon, Joan Blondell, Edd Byrnes, Alice Ghostley y Dody Goodman. Ta lo papel de director de l'instituto se pensó en Paul Lynde, pero finalment se decidioron por Eve Arden.

Rodache

A escena d'ubertura d'a cinta se rodó en a placha d'o Leo Carrillo State Park en Malibu (California), o mesmo puesto exactament a on s'heban filmau as escenas d'amor en a placha en From Here to Eternity (1953, Fred Zinnemann) entre Burt Lancaster y Deborah Kerr, en un claro homenache. As escenas exteriors de l'instituto Rydell se filmoron en a Venice High School d'o barrio de Venice, en Los Angeles, mientres o verano de 1977. As escenas interiors de Rydell estan rodadas en a Huntington Park High School, tamién en Los Angeles, y la fiesta de pichamas se filmó en una casa privada en o barrio d'East Hollywood. Bels numeros musicals están filmaus en os estudios d'a Paramount y las correspondients a l'autocine, en o Burbank Pickwick Drive-In, hue espaldau y substituyiu por un centro comercial. La carrera d'autos ye rodada en o río Los Angeles, un río iconico que amanixe en cuantas cintas. Ta la escena final d'a cinta, se rodó en a John Marshall High School y tamién bellas atras escenas en o Hazard Park, estando situaus toz ixos puestos en a ciudat de Los Angeles.

Postproducción

En as escenas en o Frosty Palace se veyen clarament cartels de Coca-Cola con un obvio desenfoque. Antes de l'enguero d'a cinta, lo productor Allan Carr heba sinyau un alcuerdo d'emplazamiento de producto con o principal competidor d'ixa companyía, Pepsi, y cuan Carr veyó ixa escena exichió a lo director Randal Kleiser que la tornase a grabar con productos de Pepsi u que borrase os logotipos de Coca-Cola. En considerar-se que costaba muito tiempo y diners tornar a rodar ixas escenas s'optó por o borrau, pero en una gran fresquera roya no n'estió posible por complexidaz tecnicas y iste se dixó. Seguntes Kleiser, "nomás tenebamos que asperar que Pepsi no se queixase. No lo facioron".

Por una error de producción, a escena final a on Danny Zucco y Sandy Olsson se besan fue eliminada d'a versión final d'a cinta y se perdió antes de l'enguero comercial. Nomás se conservaba que un metrache en blanco y negro y Kleiser prebó de coloriar y restaurar o metrache existent ta l'enguero, pero no estió posible y finalment s'eliminó d'a versión definitiva; Kleiser ha manifestau que deseya fer una nueva preba ta coloriar-lo ta adhibir-la a la edición especial d'o 50^eno cabo d'anyo d'a cinta, que s'escayecerá en 2028.

Enguero

Codas en Amsterdam (Países Baixos) ta acceder en un cine a on se prochectaba Grease.

Grease s'engueró en cines d'Estaus Unius o 16 de chunio de 1978 convertindo-se ascape en un exito de taquilla con un recaudo en o suyo primer fin de semana en as carteleras de 8,941.717 dólars, estando la segunda cinta por o recaudo nomás dezaga que de Jaws 2; tanimientres, lo siguient cabo de semana sí que n'estió la primera, con un recaudo de 7,867.000 dólars, con un récord absoluto en os suyos primers 19 días con un recaudo de 40,272.000 dólars. A los 66 días, heba plegau en un recaudo de mas de 100 millons de dólars convertindo-se en la segunda cinta con mas recaudo de Paramount Pictures dezaga de The Godfather plegando a la fin a un recaudo de 132,472.560 dólars y convertindo-se en la cinta con un recaudo mas gran de l'anyo 1978.

