Comunidat d'Albarracín
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
| Comunidat d'Albarracín | |
| Comunidat d'o Reino d'Aragón | |
| Entidat • Estato • País |
Comunidat Corona d'Aragón Reino d'Aragón
|
| Capital | No bi'n heba |
| Subdivisions | Sexma de Bronchales Sexma de Villar d'el Cobo Sexma de Fridas Sexma de Chabaloyas |
| Idioma oficial • Luenga propia |
Aragonés Aragonés d'as comunidaz aragonesas |
 En royo situación en as comunidaz aragonesas | |
A Comunidat d'Albarracín estió a cuarta y zaguera comunidat aragonesa. A creyó Pero III d'Aragón en o territorio d'a Sinyoría d'Albarracín dimpués de conquerir-la en o setio d'Albarracín y dar a categoría de ciudat a Albarracín, que enantes yera villa.
Historia
[editar | modificar o codigo]
En o sieglo XII se produce o paso d'Albarracín de mans musulmanas a cristianas. Mientres bels anyos serán os Azagra os que gubiernen a sinyoría dica 1284 cuan o rei Pero III d'Aragón decide adhibir-lo a os suyos territorios.
A partir d'o sieglo XIV, y a tamas d'as epidemias y a peste por as guerras contra Castiella, os concellos d'as aldeyas prencipian a fer-se cerenyos. Una vegada rematato o periodo de guerra se prenerán midas ta reconoixer os termins y patrimonio de cadaguna d'istas aldeyas, permitiendo a ciudat a bels lugars fer-se con a posesión de mas tierras ta os suyos pastos.
Ye a partir d'os sieglo XV cuan prencipia a reclamar-se dende bels concellos una mayor participación en o gubierno d'os afers comuns. A mesma monarquía promoverá l'autonomía d'as comunidaz d'aldeyas estando iste o periodo de mayor explendor d'Albarracín y a suya comunidat.
En 1598 Albarracín refusa os suyos propios fueros ta acceptar os Fueros Chenerals d'Aragón, feito que costó prous diners a las arcas d'a comunidat.
Mientres o sieglo XVII serán claus as finanzas y as guerras. A situación economica la marca a crisis cheneralizada a la que s'unen os impuestos ta as campanyas de guerra, a imposibilidat de devolver os ampres de diners y a fuerte presión fiscal. Toz istos feitos facioron que hese una important perdida de población.
As concordias y as sentencias arbitrals yeran chunto con as ordinacions d'as dos institucions a forma en que se resolveban os pleitos entre a Ciudat y a Tierra mientres os sieglos XVI y XVII. En 1689, debito a l'afan d'a comunidat por conseguir una mayor independencia plega o Privilechio de deseparación, que tamién costará prous diners a las arcas comunitarias.
Con a plegada d'os Borbons a o poder dimpués d'a Guerra de Succesión se cambea a organización territorial, estando a unidat administrativa basica o correchimiento en o que se troban tanto as aldeyas como a ciudat.
Mientres o sieglo XVIII as aldeyas van perdendo influencia politica debant d'a ciudat que s'adapta mas facilment a os nuevos tiempos.
Organización territorial
[editar | modificar o codigo]A organización yera parellana a la de la Comunidat de Teruel; as diecisiet aldeyas s'organizaban en cuatro sexmas:
Antimás d'istos lugars prencipals bi heba atros de menor entidat que se deciban barrios, masadas u granchas. Muitos d'istos lugars chicorrons como Guadalaviar, Griegos, Val Longuiello u Toril y Masegoso, plegarán a estar dimpués municipios, pero atros como Casas de Búcar, Arroyofrido u El Villarecho continan encara estando barrios.
O condominio de monts
[editar | modificar o codigo]O rei Carlos II atorgó o 27 d'agosto de 1689 un privilechio que permitió de constituir a cadaguna d'as aldeyas de la Comunidat d'Albarracín o suyo gubierno civil y municipal. Pa facilitar a execución d'este privilechio o 15 de mayo de 1691 s'atorgó escritura de concordia entre a comunidat d'aldeyas y a ciudat d'Albarracín. Se convinió que os terrenos u monts que no perteneixerían a los termins de garra aldeya y que yeran arredol de cada termin (as "mangas") seguisen comuns y con o nombre de Sierras Universales, con churisdicción conchunta y con un uso común[1].
Con as denominacions Sierras Universales, Universidad de Albarracín, Sierras y Montes Universales u Las Universidades de la ciudad y comunidad de Santa María de Albarracín se feba mención a un conchunto de tierras de pastura y selvas que perteneixeban a la Comunidat d'Albarracín como una universitas y no a una villa en concreto, y no teneba o significau orografico que actualment tiene lo toponimo actual Montes Universales en castellano local[2].
