Chudería de Magallón

Chudería
Barrio de Magallón
A carrera Calentejo estió a prencipal carrera drento d'a chudería de Magallón
Entidat  • País  • Ciudat	Barrio Aragón Magallón
Codigo postal	50520
Carreras prencipals	Carrera Calentejo
Atras carreras	Joaquín Liso, San Miguel, Belén Zuloaga y Castiello
Mapa de situación d'a chudería

A chudería de Magallón se trobaba entre as actuals carreras de Joaquín Liso, San Miguel, Belén Zuloaga y a carrera d'o Castiello.

Yera situada baixo a ilesia de Sant Lorient, asentada en o cobalto de La Molilla, sobre as restas de l'antigo castiello, simbolo d'o poder en a Edat Meya.

Historia

Antiga sinoga de Magallón

Os chodigos, encara que en radito numero, puede que haigan viviu en Magallón dende a epoca romana. Manimenos en a baixa Edat Meya los reis cristianos favoreixioron o suyo asentamiento. Asinas en o sieglo XV a comunidat chodiga constituyiba un 10% d'a población magallonera y pagaba una peita de con 200 sueldos anyals a lo rei.

Bi ha una sentencia arbitral de l'anyo 1415 entre os churaus y os adelantaus Alçach Gallach y Abraham Muniech en representación respectivament d'o concello y l'alchama que describe as mugas d'a chudería seguntes un informe comendau a l'alcaide Miguel Vallori por a reina Violant:

[...] se les da et assigna por judaria et limites de aquella do esten et habiten daquia adalant [...] la carrera que va a suso enta la iglesia de Sant Miguel, et dalli a iuso enta el muro, et del muro a suso enta la puerta de Puent Nevado

A sinoga, edificio d'una sola nau y teito a doble versant que teneba anexo un hespital, fue reparada en l'anyo 1434. Bi heba tamién en l'alchama un banyo publico. O suyo centro politico y relichioso s'ubicaba probablement en l'actual carrera Cabezo.

En 1492 se decretó la expulsión de toz os chodigos y estioron mandaus a l'exilio enta Tudela u embarcaus en Tortosa. Asinas, familias con apellius como los Majo, os Atortox, os Caruch, os Arueti, os Levi u los Belmoder habioron de vender as suyas posesions a los cristianos y abandonar os suyos fogars.

O 11 de chulio de 1492 a sinoga estió vendida per l'alchama a Miguel Coll, escudero, per 650 sueldos. Encara en 1493 beluns d'os chodigos que heban optau por o suyo exilio en Navarra obtenioron un salvoconducto pa baixar por l'Ebro dende Mallén dica a Mediterrania.

Bibliografía

• (es) Guía de las juderías de Aragón. Un apasionante recorrido por el Aragón judío. Miguel Ángel Motis Dolader. Guías Turísticas Prames. ISBN 978-84-8321-357-5

• Datos: Q65393563