Comunidat d'aldeyas

De Biquipedia
(Reendrezato dende Comunidatz aragonesas)
Ir a la navegación Ir a la búsqueda

La comunidat d'aldeyas ye una institución medieval que consistiba en una agrupación de las aldeyas arredol d'una ciudat u villa, prenendo-ne lo nombre.

Empecipioron a existir con Alifonso I lo Batallero, que veyendo cara la compensación a los nombres con tenencias a cambio d'aduyas militars, pensó que yera millor que los habitadors de las aldeyas reconquiestas en la estremadura fuesen los mesmos defensors d'ixa tierra.

Son caracters de las comunidatz medievals

  • No yeran senyorías
  • Ampla extensión territorial, cubrindo arias encara por poblar.
  • Fuero unico, con churisdicción civil y criminal.
  • Base común economico-social, agricola, ganadera, aproveitamiento de monts y pasturas, y defensa mutua. En las comunidatz de Teruel y Daroca l'asambleya pa la recaudación d'impuestos se diciba plega u plega cheneral.
  • División en sexmas u sesmas.

Las ilesias de las comunidatz yeran patrimonials. Alifonso I lo Batallero dió en lo Fuero de Calatayú a los habitadors de Calatayú y su tierra las rendas de las ilesias de lo suyo territorio. Tamién s'establió que lo clero heba d'estar autoctono, ye dicir las ilesias heban de ser servitas por fillos de la Comunidat, formando l'Arcedianato de Calatayú. Este modelo fue aplicato en las atras comunidatz.

Las quatro comunidatz que i heba en l'Aragón medieval estioron:

Las relacions entre la cabeza y la comunidat d'aldeyas en las quatre comunidatz d'Aragón estioron dificils por qüestión de churisdicción, y por diferents intreses economicos, y se distancioron cada vegata més.

Entre los habitants de las comunidatz d'aldeyas en Aragón quasi no bi heba nobles ni infanzons, a diferencia de las ciudatz. Los habitants de las aldeyas y de las suyas capitals teneban diferents orichens cheograficos y etnicos (aragoneses, vascos, ribers navarros, castellans, gascons, mozarabes, ecetra). Quan a población s'estabilizó los habitants d'estas comunidatz charraban un aragonés con influencia castellana u con caracters de parla de transición con lo castellán.

L'aproveitamiento común de selvas, defesas y pasturas estió una de las causas principals de la desforestación de lo Sistema Iberico en las comarcas de lo surueste d'Aragón, a diferencia de las senyorías, las arias controlatas por las ordens militars u en las que las selvas yeran de los propietarios de los mases.

La institución de la comunidat d'aldeyas entró en decadencia en lo sieglo XVIII, lo rei Felipe V redució las comunidatz d'aldeyas a corporacions sin dreitos politicos ni churidicos, mantenendo unicament funcions economicas. Un Reyal Decreto en 1837 suprimió la Comunidat de Daroca.[1]

En Castiella i heba una institución equivalent dita Comunidad de villa y tierra.

Referencias[editar | editar código]

  1. (es) María del Carmen Ansón Calvo: Azuara y su población según la fogueación de 1647. Revista de historia Jerónimo Zurita, ISSN 0044-5517, Nº 53-54, 1986, pachinas. 43-66

Bibliografía[editar | editar código]