Arredol d'o mundo la cinta se convertió en un fenomeno de masas y se convertió en lo musical con mas recaudo d'a historia con una taquilla total de 341 millons de dólars superando lo récord que teneba The Sound of Music dende l'anyo 1965, ye decir, 13 anyadas antes. En o Reino Uniu tenió un recaudo de 2,2 millons de dólars en os suyos primers 8 días d'exhibición y remató en batir o récord de recaudo d'o país, con un recaudo total de 14,7 millons de libras esterlinas.

En mayo de 1979 se tornó a exhibir en cines d'enguero en Estaus Unius y Canadá y tornó a batir récords, con un recaudo de 4,5 millons de dólars en o suyo primer cabo de semana. Mientres cuatro semanas se prochectó en solitario y dimpués se fació una sesión combinada con Saturday Night Fever dica finals de chunio. En ista segunda ronda superó a The Godfather como la cinta con mas recaudo de Paramount Pictures. En marzo de 1998 se tornó a fer una tercera ronda de procheccions por o suyo 20^eno cabo d'anyo, con un recaudo de 28 millons de dólars en Estaus Unius y Canadá.

Dica 2012 Grease estió lo musical con mas recaudo d'o mundo, cuan lo superó Les Misérables (2012, Tom Hooper) y en Estaus Unius lo suyo récord no se superó dica 2017, cuan lo fació Beauty and the Beast (2017, Bill Condon). En descontando la inflación, Grease ye encara la setena cinta musical por a suya taquilla mundial.

En o suyo 40^eno cab d'anyo se fació una reedición especial de cabo d'anyo con un recaudo d'1 millón de dólars. Dica hue, Grease ha racaudau cuasi 200 millons de dólars en Estaus Unius y una mica mas de 200 millons en o resto d'o mundo. En agosto de 2022, dimpués d'a muerte d'Olivia Newton-John, se fació una exhibición especial en a suya honor en bellos cines d'a cadena AMC Theatres en Estaus Unius, con un pre d'1 dólar, en destinando los beneficios a la investigación sobre lo cáncer de mama. Una acción similar se fació en o Reino Uniu en ixe mesmo mes d'agosto, con un pre d'1 libra esterlina, y los suyos beneficios se destinoron a la Macmillan Cancer Support.

Criticas

A critica cinematografica ye practicament unanime en considerar muit favorablement Grease, habendo muitos criticos que consideroron que se tracta a lo menos d'una d'as millors cintas de 1978.

Vincent Canby, d'o The New York Times, calificó la cinta como:

...muit divertida (...) ...fantasía contemporania sobre un musical d'adolescents d'os anyos 1950, mas gran, divertiu, inchenioso y imachinativo que cualsiquier atra cinta de Hollywood (...) una mica como Close Encounters of the Third Kind, que remera las cintas de cine de ciencia-ficción d'os anyos 1950 d'una manera mas elegant que cualsiquier atro treballo anterior, Grease ye una evocación multimillonaria d'as cintas de serie B que produciba Sam Katzman en os anyos 1950 (Don't Knock the Rock, 1953) y que continó l'American International Pictures en os anyos 1960 (Beach Party, 1963)

Vincent Canby

Gene Siskel en o Chicago Tribune li daba a Grease tres estelas sobre cuatre:

...emocionant nomás que cuan John Travolta ye en a pantalla (...) cuatro d'os suyos numeros musicals son chenuinament sensacionals y cal aplaudir-los

Gene Siskel

En Variety elochioron "la suya animada coreografía y la excelent musica nueva y esviellada" y consideroron que Travolta y Newton-John "encaixan prou bien entre els dos".

