Paracheirodon innesi

De Biquipedia
Ir ta: navego, busca
Paracheirodon innesi
Neonka obecna paracheirodon innesi.jpg
Paracheirodon innesi
Estato de conservación
Status iucn3.1 LC es.svg
seguro
Clasificación scientifica
Dominio: Eukaryota
Reino: Animalia
Filo: Chordata
Clase: Actinopterygii
Subclase: Neopterygii
Infraclase: Teleostei
Orden: Characiformes
Familia: Characidae
Chenero: Paracheirodon
Especie: P. innesi
Nomenclatura binominal
Paracheirodon innesi
Myers, 1936

Paracheirodon innesi (Myers, 1936), habitualment dito Tetra neón u tetra neón común, ye una especie de peix tropical d'augua dulza d'a familia Characidae, d'entre 3 y 4 cm de lonchitut en os exemplars adultos, caracterizato como en as altras especies d'o chenero Paracheirodon («tetras neón») per a suya libreya de colors vitariscas, encluyendo una linia lonchitudinal d'escatas que reflectan a luz en tonalidatz azulosas, que ye d'á on le viene o nombre popular.

S'ha puesto documentar a suya presencia en os ríos Putumayo y Ucayali en Perú, en o río Loreto en Colombia, y en os ríos Solimões y Purús en Brasil. Totz ellos afluyents de l'Amazonas. Tamién vive en o propio río Amazonas en o trampo que esnaviesa per ixes tres países, anque en Brasil no arriba enta o corso baixo d'o río. Se'l troba tamién en rigachuelos d'auguas claras y corsos d'auguas negras (de corsos selvaticos), en augua siempre de Ph leverament acido (6 - 7 puntos) y Gh tovo (8 ºd de maximo).[1] Se tracta d'una d'as especies de tetras ornamentals millor conoixitas, destribuitas y comercializatas arredol d'o mundo, estando que ye la sola especie de Paracheirodon que se gosa reproducir en cautividat en condicions de producción industrial d'alevins.

Paracheirodon innesi ye una especie que se desplaza fendo cardumens en os que os peixes estableixen relacions hierarquicas, adoptando os eixemplars dominants una posición central con os subordinatos nadando per difuera.[1] Ixo pasa perque o cardumen ye, de natural, una estructura ta guardar-se d'os depredadors, que en estando animals tan chicotz ye prencipal, y son as posicions perifericas as que más periglo pasan. Se documentan casos que neons que se tienen en grupos masiato chicotz (4 u 5 exemplars en un aquario) s'encorren y se tornan agresivos d'entre ellos. Isto ye un caso d'estrés comportamental produeito per a sensación de desprotección que padeixen os animals mantenitos asinas.[1]

A suya color ye grisa translucida, como muitas altras especies de tetras. Tienen una faixa de color roya en a metat vrental de l'estremo caudal d'o cuerpo, alto u baixo dende que remata o paquet visceral e i tienen a cloaca dica la naixencia de l'aleta caudal. En altras especies d'o chenero Paracheirodon a desposición d'a malla roya ye diferent. Tienen una linia d'escatas que reflectan a luz en tonos azuls, que se prolarga lonchitudinalment dende o uello dica la metat posterior d'o cuerpo.

Paracheirodon innesi en o mesmo aquario que exemplars de Poecilia reticulata. Istas dos especies requieren condicions d'augua muit diferents, per el que se fa fácil predecir a muerte d'uns u os altros exemplars en poquet tiempo.

Como son peixes d'a cuenca altera d'o río Amazonas, a suya temperatura optima ye bella cosa más baixa que no en altros peixes tropicals, estando la millor d'entre os 22 °C y os 26 °C. No suportan guaire bien as temperaturas superiors a 26 °C.[1] Como en o suyo habitat natural existen proporcions muit baixas de sodio y de calso, tienen una gran tendencia a manifestar problemas en os rinyons quan se mantienen en aquarios en os que se proporciona una dieta alazetada en os piensos que s'emplegan ta altras especies de tetras, millor toleraderas con os ditos elementos. Se ye estimato que la más gran parte d'as defuncions d'ista especie que ocurren en cautividat son per problemas de rinyón.[1]

A suya esperanza de vida en cautividat, quan se les i proporciona buenas condicions, ye d'entre 7 y 8 anyos,[1] per el que muertes escaixidas a las pocas semanas d'a suya adquisición s'han de considerar evidentment prematuras, y cal que l'afeccionato se'n faiga pensamiento d'antes d'alquerir-ne más.[2] Se calcula que en tot lo mundo, cada anyada mueren millons d'istes peixes per deficencias en o suyo mantenimiento en cautividat per parte de presonas que los compran atraitas per a suya envistabilidat, sin fer-se pensamientos d'as condicions que precisan.[2] Ye una d'as especies que más a sobén s'ofreixen en os comercios, y en l'actualidat se fa raro que en bella botiga d'animals no se'n ofreixca, en estando parte d'a culpa d'o gran numer de baixas que se causan a predisposición a la suya adquesición compulsiva que la rete de comercios fa posible.[2]

Imachens[editar | editar código]

Referencias[editar | editar código]

  1. 1,0 1,1 1,2 1,3 1,4 1,5 (es) Dentrada Paracheirodon innesi en o portal www.Dr. Pez.net. Consultato lo 19 de febrer de 2010
  2. 2,0 2,1 2,2 (es) ETSCHEIDT, Jutta. El Gran Libro del Acuario de agua dulce. Tikal ediciones. ISBN 978-84-305-8773-5

Vinclos externos[editar | editar código]