Participio present en bavaro

Tiempos verbals en bavaro

Modo indicativo

- Formas simplas Present Preterito imperfecto Futuro  - Formas compuestas Preterito perfecto Preterito plusquamperfecto Futuro compuesto

Modo conchuntivo

- Formas simplas Present Preterito imperfecto  - Formas compuestas Preterito plusquamperfecto

Modo imperativo

Imperativo

Impresonals

Infinitivo present Infinitivo perfecto Participio present Participio perfecto

O participio present en bavaro (Partizip Präsens) u participio I (Partizip I) ye una d'as formas impersonals d'o idioma bavaro. O participio present se comporta como un adchectivo, por o que puet declinar-se u no fer-lo cuan fa una función no atributiva, u como un adverbio.

Cuan se fa servir en bavaro como un adchectivo ye equivalent en aragonés a un adverbio de modo, mientres que cuan se fa servir en bavaro como adverbio equivale muit a sobén a o cherundio en aragonés. En bels casos se puet fer servir en bavaro o participio present como adchectivo atributivo, alavez como o cherundio no puet estar adchectivo en aragonés se traducirá o participio present con una frase relativa.

Formación d'o participio present

O participio present se forma en bavaro emplegando o sufixo -àd:

Participio I bavaro	Infinitivo bavaro	Participio I alemán	Infinitivo alemán	Cherundio aragonés	Infinitivo aragonés
brennàd	brennà	brennend	brennen	cremando	cremar
drågàd	drång	tragend	tragen	portiando	portiar
làffàd	laffà	laufend	laufen	correndo	correr
schdäàd	schdeh	stehend	stehen	permaneixendo	permaneixer
schdinggàd	schdinggà	stinkend	stinken	pudindo	pudir
schwimmàd	schwimmà	schwimmend	schwimmen	nadando	nadar
woànàd	woànà	weinend	weinen	plorando	plorar

Emplego d'o participio present

Actividat u cualidat

A diferencia de l'alemán en que se pueden derivar participios presents de toz os verbos, en bavaro bi ha muitos verbos en os que no existe o participio present. Asinas en bavaro no se puet emplegar un participio present cuan fa referencia a una actividat como en os siguients casos en que ye incorrecto o suyo uso:

Bavaro	Alemán	Aragonés
schbaziàngäàde Sommàgäst	spazierendgehende Sommergäste	huespedes que fan una gambada
à bfliàgàdà Bauà	ein pflügender Bauer	un granchero que ara
à någlàdà Schreinà	ein nagelnder Schreiner	un carpintero que clava

Sí que s'emplega cuan ye una cualidat d'o substantivo a o que acompanya, por eixemplo en:

Bavaro	Alemán	Aragonés
kommàde Woch	kommende Woche	semana venient
à drågàde Wand	eine tragende Wand	un muro de carga
à hinggàdà Bäddlà	ein hinkender Bettler	un mendigo coixo

Existen manimenos verbos ta os que o participio present existe, pero se puet fer servir nomás cuan se fa servir ta expresar una cualidat d'o substantivo, por eixemplo dragàd (de levar):

Bavaro	Alemán	Aragonés
a drågàde Wand	eine tragende Wand	un muro de carga
à drågàde Kuah	eine tragende Kuh	una vaca prenyada
à drågàdà Mewibaggà	ein tragender Möbelpacker	un hombre d'a mudanza que ye cargau

En iste zaguer caso drågàdà no ye una propiedat u cualidat de l'hombre, sino que fería referencia a l'actividat que fa en ixe inte, alavez l'uso ye incorrecto.

Bibliografía

• "Bairische Grammatik". Ludwig Merkle. Hugendubel. Múnich, 1975. ISBN 3-88034-127-3