Tanimientres, Charles Champlin en Los Angeles Times fació una critica negativa:

No veyiei Grease en o teatro, pero seguntes o testimonio d'ista cinta estrident, desendrezada, poco atractiva, s'amuestran os anyos 1950 -fácil que a zaguer decada inocent que se nos permite- reproducius a traviés d'una conciencia grotescament distorsionada d'os anyos 1970

Charles Champlin

Gary Arnold en The Washington Post tamién fació una critica negativa:

A tamas d'os obvios intentos de remerar partes d'os musicals de Stanley Donen u d'Elvis Presley u de Frankie y Annette, l'esprito ye mas amanau d'a Nueva Insensatez exemplificada por Ken Russell, menos l'habilidat visual y l'estilo de Russell... Mai no hei visto un musical a gran escala tan charoso

Gary Arnold

David Ansen escribió en Newsweek:

Con masiada freqcuencia, Grease ye simplament mediocre, plena d'un amplo humor de segundaria, escenas dramaticas planas y un ritmo letarchico. Afortunadament John Travolta no tien cosa de plano... Travolta no puet dominar ista cinta como lo fació en Fever pero cuan él ye en a pantalla no puez veyer cosa mas

David Ansen

Adrián Massanet, en Espinof, comenta que:

..una d'as cintas musicals mas famosas d'as zagueras decadas (...) que nomás se mantiene en a memoria gracias a una mezcla de nostalchia cinefila que todo lo maquilla y a l'aprecio que toz podemos sentir por ixe tipo de cintas que, sin estar realment importants ni poseyer masiadas virtuz, son prou solidas a livel narrativo (a tamas d'o basico d'a suya puesta en escena) y mai no se prenen en serio a sí mesmas (...) puet estar que por ixo sía un divertimento tan gaudible

Adrián Massanet

Premios

Premio	Calendata	Edición	Categoría	Premiau	Notas
Premios Oscar	1979	51ena edición	Nominada a l'Oscar a la Millor Canción Orichinal	Hopelessly Devoted to You Letra y musica: John Farrar
Premios Globos d'Oro	1979	36ena edición	Nominada a lo Globo d'Oro a la Millor Cinta de Musical u Comedia	Grease
	1979	36ena edición	Nominada a lo Globo d'Oro a la Millor Actriz de Musical u Comedia	Olivia Newton-John
	1979	36ena edición	Nominado a lo Globo d'Oro a lo Millor Actor de Musical u Comedia	John Travolta
	1979	36ena edición	Nominada a lo Globo d'Oro a la Millor Canción	Grease, de Barry Gibb
	1979	36ena edición		You're the One That I Want, de John Farrar
Premios Goldene Leinwand	1979		Goldene Leinwand	Grease
Premios Jupiter	1979	1a edición	Nominau a lo Jupiter a lo Millor Actor	John Travolta
	1979	1a edición	Nominada a lo Jupiter a la Millor Actriz	Olivia Newton-John
Premios People's Choice	1979	5ena edición	People's Choice a la Millor Cinta	Grease
	1979	5ena edición	People's Choice a la Millor Cinta Musical	Grease
	1979	5ena edición	Nominau a lo People's Choice a lo Millor Actor en Cinta Musical	John Travolta
	1979	5ena edición	People's Choice a la Millor Actriz en Cinta Musical	Olivia Newton-John
	1979	5ena edición	People's Choice a la Millor Actriz Segundaria	Stockard Channing

Antiparte, l'American Film Institute ha incluyiu a Grease en tres d'as suyas listas:

• AFI's 100 Years...100 Passions, en a posición 97.
• AFI's 100 Years...100 Songs, en a posición 70, ta la canción Summer Nights.
• AFI's Greatest Movie Musicals, en a posición 20.

Se veiga tamién

• Cine en 1978.
• Cintas de 1978.

Vinclos externos

• Se veigan as imáchens de Commons sobre Grease.
• (en) Grease en Internet Movie Database.
• (en) Grease en TCM Movie Database.
• (en) Grease en AllMovie.
• (en) Grease en Box Office Mojo.
• (en) Grease en Rotten Tomatoes.
• (en) Grease en Metacritic.
• (en) / (es) Grease en FilmAffinity.
• (en) Grease en l'American Film Institute Catalog de l'American Film Institute.
• (fr) Grease en Allociné.