Río Lopín

O río Lopín ye un chiquet río d'as provincias de Zaragoza y de Teruel, que ye afluent d'o río Ebro por a suya marguin dreita. Naixe en o Manantial de Codo en a mesma localidat de Codo.

Riega os termins municipals de Codo, Belchit, Almochuel, Quinto, Zaila y La Zaida. Entre Quinto y Zaila fa de muga entre as provincias de Zaragoza y Teruel.

Desemboca cerca de La Zaida, directament sobre o cauz d'o río Ebro (no como o suyo vecín río lo Chiner), estando catalogada sin d'embargo como intercuenca diseminada de l'Ebro por a Confederación Hidrografica de l'Ebro, feito considerato por o difuso primer tramo d'o Lopín que ye canalizato por as ceicas y conduccions d'o regano de Codo y Belchit.

Gran parti d'os campos que fan ribera con o Lopín son secanos, principalment en o suyo tramo medio y final, exceptuando os d'o tramo inicial y os que bi ha a poquetz metros antis d'a suya desembocadura.

Cheomorfolochía

O Lopín desemboca en o cauz d'o río Ebro, debant d'una mechana de l'Ebro dita en a cartografía como Finca de Cierros, auguas debaixo d'o parache conoixito como Casa de las Norias. Ista mechana ye mantenida por a existencia d'un azute de construcción documentata en 1850, anque debió seguir un trazato anterior. Asinas, l'azute daría uso a un antigo molín, deixato en desuso durant o sieglo XX, que dió paso a una chiqueta central hidroelectrica, actualment operativa.

Toponimia

O hidronimo Lopín ye muito interesant, ya que Lopín puet querer dicir río lo pin, estando un probable caso de fosilización de l'articlo definito aragonés.

Vinclos externos

• (es) Intercuencas diseminadas del Ebro. Ríos Ginel y Lopín (C. H. E.)