The Hobbit: An Unexpected Journey

De Biquipedia
Ir a la navegación Ir a la búsqueda
The Hobbit: An Unexpected Journey
Ficha tecnica
Dirección Peter Jackson
Producción Carolynne Cunningham
Zane Weiner
Fran Walsh
Peter Jackson
Guión Fran Walsh
Philippa Boyens
Peter Jackson
Guillermo del Toro
Musica Howard Shore
Fotografía Andrew Lesnie
Montache Jabez Olssen
Actors Ian McKellen
Martin Freeman
Richard Armitage
James Nesbitt
Ken Stott
Cate Blanchett
Ian Holm
Christopher Lee
Hugo Weaving
Elijah Wood
Andy Serkis
Datos y cifras
País(es) Nueva Zelanda
Estaus Unius
Anyo 2012
Chenero fantasía
Durada 169 min.
Companyías
Productora New Line Cinema
Metro-Goldwyn-Mayer
WingNut Films
Destribución Warner Bros. Pictures
Presupuesto 200–315 millions de dólars

The Hobbit: An Unexpected Journey (títol orichinal en anglés, estenata en Aragón con o títol en castellán El hobbit: un viaje inesperado) ye una cinta estatounitense de cine de fantasía de l'anyo 2012, endrezada por Peter Jackson y producida por Carolynne Cunningham, Zane Weiner, Fran Walsh y Peter Jackson con guión de Fran Walsh, Philippa Boyens, Peter Jackson y Guillermo del Toro, protagonizada por Ian McKellen, Martin Freeman, Richard Armitage, James Nesbitt, Ken Stott, Cate Blanchett, Ian Holm, Christopher Lee, Hugo Weaving, Elijah Wood y Andy Serkis.

Le siguen The Hobbit: The Desolation of Smaug (2013) y The Hobbit: The Battle of the Five Armies (2014), y chuntas actúan como una preqüela d'a trilochía cinematografica d'o sinyor d'os aniellos de Peter Jackson.

Reparto[editar | modificar o codigo]

Argumento[editar | modificar o codigo]

Un viello hobbit Bilbo Baggins ye punto de complir 111 anyadas d'edat, y decide escribir pa lo suyo sobrino Frodo a narración completa sobre l'inasperau viache en o qual s'embarcó fa sixanta anyos. Prencipia narrando l'historia d'o fabuloso reino nano d'Erebor, baixo a Montanya Solitaria, en a quala os nanos extrayeban metals preciosos baixo o reinau de Thrór, o rei baixo a montanya. Manimenos, tals riquezas dispertoron l'angluzia de Smaug, o mas gran d'os dragons d'o Norte, y atacó Erebor y Dale, forachitando a los nanos d'o suyo reino y apoderando-se de l'inchent tresoro. Dende alavez, os nanos d'Erebor se convirtioron en un pueblo errant y dondioron per muitas tierras, pero nunca ixuplidoron l'ataque de Smaug y o viello reino que les perteneixeba. Dimpués de contar l'historia d'Erebor, Bilbo pasa a recontar as suyas aventuras, encomenzadas anyos dezaga, quan, en un afable maitín mientres fuma debant d'o suyo forau-hobbit, se troba con o mago Gandalf lo Griso. Gandalf busca a belún aventurero, pero Bilbo se niega rotundament, ya que aborreix as aventuras tanto como totz os hobbits d'a Comarca.

