Cultura iberica
A cultura iberica yera una cultura que se desembolicó en l'este d'a peninsula Iberica y en o Lenguadoc dica o Roine.
A cultura iberica no tiene un orichen exterior, se formó en o mesmo puesto on se troba a partir de substratos culturals diferents, (cultura argarica, bronze levantín, campos d'urnas catalano-aragoneses, ecetra..), y ye fácil que de luengas diferents, (indo-europeas, vasco-aquitanas, atras lenguas preindoeuropeas, etz...). Representa a cultura que teneban os pueblos indichenas costers dimpués de tener contactos comercials con pueblos d'o Mediterranio oriental, (Fenicios y Griegos), que i facioron colonias. As fuents clasicas diciban ibers a os pueblos d'esta cultura.
Se imitó o sistema politico-social d'as ciudatz-estato de fenicios y griegos, (como as polis griegas por eixemplo).
Teneban escritura y un alfabeto propio, l'alfabeto iberico.
Dimpués d'a suya formación a cultura iberica tenió una expansión en o centro-este peninsular, en especial por l'Ebro meyo. Os pueblos celtas d'a meseta nor-oriental que tenioron contacto con a cultura iberica en prenioron bellacosa y desembolicoron a cultura celtiberica. No i heba una zona de muga clara entre as dos culturas, i heba una cambio progresivo.
