Talpa europaea

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Talpa europaea
Talpa europaea
Denominacions populars
Topo, tobonero, tabonero, taupa, tauba, toponero
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Mammalia
Subclase:	Theria
Infraclase:	Placentalia
Orden:	Soricomorpha
Familia:	Talpidae
Subfamilia:	Talpinae
Tribu:	Talpini
Chenero:	Talpa
Especie:	T. europaea
Descripción
Talpa europaea LINNAEUS, 1758
Distribución cheografica
Distribución en Eurasia.

O topo común u europeu (cientificament Talpa europaea (LINNAEUS, 1758)), que tamién tiene atros nombres en aragonés como tabonero en Ribagorza y tobonero/toponero en Sobrarbe, ye un mamifero insectivoro clasificau en a orden d'os soricomorfos y a familia d'os talpidos.

A especie se conoix mas que mas por vivir debaixo de tierra, en matriqueras profundas y intrincadas que construyen ellos mesmos y que se dicen topineras, y por tener una fisionomía adaptada a una forma de vida tan peculiar.

Descripción

O topo ye un mamifero soricomorfo d'entre 12 y 20 centimetros de largaria, con una coda peluda de 3 cm mas. O pelo ye negro, preto, fino, que chunto con un pellizo flexible le sirve pa arrocegar-se por adintro d'as topineras y a la vegada poder retacular sin fer-se estorbo.

Tiene as zarpas debanteras adaptadas pa esgarrapar y tunelar a tierra. As mans son enormes, sin pelo, con cinco didos robustos chunius con a piel, entre os cuals denguno ye oposable, y as unglas son recias y creixen contino. As patas debanteras que as aguantan son muit curtas, firmes, y s'articulan cuasi de tot debaixo d'a piel; os codos son chiraus de forma que as zarpas siempre tienen a palma mirando ta dezaga, y os huembros son muit fuertes, con homoplatos firmes y devantaus a on que se refirma os musclos.

A capeza ye gran, sin orellas vistables (pos no tiene pabillón auditivo externo) y uellos amagaus entre o pelo. Ye cuasi ciego, anque tiene un tacto y un olfacto finismos que le sirven pa arribar dica a on que son as presas.

Hermafroditismo

O topo europeu, de conchunta con atras especies d'o chenero Talpa, son os solos mamiferos en os que s'haiga descrito un hermafroditismo. Anque existen os masclos y son fértils, as fembras tienen tamién un teixiu testicular en l'aparato reproductor que no les sirve pa auto-fecundar-se pero sí produz grans cantidaz de testosterona en cualques fases d'o ciclo anyal.

As fembras tienen una forma especial de gonadas que se diz ovotestis, y que no son ovarios ni testiclos propiament ditos. A parte femenina ye perfectament funcional, y en o periodo reproductor de l'anyada s'emplena d'ovocitos y libera hormonas femeninas como cualsiquier ovario de mamifero. Manimenos, sacando ixa temporada, a resta de l'anyada predomina o comportamiento masculino en as gonadas y o teixiu proto-testicular se desenvolica y libera testosterona en cantidaz parellanas a las d'un masclo. Os tubulos seminiferos son disfuncionals en as fembras, y as celulas de Sertoli tienen forma embrionaria, por o que no pueden fer espermatochenesi.

Habitat

Un topinal ye un campo u prau que os topos malmeten a base de fer-le topineras.

O topo europeu amenista suels profundos pa fer as topineras. Habita dende o livel d'a costa dica 2.000 mslm en o Pireneu. Se miran d'evitar os suels acidos, a on que no se troba ni tansas lombrices que son a suya presa principal.

No les fan goi os fenals ni os vivers, por a tierra grasa, a on que l'augua embadina os túnels, ni os suels secos, arenosos, cascallos u de mal excavar pa que s'aguanten as matriqueras. Son abundants en altarias meyas, entre os 1.000 y 1.500 metros sobre o livel d'a mar, en o suelo de praus y uebras de tierra medianament suelta y sazonosa, en os que i sían abundants as presas.

Distribución

O topo europeu habita dende o sud d'Anglaterra dica os ríos Oby y Irtysh, en Siberia, y dende o sud de Suecia dica o norte d'Italia en Europa occidental.

En a Peninsula Iberica se'n puede trobar en terrens que le sían favorables por tot en Catalunya, en Aragón y en Navarra y País Basco, pero en a baixant occidental d'o Sistema Iberico se fa poquet a poquet mas escaso, con presencia documentada en as provincias de Soria y Burgos lo mas ta ponient. En a Meseta norte y en as cordeleras que se troba mas ta occident o suyo puesto l'ocupa o suyo parient Talpa occidentalis.

Imáchens

• 
• 
• 
• 

Se veiga tamién

• Topo.
• Topinera.
• Topinal.
• Talpidae.
• Soricidae.

Vinclos externos

• Se veigan as imáchens de Commons sobre Talpa europaea.
• Wikispecies tiene un articlo sobre Talpa europaea.

• Datos: Q209067
• Multimedia: Talpa europaea / Q209067
• Especies: Talpa europaea