Carrascals d'os Monegros
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Os carrascals d'os Monegros se troban como islas en pacos d'o cabalto d'a Sierra d'Alcubierre y monts de Zuera en exposicions Norte, nord-este u Norueste u como eixemplars relictos de carrasca en o sector de Farlet-Monegriello, en contacto con a sabina tarabina Juniperus thurifera.
Os monts de Zuera y a sierra d'Alcubierre fan de barrera orografica que atura por o norte a vechetación esteparia de clima mes arido d'a depresión d'Ebro, pero tamién representan o cabo de debant d'a vechetación esclerofila y dica marcescent propia d'os semontanos pirenencos y sierras prepirenencas.
A diversidat de microclimas, que dependen d'a topografía, a la exposición a lo cierzo u a estar-ne protechiu fan que o carrascal monegrín tienga especies diferents que li den caracters submediterranios, subpirenencos, ibero-provenzals u ibero-atlanticos seguntes o caso, estando ixas zonas de paco o cabo d'a distribución de muitas especies en a zona mediterrania, un fenomeno pareixiu a los que esdevién en as vals que bi ha en a serreta Negra de Fraga en os fondons.
A subasociación mes estendillada en estas sierras ye centaretosum linifoliae, caracterizada por as diferencials Centaurea linifolia, Coronilla minima lotoides, Lonicera implexa, Bupleurum rigidum, que reflecta mayor exichencia termica debant d'a subasociación rhamnetosum infectoriae descrita en a Plana de Uesca y que no plega a los Monegros.
En bel barranco con sombra y humido d'a versant norte d'a sierra d'Alcubierre por dencima d'os 650 m y con fuerte pendient, sozmesos a boiras persistents y cierzo a carrasca s'achunta con o caixico Quercus faginea. As brancas d'os arbols y arbustos se cubren de líquens y musgos epifitos y lo suelo ye cubierto en un 70 % de musgos, dominando-ie Hypnum cupresiforme y Camptothecium aureum, pero tamién amanixen Thuidim abietinum, Dicranum scoparium y Ditrichium flexicaule, mes propios d'as selvas montanas pirenencas. En o matigal que fa d'estrato arbustivo son frecuents arbustos punchents como Prunus spinosa, P.insititius y especies de galabardera chunto a especies eurosiberianas y ibero-atlanticas como Filipendula vulgaris, Senecio lagascanus y a endemica Viola rupestris bolosii. Estas selvetas de carrascal-caixicar s'han descrito como a subasociación senecietosum lagascani.
En atros puestos altos d'a sierra expuestos a lo norte o carrascal misto s'enriquix con plantas submediterranias como Rosa pimpinellifolia y Paeonia officinalis microcarpa, muito raras en os carrascals d'a depresión d'Ebro y que presentan analochías con os carrascals mixtos d'a Catalunya meya occidental, por o que s'han referiu a la subasociación quersetosum fagineae.
En a val de Zaragoza y la Valonguera, as versants orientadas enta lo norte entre os 500 y 700 m quedan protechidas d'o cierzo y inversión termica, no bi ha líquens epifitos y bi ha plantas termofilas tipicas d'o carrascal litoral como Viburnum tinus, Arbutus unedo, Ruscus aculeatus, Phyllierea angustifolia, Hedera helix, representando o carrascal termofilo (subasociación viburnetosum tinii).
En loma Sorda, barranco afluent d'a val de Zaragoza, o fondón y a base d'o paco tienen condicions microclimaticas que permiten que i haiga un caixical bien conservau con Paeonia officinalis, Rosa pimpinellifolia, Polygonatum odoratum y Viola willkommii), que fan que siga clasificable como Violo-Quercetum fagineae, a presencia de bellas indicadoras termofilas propias d'o carrascal d'arredol como Viburnum tinus, Arbutus unedo, u rusco y la pobreza d'especies caracteristicas permite clasificar a estas formacions como subasociación viburnetosum tinii, una variant finicola y dischunta d'o caixical submediterranio prepirenenco y d'as cordeleras costero-catalanas.
En toz estos enclaus humidos d'a sierra d'Alcubierre o carrascal u caixical d'a costera manifiesta en o suyo contacto con o barranco d'o fondón d'a val una marguin punchent de Prunus spinosa, Ligustrum vulgare, Crataegus monogyna y galabarderas, dominadas en bel caso por l'acirón Acer monspessulanum, que coloniza tamién estos mesmos fondons.
Bibliografía[editar | modificar o codigo]
- (es) César Pedrocchi Renault (coordinador): Ecología de los Monegros. Instituto de Estudios Altoaragoneses.