Crassulaceae

De Biquipedia
Ir ta: navego, busca
Crassulaceae
Crassula ovata + Florero.jpg
Crassula ovata. Posiblement, una d'as crasulacias más difunditas como planta ornamental.
Denominacions populars
Crasulacias
Clasificación scientifica
Dominio:
Eukaryota
Reino:
Plantae
División:
Magnoliophyta
Clase:
Magnoliopsida
Orden:
Saxifragales
Familia:
Crassulaceae
Descripción
Crassulaceae
J. St.-Hil., 1805

As crasulacias (scientificament, en latín, Crassulaceae (J. St.-Hil., 1805)) son una familia de plantas crasas en a orden d'as Saxifragales. Bi n'ha bellas 1300 especies, clasificatas en 48 cheneros,[1] anque, como a sobén pasa en Taxonomía botanica, istas cifras pueden variar seguntes as fuents y os autors.

Descripción[editar | editar código]

As crasulacias son normalment plantas herbacias u sub-arbustivas. As fuellas son simples, con disposición variable en o trallo; bi n'ha especies alternifolias, de fuellas oposatas u que forman qualque roseta basal. Una caracteristica universal de todas as crasulacias (anque no exclusiva d'ellas) son as fuellas crasas, adaptación a hábitatz secos, a on que os eixemplos d'a familia i son más abundants.

As flors son hermafroditas, con verticilos pentamers, tretramers u multimerals. L'androceu ye fusionau con o chineceu en a base, os estambres, en o mesmo numero que a resta de verticilos, tipicament subresurten un poquet por alto d'a corola (son más largos que os petalos). O chineceu ye supero, a sobén con carpelos libres u soldaus solament que por a suya base. As flors son quasi siempre agrupatas en inflorescencias de tipo cimoso.

Metabolismo CAM[editar | editar código]

Una caracteristica fundamental d'as crasulacias, que se considera una innovación evolutiva d'ista familia que podría (d'alcuerdo con bells autors) haber facilitau o suyo exito ecolochico, ye o metabolismo que tienen. As crasulacias son plantas CAM, sigla que significa Crassulaceae Acid Metabolism - Metabolismo Acido d'as Crasulacias en anglés. O metabolismo CAM en as plantas se caracteriza porque tienen o ciclo fotosintetico deseparau en dos fases, una fase luminica (fase fototrofa) que fan en presencia de luz, y unatra fusca (fase sintetica), que fan de nueitz. Isto ye por contra de como lo fan a resta d'organismos fotosinteticos, que tienen totz os pasos d'o ciclo simultanios.

Se considera que o metabolismo CAM ye una adaptación a os climas aridos, pus minimiza las perdas d'humedat, tot garantido que a planta no tiene que ubrir os estomas y intercambear gases con l'atmosfera sique de nueitz, quan a temperatura y sequedat y por tanto a evaporación de l'augua ye menor.

Gracias a iste tipo de metabolismo, qualques especies de plantas crasulacias pueden colonizar biotopos que estarían masiau inhospitos ta belatros grupos de vechetals. O metabolismo CAM, por contra, ye menos eficient que os metabolismos fotosinteticos convencionals, por a qual cosa as crasulacias son de regular menos productivas en biomasa que os atros grupos de plantas, y se troban en desavantalla ecolochica contra ellas siempre que as condicions no sían restrictivas en quanto a humedat.

Clasificación[editar | editar código]

Sedum spp.. O chenero Sedum ye un d'es que se puede trobar, de forma natural, en Europa, a on que i amaneix quasi siempre colonizando biotopos petrosos.

Como muitas vegadas pasa en Biolochía, a clasificación d'os diferents sub-clados de Crassulaceae ye firmement discutida por diferents autors, que sostienen diferents tiorías sobre cómo habrían d'estar clasificadas istas plantas. A solideza d'a familia biolochica, manimenos, ha quedau demostrada con os estudios de chenetica molecular,[2] y o que se disputa ye solament o numero d'especies, cheneros y sub-familias que concabe.

Una d'as clasificacions clasicas, a de Berger de 1930, comprendeba la sub-división d'ista familia en 6 sub-familias y 35 cheneros.[2] Istas sub-familias yeran Crassuloideae, Kalanchoideae, Cotyledonoideae, Sempervivoideae, Sedoideae y Echeveroideae.[3] A dita clasificación de Berger ha estau muit discutida, pero s'ha considerau a de referencia mientres buena cosa d'o sieglo XX. De todas ixas sub-familias, nomás Crassuloideae, Kalanchoideae y Sempervivoideae s'han manteniu por belatros autors, y solament de Crassuloideae se'n tiene certeza en a necesidat de mantener-la en todas as clasificacions que s'ha feito.[2]

Cheneros[editar | editar código]

Referencias[editar | editar código]

  1. (en) Crassulaceae en The Plant List, consultau o 27 d'octubre de 2015.
  2. 2,0 2,1 2,2 (en) American Journal of Botany 88(1): 76–91. 2001.
  3. (es) Estudios sistemáticos en el clado Acre (Crassulaceae), consultau o 27 d'octubre de 2015.

Se veiga tamién[editar | editar código]

Vinclos externos[editar | editar código]