Solanum melongena

De Biquipedia
Ir ta: navego, busca
Solanum melongena
Aubergine-cyprus hg.jpg
Mata d'alberchenas.
Denominacions populars
Alberchenera, mata de l'alberchena, mata d'alberchenas
Estato de conservación
Status iucn2.3 LC.svg
Seguro (IUCN)
Clasificación scientifica
Dominio:
Eukaryota
Reino:
Plantae
División:
Magnoliophyta
Clase:
Magnoliopsida
Orden:
Solanales
Familia:
Solanaceae
Subfamilia:
Solanoideae
Tribu:
Solanae
Chenero:
Solanum
Especie:
S. melongena
Descripción
Solanum melongena
L., 1753

L'alberchenera (scientificament Solanum melongena (L., 1753)) ye una planta herbacia anyal en a familia d'as solanacias, cautivada amplament por o suyo fruito comestible; l'alberchena.

Descripción[editar | editar código]

L'alberchenera ye una planta de port herbacio, de gran mida (bells exemplars arriban a creixer dica 80-90 cm d'alto), que pueder fer-se semi-enfiladera si se a guida u se a enreliga contra forquetas, arribando só que en ixas condicions dica lonchitutz maximas d'arredol de 2 metros.

O trallo ye vuedo por adintro, semi-segmentau, y gosa meter-se tierco u semi-lignificau quan madura. Se troba cubierto d'una pilosidat pubescent aspra a o tacto, pero en bells casos es pelos pueden estar tan duros que arriban a punchar. Tiene fuellas ovaladas u lobuladas, grans (10-30 cm de lonchitut por 5-10 cm d'amplo), con firme peciolo que as subchecta, alternas, contra o trallo.

As flors naixen en una inflorescencia umbeliforme, atrofiada, en a qual no i gosa estar funcional sique una flor (as menos vegadas, dos, que nunca maduran), por a qual cosa gosa pareixer que no sia si que una flor individual convencional. A flor ye actinomorfa, con una corola d'entre 25 y 50 mm de diametro que ye blanca, rosa u morada. Os estambres son amariellos, muit envistables. I ha flors hermafroditas y belatras que no son si que masculinas. En as flors hermafroditas (as solas que en tienen), l'ovario ye infero con o estigma estrellau.

O suyo fruito, l'alberchena, ye una baya carnosa d'entre 50 y 300 mm de largo, de forma oval, ovoide, elipsoide u piriforme, de cuticula brillant de regular negra u morada, muit escura, anque muitas variedatz presentan variacions en a color final de l'alberchena madura: en i hai blancas, amariellas, verdes, royas u dica claras con piquetas escuras.

Orichens[editar | editar código]

L'alberchena ye una hortalicia nativa d'o subcontinent indio. Conoixida dende l'Antiguedat por as civilizacions d'Asia, se'n teneba cultivars propios en territorios d'os actuals India, Pakistán y China. Os indicios mas antigos sobre a suya domesticación a situan fa bells 4.000 anyos[1].

Bells autors europeus a describen en as suyas cronicas encara en l'Antiguedat, como Plinio lo Viello, pus seguntes diz yera un producto de comercio exotico que trayeban os merchants persas dica la cuenca mediterrania.[1] Manimenos, a introducción d'o suyo cautivo en Europa fue tardana, en a Edat Meya,[1] conseqüencia de a expansión arabe d'os sieglos VII y VIII, qui a trayón t'a Peninsula Iberica.[1] Asinas, ye una d'as pocas solanacias cautivadas que no gosó estar traita d'America, a diferencia de parients suyas como o tomate, a trunfa u o pimiento.

Cautivo[editar | editar código]

A mata de l'alberchena ye una planta muit sensible y especialment intolerant a o frido, razons por as quals se fa dificil de criar en arias de montanya y rechions interiors. En Espanya, os polos de producción se centran en rechions de clima calido y litorals, especialment en os hibernaders d'o Sud y o Sudeste, d'influencia mediterrania y condicions muit controladas. En l'Alto Aragón o suyo cautivo ye testimonial, en hortals particulars, y nunca difuera d'un numer reduciu de matas. Tradicionalment, l'alberchena i ha teniu siempre fama d'estar un planta muit fina, que se moriba con facilidat, y con muit pocos exitos de cullita.

Nomás vive bien con temperaturas superiors a 15 ºC, con muerte de teixius por debaixo d'os 10 ºC, y con una temperatura optima ta'l creiximiento de 20-25 ºC. Por contra, ye muit resistent a la calor, y gosa suportar sin guaire dificultat temperaturas diurnas persistents de mas de 40-45 ºC.

Ye un cautivo de regano convencional, que no amenista mas augua que qualsiquier atra hortalicia u fruita domestica d'as quals se'n pueda trobar en o huerto. Os problemas de mantenimiento solen venir, quasi siempre, por as baixadas de temperatura y por o requerimiento de sol directo que tiene, que fa que si se guarda contra l'aire (practica habitual con atras plantas «fredolicas» como as pimenteras u as tomateras) p. ex. metendo-le una buxada alto, mingüe a-escape por a manca de luz.

Imáchens[editar | editar código]

Referencias[editar | editar código]

  1. 1,0 1,1 1,2 1,3 (es) www.Botanical-Online.com; consultada o 25 d'agosto de 2013.

Vinclos extrernos[editar | editar código]