En a tardi d'o día siguient, Bilbo quasi no s'alcordaba d'a cita con Gandalf quan siente clamadas en a puerta. D'o tot perplexo, veye cómo quantos nanos se presientan en a suya casa saludando como qui no quiere a coseta. Finalment, se presienta Gandalf con un nano que pareix ser d'alto rango, cosa mas y cosa menos que Thorin "Escudo de Caixico", principe nano nieto de Thrór, o zaguer Rei Baixo la Montanya. Thorin y os dotze nanos que l'acompanyan han veniu a la casa de Bilbo en busca d'un espullador de tresors que les recomendó Gandalf, pus tienen l'obchectivo de viachar a la Montanya Solitaria pa reconquerir o viello tresoro que usurpó Smaug. Bilbo tasament ye capable de mantener-se en piet en sentir que quieren trayer-lo a una aventura, y fuye a la suya cambra pa adormir no guaire tiempo dimpués de que os nanos le expliquen o suyo plan. Bilbo se dispierta lo maitín siguient con a sensación de que a visita d'os nanos estió nomás un suenio, en descubrir que anueit le deixoron una nota decindo que si quereba acceptar o treballo d'espullador, que se reuniera con ells en Delagua. Sin saber ell mesmo lo que fa, un extranyo sentimiento aventurero l'enzuriza a salir d'o suyo forau y correr precipitadament a Delagua a reunir-se con a Companyía de Thorin. Allí, con bell pesar, descubre que a mayoría d'os nanos no pensaban que s'atrivise a acompanyar-los y heban feito una apuesta en a quala ganan Balin y Gandalf, que confía en l'hobbit y sabe que ye capable de fer mas d'o que piensa.

Lo primer problema surte trascruzando o Selva d'os Trols, an os tretze nanos son atrapaus per os trols Bert, Tom y William. Bilbo, a pesar de tremolar de pietz a tozuelo, aconsigue entretener-los dica l'amaneixer, inte en o qual Gandalf os exposa a la luz d'o sol y os trols se convierten en pietra. No guaire luen troban o cado d'os tres trols, an Gandalf prene a "Glamdring", una espada que heban furtau os trols; y entrega una chicota daga a Bilbo (a la que mete o nombre de Dardo), que brila quan bi ha orcos amán. Per a suya parti, Thorin prene a Orcrist. Amán d'o vado d'o Bruinen, o grupo se troba de botepronto con Radagast lo Pardo, un mago de l'orden d'os Istari, a la quala perteneix Gandalf y la resta de magos. Radagast le conta a Gandalf temerosament que en a Gran Selva Verda, an ell vive, o mal ye tornando a la selva a resultas de que un misterioso nigromant s'ha instalau en Dol Guldur, una antiga fortaleza que perteneixeba a Mordor, agora en ruinas, construyida antis d'a segunda redota d'o Sinyor Fosco. En ixe mesmo inte, un grupo d'orcos amontaus en huargos ataca a lo grupo, que aconsigue fuyir a la val secreta de Rivendell gracias a que Radagast os distraye y un grupo d'elfos amaneix de sopetons.

En Rivendell, Elrond, o sinyor d'os elfos, aculle a la companyía de Thorin, encara que os nanos no se troban muit a gusto a resultas de que en o pasau, o rei Thranduil (d'os elfos d'a Selva Negra) no os aduyó quan cayió a montanya Erebor debant d'o dragón Smaug. Galadriel y Saruman lo Blanco (lider d'os magos istari) tamién se troban en Rivendel, a causa que se troban enteraus d'o mal que ha surtiu en a Selva Negra. Asinas peus, en Rivendel tien puesto o concilio blanco entre Elrond, Galadriel, Gandalf y Saruman. Gandalf sospeita que o Nigromant no ye unatro que Sauron, ya que no estió destruyiu d'o tot a causa d'a perda de l'aniello unico per parti d'Isildur. Manimenos, l'opinión de Saruman prevaleix, y opina que l'aniello unico s'ha perdiu pa cutio baixando d'o río Anduin a la mar, adhibindo que o Nigromant sía de seguras o rei bruixón con una nueva ofensiva. Entremistanto, en Amon Sûl, os orcos que heban atacau a Thorin y companyía en o vado d'o río Bruinen avisan l'a suya sinyor Azog que o nano Thorin ye encara vivo. Quantos sieglos dinantis, Thorin i heba feriu seriosament a Azog, en a batalla d'Azanulbizar debant d'as menas de Moria, y Azog churó vengar-se d'ell dende alavez. En Rivendell, Thorin, Bilbo y os dotze nanos parten de nuevo mientres Gandalf contina en o concilio. Pa continar o suyo viache han de cruciar as periglosas Montanyas Nubles, en as qualas un día de tronada sobre ellas presencian un impresionant combate entre chigants de pietra. Pa refuchiar-se d'a titanica batalla, se refuchian en una espelunga. Bilbo, dimpués de veyer os periglos d'as montanyas, creye que ha visto masiau y se disposa a tornar ent'o suyo país per a suya cuenta mientres os nanos aduermen. Bofur manimenos lo descubre, y cómo creye en ell, Bilbo decide quedar-se. Manimenos, Thorin, a lo qui l'hobbit no le fa goyo, opina que a Bilbo no le intresa a expedición y que nomás será un estorbo.

