Ian McKellen

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Ian McKellen
Ian McKellen.
Información personal
Nombre real	Ian Murray McKellen
Calendata naiximiento:	25 de mayo de 1939
Puesto naiximiento:	Burnley (Reino Uniu)

Ian Murray McKellen, naixiu de Burnley (Reino Uniu) lo 25 de mayo de 1939, ye un actor britanico de cine y teatro. Ye ganador de siet premios Laurence Olivier, un Globo d'Oro, un Tony, dos premios d'o Sindicato d'Actors, un BIF y dos premios d'a Critica Cinematografica; y ha estau nominau a l'Óscar en dos ocasions, cinco a los BAFTA y cinco a los Emmy. A suya labor interpretativa ha abarcau dende Shakespeare y lo teatro popular contemporanio dica la fantesía y la ciencia ficción. A BBC declaró que «las suyas interpretacions le han asegurau un nicho en o canon d'o teatro anglés y dentro d'o gremio cinematografico». Ye un d'os actors teatrals mas notables d'o Reino Uniu y ye considerau comunament como un icono d'a cultura britanica.

Prencipió la suya cursa profesional en 1961 como parti d'o selecto elenco d'o Belgrade Theatre. En 1969, estió convidau a formar parte d'a companyía de teatro d'o Prospect Theatre y encabezó l'elenco d'as obras Ricardo II de Shakespeare y Eduardo II de Marlowe, consagrando-se firmement como un d'os actors clasicos mas importants d'o país. Entre los setanta, McKellen estió miembro d'a Companyía de teatro de Shakespeare y d'a Companyía nacional de teatro. Aconsiguió la reconoixencia internacional per los suyos destacaus papels como Gandalf en a trilochía d'o Sinyor d'os Aniellos y Lo hobbit; y como Magneto en a saga X-Men, cintas que tamién lo facioron conoixiu pa las audiencias mas chóvens.

En 1979 estió condecorau con l'Orden de l'Imperio Britanico, estió nombrau Caballero per la reina Isabel II en 1991 per lo suyo servicio en as artes interpretativas y estió feito Companyero d'honor d'a reina per los suyos servicios en as artes dramaticas y a la igualdat en 2008. McKellen ye ubiertament gay dende 1988​ y un conoixiu activista en favor d'os dreitos d'os homosexuals, a la vegada que lo cofundador d'Albert Kennedy Trust, una d'as organizacions de dreitos LGBT mas influyents d'o Reino Uniu, d'a cual sigue estando un portavoz destacau.