Columba oenas
| Columba oenas | |
|---|---|
 | |
| Denominacions populars | |
sisella, sisalleta, zorina, palomo de mont, palomo furo, palomo montesino
| |
| Estau de conservación | |
| Clasificación cientifica | |
| Eukaryota | |
| Animalia | |
Filo:
|
Chordata |
| Aves | |
| Columbiformes | |
| Columbidae | |
| Columbinae | |
| Columba | |
| C. oenas | |
| Descripción | |
Columba oenas
L., 1758 | |
A sisella[1][2] u sisalleta[1] (d'o basco < uso "paloma")[3] (nombre cientifico Columba oenas (Linnaeus, 1758)) ye una especie de paloma salvache d'o chenero Columba y a familia Columbidae, propia d'Europa y Asia. Tamién se conoixe como zorina, palomo de mont[1], palomo furo[1] u palomo montesino[1][nota 1].
Descripción
[editar | modificar o codigo]Anque fa recordar muito a os palomos domesticos, tiene o cuerpo sotilment mas fino, y con a color grisa d'o plumache uniforme, sin as dos caracteristicas faixas negras d'os palomos comuns. As alas, en volito, se veyen grisas por debaixo, a la contra de como pasa con belatras palomas que as i tienen mas claras.
Os iris d'os uellos son caracteristicament negros, sin l'aniello de color amariella u narancha que tienen os torcazos y os palomos comuns.
Hábitat
[editar | modificar o codigo]As sisellas viven en as selvas de caducifolios, a on que fan o niedo en os foratos d'árbols viellos.[4]
En Aragón ye una especie poco frecuent en l'actualidat, anque en buena cosa d'o territorio se guarda alcordanza de que enantes se cazaba. Ye una especie mas destribuida por a Europa atlantica y central, anque en ixas latituz ye un au migradera que marcha ta'l sud en hibierno.[4]
Imáchens
[editar | modificar o codigo]-
Columba oenas -
Columba oenas -
Columba oenas -
Uevo de Columba oenas
Nombres
[editar | modificar o codigo]D'alcuerdo con o naturalista y lexicografo Rafel Vidaller, sisella ye o nombre mas frecuent y destribuido ta iste animal por a metat oriental de l'Alto Aragón, documentau en localidaz de Litera, o Semontano de Balbastro, a Ribagorza y o Sobrarbe por él y por diferents autors.[2] Manimenos, en o suyo «Dizionario aragonés d'espezies animals y bechetals» no i amaneix garra referencia de que s'haiga documentau un nombre ta ista especie en garra población de l'Alto Galligo, a Chacetania nian a Plana de Uesca.[2]
Chabier Tomás documentó tamién a forma diminutiva sisalleta[2][5] en o Viello Sobrarbe, en a segunda metat d'os anyos 1990, y en l'Aves de Aragón. Atlas de especies nidificantes, expublicau por Ibercaja en 1998, i amaneix unatra variant atipica, xixella,[2] anque no se'n cita la procedencia.
A novela d'Ánchel Conte O bolito d'as sisellas (Xordica, 2000), ambientada en Planiello en os anyos d'incertidumbre sobre as expropiacions ta que fesen o pantano de Chanovas, incluye una alusión metaforica a iste animal en o titol.
Notas
[editar | modificar o codigo]- ↑ Con a variant palomo monteso
Referencias
[editar | modificar o codigo]- ↑ 1,0 1,1 1,2 1,3 1,4 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
- ↑ 2,0 2,1 2,2 2,3 2,4 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-89862-35-7
- ↑ (es) Santiago Bal Palazios:Vocabulario dialectal del habla de Maella (Aragón), Gubierno d'Aragón, 2000, ISBN 84-7753-840-9, p.205
- ↑ 4,0 4,1 (es) FELIX, Jîrî y TOMAN, Jan; Guía de Campo (3ª Ed.); Ediciones Susaeta. Madrid, 1999. ISBN 84-305-7413-1
- ↑ (es) TOMÁS ARIAS, Chabier. El aragonés de Biello Sobrarbe. Instituto de Estudios Altoaragoneses. Uesca, 1999. ISBN 84-8127-095-4
Vinclos externos
[editar | modificar o codigo]
Wikispecies tiene un articlo sobre Columba oenas.
Se veigan as imáchens de Commons sobre Columba oenas.
| Control d'autoridaz |
|
|---|
Datos: Q26140- Multimedia: Columba oenas / Q26140
- Especies: Columba oenas