Ernst Kaltenbrunner

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Ernst Kaltenbrunner
Ernst Kaltenbrunner en os Chudicios de Nuremberg
Director d'a Oficina Central de Seguridat d'o Reich
30 de chinero de 1943 – 12 de mayo de 1945
President	Adolf Hitler
Precediu por	Reinhard Heydrich / Heinrich Himmler
Succediu por	Dengún
President d'a Interpol
30 de chinero de 1943 – 12 de mayo de 1945
Precediu por	Arthur Nebe
Succediu por	Florent Louwage
Naiximiento	4 d'octubre de 1903 Ried im Innkreis (Imperio Austrohongaro, hue Alta Austria, Austria)
Muerte	16 d'octubre de 1946 Nürnberg (Bavera, Alemanya)
Partiu	Nationalsozialistische Deutsche Arbeiterpartei
Conchuche	Elisabeth Eder
Profesión	Politico y avogau
Relichión	Catolico

Ernst Kaltenbrunner, naixito de Ried im Innkreis (Imperio Austrohongaro, hue Alta Austria, Austria) o 4 d'octubre de 1903 y muerto executato o 16 d'octubre de 1946 en Nuremberg (Bavera, Alemanya) dimpués d'os Chudicios de Nuremberg, estió un avogau y politico austriaco con una important participación en o Tercer Reich alemán dimpués d'o Anschluss, en estar miembro d'as Schutzstaffel (u SS), con o ran de cheneral, y chefe d'a Gestapo, a prencipal organización policial d'o Tercer Reich.

Primeras anyadas

Heinrich Himmler, Ernst Kaltenbrunner, August Eigruber, Franz Ziereis y Georg Bachmayer vesitando o campo de concentración de Mauthausen-Gusen en 1941.

Kaltenbrunner, que yera orichinario d'a mesma rechión d'Austria que Adolf Hitler, fació estudios de Dreito en a Universidat de Graz, en militando en ixas envueltas en grupos paramilitars austriacos partidarios de l'anexión d'Austria por Alemanya. Asinas, en 1930 se fació militant d'o Nationalsozialistische Deutsche Arbeiterpartei y en 1931 d'as Schutzstaffel. Encara que antis d'o Anschluss yera nomás un informador en Austria d'o chefe d'as SS, Heinrich Himmler, Kaltenbrunner puyó a escape en a hierarquía nazi austriaca, y en 1934 fue engarcholato por as suyas actividaz por o Gubierno austriaco d'Engelbert Dollfuss, acusato d'alta traiduría, estando luego condenato a seis meses de garchola.

Dimpués d'o Anschluss

Dimpués d'o Anschluss, l'anexión d'Austria por o Tercer Reich, Himmler nombró a Kaltenbrunner chefe d'as Schutzstaffel en l'antigo territorio austriaco.

En a guerra

Dimpués de prencipiar a Segunda Guerra Mundial, o 30 de chinero de 1943, Kaltenbrunner fue nombrato chefe d'o Sicherheitsdienst u SD, o servicio d'información d'o Nationalsozialistische Deutsche Arbeiterpartei, establito en 1931 por Reinhard Heydrich, y tamién fue nombrato chefe d'a Reichssicherheitshauptamt u RSHA, a Policía de Seguredat alemana, substituyindo-ie a Heinrich Himmler, que asumiba ixas funcions dende l'asasinato de Reinhard Heydrich por a Resistencia checoslovaca en 1942 en Praga.

Teneba asinas a la suyas órdens a os Einsatzgruppen, responsables de mas de 600.000 asasinatos en a retraguarda d'o Frente Oriental, y tamién a la Gestapo.

O 20 de chulio de 1944, cuan l'atentato contra Hitler feito por Claus von Stauffenberg, Kaltenbrunner estió o investigador y responsable d'as detencions y execucions d'os conspiradors.

Final d'a guerra

Ernst Kaltenbrunner en os Chudicios de Nuremberg.

En os zaguers días d'a Segunda Guerra Mundial, os treballadors de Viena facioron una sublevación contra o Tercer Reich antis de dentrar en a ciudat l'Exercito Royo sovietico, y Hitler bi ninvió a Kaltenbrunner ta esclafar-la, encara que os sovieticos prenioron a ciudat antis de que Kaltenbrunner bi plegase. Ernst Kaltenbrunner decidió no tornar ta Berlín, que yera ya en plena batalla de Berlín, y partió ta os Alpes de Bavera, a on se deciba que as Schutzstaffel farían a zaguera resistencia a os Aliaus.

Feito preso en Alt-Aussee por l'Exercito britanico o 15 de mayo de 1945, fue ninviato a o Reino Uniu ta ser interrogato, estando acusato en os Chudicios de Nuremberg de crimens de guerra y crimens contra a humanidat. Kaltenbrunner bi negó toda responsabilidat, negando mesmo que a suya firma en os documentos fuese autentica. Sin d'embago, as fotografías d'o catalán Francisco Boix estioron decisivas ta contrimostrar as suyas vesitas a o campo de concentración de Mauthausen-Gusen. Condenato a muerte, fue enforcato o 16 d'octubre de 1946 en Nürnberg.

Vinclos externos

• Se veigan as imáchens de Commons sobre Ernst Kaltenbrunner.
• (en) Acta de l'acusación contra Ernst Kaltenbrunner en os Chudicios de Nuremberg.

• Datos: Q78473
• Multimedia: Ernst Kaltenbrunner / Q78473