Sedetans

De Biquipedia
Ir ta: navego, busca
Aria de distribución d'os sedetans.

Os sedetans estioron un pueblo de cultura iberica d'o sieglo III aC que viviban en a val meya de l'Ebro, con aria centrata en o Baixo Martín, Andorra-Sierra d'Arcos, Campo de Belchit, Ribera Baixa de l'Ebro y arredols mas que mas a lo sud de l'Ebro.

Prenen lur nombre como muitos pueblos ibers d'a capital suya, Sedeis, Sedeisken, conoixita por as inscripcions monetals. Encara no ha estato localizata, anque s'han proposato Sastago por pareixito fonetico y Zaila por o important despoblato iberico que bi ha (Cabezo d'Alcalá). Miguel Beltrán Lloris interpreta en base a cantidatz de monedas en diferents chacimientos que o Cabezo d'Alcalá yera l'antiga Beligion.

Atras ciudatz importants d'o terreno sedetán estioron Kelse (en Viliella d'Ebro y Exelsa), que emitió dinars d'archent, Salduie (a man de Chuslivol), Ildukoite (Oliet), Bernaba (Azuara), y Damaniu (no localizata).

Seguntes a visión cheneral de muitos autors mugaban a lo norte con os suessetans y con os ilerchetz, con os ausetans a l'este, con os edetans a lo sudeste y con os celtibers a lo sudueste.

A relación con os edetans ye polemica, car s'ha proposato que fuesen un mesmo pueblo u que tenesen orichen común. O pareixito de nombre no ye significativo porque os edetans prenen nombre d'Edeta (Liria), y os sedetans de Sedeis.

Aproveitaban os recursos fluvials d'os ríos pa fer una agricultura de regano. Tamién comerciaban con atros pueblos porque en ixa epoca l'Ebro yera una rota comercial.

A moneda sedetana teneba como representacions un chinet con palma y una cabeza con tres delfins.

Se romanizoron pronto como atros ibers d'a costa y val de l'Ebro. Bells sedetans s'alistoron en l'exercito román y intervinioron en Italia en a guerra social, como demuestra o bronze d'Ascoli.