Verticilo

De Biquipedia
Ir a la navegación Ir a la búsqueda
A Rubia peregrina, una hierba común en Aragón que presenta fuellas agrupadas en verticilos muit evidents.

En Botanica, un verticilo ye una agrupación de tres u más fuellas que amaneixen chuntas en un mesmo plano perpendicular a o tallo. Os verticilos se troban siempre asociaus a un nyudo en o tallo, y o tallo alavetz deseparau en nyudos y entrenyudos.

No todas as plantas tienen as fuellas distribuidas en verticilos, y existen atras disposicions alternativas; como as fuellas alternas, fuellas oposadas y as fuellas en roseta.

Verticilos foliars[editar | editar código]

Pa las fuellas, a organización (filotaxi) en verticilos ye minoritaria en a Naturaleza. Entre as anchiospermas se tracta d'una innovación en a organización corporal de qualques táxons terminals, asobén secundaria a atras formas organizativas como a disposición espiral, por o que puede inferir-se que ye un caracter evolucionau a partir d'ella.[1]

Manimenos, entre bells grupos de plantas primitivas a organización verticilar d'as fuellas ye curiosament a norma. Isto pasa por eixemplo con as «codas de caballo» (familia Echisetidae), un d'os grupos más primitivos entre as plantas vasculars que tienen o cormo organizau en nyudos y entrenyudos y as fuellas, chusto, en verticilos.

Verticilos florals[editar | editar código]

En as flors, o verticilo se considera una adquisición secundaria que permite estabilizar o numero de piezas florals[1] (as flors en espiral pueden tener numeros variables de piezas de cada tipo, mesmo entre una mesma especie). As ditas piezas florals son efectivament fuellas modificadas que yeran primitivament en una filotaxi espiralar, a la manera como i son as escratas d'una pinya.

Seguntes a tioría predominant, as piezas d'una flor espiral (forma plesiomorfica) s'habrían trestallau en diferents verticilos de tres piezas. Contino, modificacions lievón a un verticilo composau lo más asobén de tres a cinco piezas florals[1], que ye como se troba huei en a mayoría de grupos vechetals (formas apomorficas). As familias d'as ranunculacias y as poligonacias refirmarían ixa evolución encadenada.

Manimenos, a naturaleza plesiomorfica d'ixa disposición espiral (en comparanza con a disposición verticilar) ye debatida en l'actualidat.[2] Por o metodo filochenetico d'a reconstrucción d'os estaus ancestrals, qualques investigadors fízon en 2017 o retrato robot de l'ancestro común más antigo[3] de todas as flors, de fa 140 millons d'anyos, y s'asevera que fue una flor hermafrodita en a qual a mayoría de piezas florals i son insertadas en disposición trimerica (multiplo de tres), pero se i combinan dos filotaxis: perianto y androceu verticilaus, chineceu espiralau. Ista zaguer reconstrucción contradiría la tioría d'o botanico estatounitense Charles Edwin Bessey que suchiere que as anchiospermas son un grupo monofiletico, a on que as flors derivan d'una flor primitiva tipo Magnolia, en a qual as piezas florals i son insertadas de forma espiral.[4]

Aquí a denominación d'os verticilos florals:

Se veiga tamién[editar | editar código]

Referencias[editar | editar código]

  1. 1,0 1,1 1,2 (en) Wang P, Liao H, Zhang W et al (2015) Flexibility in the structure of spiral flowers and its underlying mechanisms. Nat Plants 2:15188
  2. (en) Endress PK, Doyle JA (2015) Ancestral traits and specializations in the flowers of the basal grade of living angiosperms. Taxon 64:1093–1116
  3. (en) Short video of the 3D model of the reconstructed ancestral flower
  4. (en) SAQUET, Hervé et al.; «The ancestral flower of angiosperms and its early diversification». Nature communicatios, Num. 16047. vol. 8. DOI 10.1038/ncomms16047