Organización politica
[editar | modificar o codigo]
Debant d'una comunidat d'aldeyas bi heba un procurador cheneral y un numero de rechidors que s'irá ixamplando dica plegar en cuatro, uno por sexma, esleitos cada anyata por sistema d'insaculación. L'organo colechiato que preneba las decisions d'especial importancia yera la pliega (como la plega d'atras comunidaz), a la que acudiban representants de las decisiet aldeyas y los ditos prohombres (personas destacatas).
As pliegas se feban en un edificio d'Albarracín que encara se conserva, y se dice Casa de la Comunidat d'Albarracín. Sin d'embargo, l'archivo d'ella se custodiaba en Tramacastiella, en do encara se puede consultar.
A ciudat d'Albarracín, d'atra man, se rechiba por oficials eslechitos cada anyo y entre os que yeran os cuatro oficios reyals u mayors: o chuez, l'alcalde primero, o mayordombre y o chuez segundario u padrón. Tamién se trigaban atros consellers y rechidors, toz éls participants d'o gubierno d'o concello d'a ciudat.
A unión entre as dos institucions, o concello d'a ciudat y a comunidat d'aldeyas, yera o Concello Cheneral de Ciudat y Tierra en que se tractaban afers d'intrés común. Amás o chuez s'encargaba tamién d'impartir a chusticia en tot o districto.
A insaculación
[editar | modificar o codigo]
En a Comunidat d'Albarracín se feba servir a o menos dende 1395, por una sentencia d'Arnal de Erill, o mecanismo d'insaculación ta acceder a os cargos de gubierno. En iste metodo d'orichen medieval ta trigar a os gubernants por meyo d'a suerte ye un nino de 8 anyos qui ha de quitar d'una bolsa chicoz trozos de papel u pergamino con os nombres d'os candidatos a un puesto de gubierno. Ta cada oficio u puesto de gubierno bi heba una bolsa diferent y os candidatos podeban trobar-se en cuantas d'istas bolsas. Aquers oficios reyals u mayors teneban un menos numero d'individuos candidatos.
D'atra man existiba una comisión de chueces electors que yeran os que, en zagueras, heban de declarar l'aptitud u no d'o candidato ta o puesto, feito que en muitas ocasions remataba en pleitos que ralentizaban o proceso.
A parti mas important d'iste sistema yera cuan una persona yera insaculata, ye decir se meteba o suyo nombre en a bolsa, ya que iste dreito yera ta cutio fueras de casos en que se declarase una inhabilitación perpetua, cuasi siempre por instancia d'as autoridaz reyals. Yera un consello de fabeadors los que decidiban si una persona dentraba en a bolsa y tamién cuan yera promocionato enta una bolsa superior. Como o nombre indica iste proceso se feba con fabas negras y blancas en una bolsa, decidindo asinas si a persona yera insaculata u no.
Os procesos de fabeación no yeran guaire habituals, se feban mas que mas cuan una bolsa quedaba sin individuos por muerte u inhabilitación y se organizaban por meyo d'ordenanzas cada bels anyos, sinyalando o numero de personas que podeban estar insaculatas.
A comunidat en l'actualidat
[editar | modificar o codigo]A comunidat de Santa María d'Albarracín tien os suyos orichens en a epoca medieval igual que las vecinas comunidaz de Calatayú, Daroca y Teruel, pero ye a unica que encara hue permaneixe viva dimpués de l'aplicación d'o decreto de disolución d'istas en 1837.
A seu actual d'a Comunidat se troba en Tramacastiella y ye formata por as cuatro sexmas tradicionals y un total de 22 municipios, cinco mas d'os diecisiet orichinals que feban parti d'a Comunidat. Asinas s'adihiben a la sexma de Villar d'el Cobo os municipios de Griegos y Guadalaviar, que en a epoca medieval yeran barrios y Bezas, Toril y Masegoso y Val de Cuenca a la sexma de Chabaloyas.
Referencias
[editar | modificar o codigo]- ↑ (es) Arnaldo Doñate Barquero: Los diezmos en la diócesis de Albarracín. Del modo y forma de cuartear en el dicho obispado. Albarracín, 1991, pp 14-20.
- ↑ (es) José Manuel Vilar Pacheco: Lexico y cultura popular de la Sierra de Albarracín. Centro de Estudios de la Comunidad de Albarracín, 2008. p 24.
Bibliografía
[editar | modificar o codigo]- (es) "La comunidad de Albarracín. Eloy Cutanda Pérez"
Vinclos externos
[editar | modificar o codigo]
.svg){kind=small}
| |
| Sexma de Bronchales | Sexma de Chabaloyas | Sexma de Fridas | Sexma de Villar d'el Cobo | |
| |
| Comunidat d'Albarracín | Comunidat de Calatayú | Comunidat de Daroca | Comunidat de Teruel | |
| Control d'autoridaz |
|
|---|
Datos: Q13048809