En ixe inte, una crepa s'ubre en l'espelunga y multitut de goblins les salen a la trobada y capturan a lo grupo, pus l'espelunga yera una d'as muitas dentradas d'un sistema de túnels de goblin. Bilbo y Thorin y companyía son conducius debant d'o Rei Goblin, que os acusa de querer furtar y ordena matar-los. En ixe inte, Gandalf amaneix y remata con o Rei Goblin y qualques mas. Thorin, Gandalf y os nanos fuyen precipitadament, pero Bilbo se caye y se desepara d'o grupo, cayendo en una espelunga en que o suyo solero troba un aniello misterioso. Bilbo l'alza sin mas y plega a un laco subterranio, an Gollum, una viella creyatura fambrosa que fabla con un tal `` tresoro ``, le proposa chugar a las devinetas. Si Bilbo gana, Gollum le amostrará a salida d'os túnels, pero si o ganador difuera Gollum, se mincharía a lo hobbit. Os dos van lanzando dovinallas estranyament parellanas y finalment Bilbo, nervioso chuguetia con l'Aniello que alza en a suya pocha, preguntando-se a ell mesmo «Qué tiengo en a mía pocha?». Gollum l'interpreta como una devineta, y en no encertar-lo, en cuenta de complir a suya promesa se disposa a ir a la suya isla d'o laco, an alza o suyo `` tresoro ``, un aniello machico que fa invisible a qui se lo mete en o dido, pretendendo matar a Bilbo per sorpresa. En no trobar-lo, Gollum, muit alterau, descubre que Bilbo tien o suyo aniello, que habió de cayer-se-le mientres cazaba a un goblin. Gollum se disposa a rematar con Bilbo, pero iste aconsigue veyer-lo de luen y, casualment, en ficar una man en a suya pocha, l'aniello se le esliza a lo dido y Bilbo descubre que l'obchecto lo fa invisible. Bilbo aprofita ista propiedat pa seguir a Gollum y buscar qualsequier salida. En bell punto, se siente tentau a degollar a Gollum con a espada Dardo, pero un sentimiento compasivo le fa apiadar-se d'ell.

Bilbo s'achunta de nuevo con o grupo de Thorin en sentir as suyas voces, pero no le diz cosa a dengún sobre o trobo de l'aniello. Dimpués d'una persecución per a subterrania Ciudat d'os Goblins, a companyía de Thorin, Gandalf y Bilbo sale a l'exterior nomás pa cayer agora en terreno d'una ramada d'immensos lupos huargos, que se mete a acazar-los immediatament. Os quince miembros se puyan a un abet situau a lo costau d'una clamor pa salvar-se d'os huargos quan descubren que o rabanyo yera capitaniau per l'orco Azog, que iba en busca de Thorin. Cosa mas veyer-se, Azog y Thorin salen a lo trobada pa enfrontinar-se, pero Thorin recibe un truco de l'orco que lo tira a lo solero. Un inasperau truco de valentía amaneix en Bilbo, que baixa de l'arbol tamién pa protecher a Thorin tot y con l'espanto que siente. Os atros nanos lo siguen pa enfrontinar-se a los atros orcos d'Azog en un desasperau combate. Per suerte, un grupo d'alicas, amigas de Radagast, baixa d'as altarias d'as montanyas y replegando a los miembros d'a companyía de Thorin, os traye a un puesto seguro que mira enta l'este, sobre o río Grande y a Selva Negra, alufrando-se, bien luen, a Montanya Solitaria. Lo grupo ye en as Tierras Salvaches, y Thorin, que yera inconscient per a caita, se reanima y pide perdón a Bilbo per a suya desconfianza, pleno de gratitut enta l'hobbit per haber-lo salvau. Mientres os viachers contemplan o suyo destín, una torda devanta o vuelo y plega a la Montanya Solitaria, an captura un caragol y lo truca contra una pietra pa trusquir-lo. L'eco d'os trucos resuena en l'interior d'a montanya, an o dragón Smaug dispierta dando final a la cinta.

Producción[editar | modificar o codigo]

Una adaptación cinematografica d'a novela de J.R.R. Tolkien O Hobbit (1937) va estar en desembolique mientres quantos anyos dimpués de l'exito critico y financiero d'a trilochía cinematografica Lo sinyor d'os aniellos (2001-2003), coescrita, coproducida y enfilada per Peter Jackson. Jackson inicialment iba a producir una adaptación de dos cintas de Lo Hobbit, que iba a estar enfilada per Guillermo del Toro. Manimenos Del Toro deixó lo prochecto en mayo de 2010, dimpués d'arredol de dos anyos de treballar con Jackson y o suyo equipo de producción,a resultas de retardos causaus en parti per problemas financiers en Metro-Goldwyn-Mayer. Jackson estió asinas anunciau como director en octubre.

As cintas de Hobbit se producioron una dimpués d'unatra, como as cintas de Lo sinyor d'os aniellos. A fotografía prencipal d'as cintas de Lo Hobbit prencipió lo 21 de marzo de 2011 en Nueva Zelanda y remató lo 6 de chulio de 2012, dimpués de 266 días de rodache. Se asperaba que o treballo en a cinta se completase o 26 de noviembre, nomás dos días antis de l' enguero d'a cinta en Wellington. Jackson comentaría mas tardi que a repentina salida de Del Toro creyó problemas, ya que sintió que tenió un tiempo de preparación inadequau, lo que lo levó a filmar as cintas con guions sin rematar y sin guions graficos.

Referencias[editar | modificar o codigo]

  1. (en) "Martin Freeman to play Bilbo Baggins in The Hobbit". News (United Kingdom: BBC). 22 October 2010. https://www.bbc.co.uk/news/entertainment-arts-11604193. 
  2. (en) Busis, Hillary (22 April 2011). "'The Hobbit': Ian Holm is officially in as old Bilbo". Entertainment Weekly. http://insidemovies.ew.com/2011/04/22/the-hobbit-ian-holm-is-officially-in-as-old-bilbo/. 
  3. (en) "Ian McKellen as Gandalf in The Hobbit". McKellen. http://www.mckellen.com/cinema/hobbit-movie/. 
  4. (en) "Kiwi actor steps into Hobbit breach". The Dominion Post. 2 May 2011. http://www.stuff.co.nz/entertainment/film/4948801/Kiwi-actor-steps-into-Hobbit-breach. 
  5. (en) "Christopher Lee Talks Saruman in The Hobbit: An Unexpected Journey". 31 December 2011. http://www.movieweb.com/news/christopher-lee-talks-saruman-in-the-hobbit-an-unexpected-journey. 
  6. (en) "New Hobbit: An Unexpected Journey Pics: Elijah Wood Returns as Frodo; Martin Freeman's Bilbo Gets His Sword". 18 October 2012. http://au.eonline.com/news/355189/new-hobbit-an-unexpected-journey-pics-elijah-wood-returns-as-frodo-martin-freeman-s-bilbo-gets-his-sword. 
  7. (en) "Andy Serkis Signed To Reprise Gollum In 'The Hobbit'". Deadline Hollywood. 10 January 2011. https://www.deadline.com/2011/01/andy-serkis-signed-to-reprise-gollum-in-the-hobbit/. 
  8. (en) Fleming, Mike (16 June 2011). "Benedict Cumberbatch To Voice Smaug in 'The Hobbit'". Deadline.com. https://www.deadline.com/2011/06/benedict-cumberbatch-to-voice-smaug-in-the-hobbit/.