The General (cinta de 1926)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo ye sobre una cinta de cine estausunidense de l'anyo 1926; ta atros usos, se veiga The General.

The General
Títol	The General
Póster d'a cinta, obra de Hap Hadley.
Ficha tecnica
Dirección	Clyde Bruckman Buster Keaton
Aduyant de dirección	Edward Hearn
Dirección artistica	Fred Gabourie
Producción	Joseph M. Schenck Buster Keaton
Guión adaptau	Al Boasberg Clyde Bruckman Buster Keaton Charles Henry Smith Paul Gerard Smith
Basau en	The Great Locomotive Chase, memorias de William Pittenger
Soniu	Konrad Elfers
Fotografía	Bert Haines Devereaux Jennings
Montache	Buster Keaton Sherman Kell
Escenografía	Harry Roselotte
Vestuario	J.K. Pitcarin
Maquillache	J.K. Pitcarin Fred Carlton Ryle
Efectos especials	Jack Little
Actors	Buster Keaton Marion Mack Charles Henry Smith Richard Allen Glen Cavender
Datos y cifras
País(es)	Estaus Unius
Anyo	1926
Debantadera	31 d'aviento de 1926 Tokio (Imperio d'o Chapón)
Chenero(s)	Cine de western Cine belico Cine de comedia Cine de romance
Durada	75 min.
Idioma(s)	Cine mudo
Companyías
Productora(s)	Buster Keaton Productions Joseph M. Schenck Productions
Distribución	United Artists
Presupuesto	750.000 dólars
Recauto	1 millón de dólars
Informacions en bases de datos especializadas:

Una escena d'a cinta.

Una escena d'a cinta.

Una escena d'a cinta.

Una escena d'a cinta.

Una escena d'a cinta.

Una escena d'a cinta.

The General (títol orichinal en anglés, en aragonés A Cheneral, enguerada en Aragón con o títol en castellano de El maquinista de La General, O maquinista d'a Cheneral en aragonés) ye una cinta de cine estausunidense de cine mudo de l'anyo 1926 de western de comedia romantica belica dirichida por Joseph M. Schenck y Buster Keaton seguntes un guión adaptau por Al Boasberg, Clyde Bruckman, o mesmo Buster Keaton, Charles Henry Smith y Paul Gerard Smith d'as memorias de William Pittenger, publicadas con o títol de The Great Locomotive Chase y que describen o clamau raid d'Andrews, escaiciu o 12 d'abril de 1862 mientres a Guerra Civil estausunidense, un raid a on l'autor heba participau como soldau y por o cual recibió una d'as primeras Medallas d'Honor concedidas dende l'establimiento d'a dita medalla en aviento de 1861 por o President d'Estaus Unius Abraham Lincoln.

La cinta ye producida por Joseph M. Schenck y por Buster Keaton ta las suyas respectivas productoras Buster Keaton Productions y Joseph M. Schenck Productions, con una dirección de fotografía de Bert Haines y Devereaux Jennings y en l'elenco d'a cinta participan como actors destacaus Buster Keaton y Marion Mack como protagonistas, amás de Charles Henry Smith, Richard Allen u Glen Cavender, entre d'atros. Cal destacar que Buster Keaton en ista cinta estió autor d'o guión, productor, director, actor y dica qui en fació lo montache.

La cinta estió una apuesta personal de Keaton, qui disenyó una cinta prou luent d'o presupuesto que en ixas envueltas s'adedicaba a una cinta. Amás, qui li facilitó los diners ta la suya realización estió Joseph M. Schenck, qui yera lo chefe de Metro-Goldwyn-Mayer; en tener la cinta un fracaso en taquilla (nomás recaudó inicialment 500.000 d'os 750.000 dólars invertius, encara que plegoron en 1 millón de dólars con os ingresos foranos) Schenk obligó a Keaton a sinyar un alcuerdo prou restrictivo con a Metro, perdendo asinas Keaton la suya independencia como director que dica l'inte heba manteniu. Lo rodache d'a cinta se fació en Santa Monica (California) y en Cottage Grove (Oregón) y ye ambientada en Tennessee en os anyos 1860 mientres a Guerra Civil estausunidense.

En 1954, en oblidar lo propietario d'o copyright d'a cinta de fer la tramitación d'a suya renovación, la cinta se convertió en una cinta que fa parte d'o dominio publico en Estaus Unius.

Argumento

Johnnie Gray treballa en o ferrocarril, en a Western & Atlantic Railroad, y nomás tien que dos pasions: a suya novia, Annabelle Lee, y la suya locomotora, clamada The General. Cuan plega en Marietta a visitar a la suya novia montau en a suya locomotora, conoix que acaba d'esclatar la Guerra Civil d'os Estaus Unius, y que lo chirmán y lo pai d'Annabelle marchan a incorporar-se a las filas d'as tropas d'os Estaus Confederaus d'America. Ta contentar a Annabelle, Johnnie marcha tamién a alistar-se'n, pero lo desitan en considerar que lo suyo treballo en o ferrocarril ye muito mas important que tener un soldau mas en o frent. En salir de l'oficina d'alistamiento lo pai y lo chirmán d'Annabelle lo claman ta que se lis adhiba a la formación, pero él, que sabe que no l'han acceptau, marcha, dixando-les la impresión de que no ha queriu alistar-se. Como consecuencia, Annabelle li diz a Johnnie que no torne a charrar con ella dica que no porte un uniforme.

Un anyo dimpués, li dicen a Annabelle que su pai ha resultau feriu en una batalla y Annabelle marcha enta lo norte ta trobar-se con su pai. Sin saber-lo, lo fa en un convoy conduciu por a locomotora The General, que conduz lo suyo ex-novio. Cuan o tren s'atura en una gara ta que pasachers y ferroviarios minchen, os espías de l'exercito estausunidense lideraus por o capitán Anderson, que yeran asperando, aproveitan ta prener lo tren y robar-lo, ta fer-lo servir como transporte ta cremar tots os puents que trescruce en o suyo camín y asinas impedir l'aprovisionamiento de l'exercito confederau. Pero Annabelle, que heba puyau en o tren ta mirar en o vagón d'equipaches, se troba presonera inadvertida d'os nordistas.

Johnnie, qui encara no sabe que Annabelle ye en o tren, lo persigue. En primeras, a piet, y dimpués en vagoneta de man y en bicicleta dica plegar en Kingston, a on contacta con un destacamento sudista. Toz puyan en a locomotora Texas ta perseguir a los nordistas. Tanimientres, los vagons no yeran connectaus a la locootora y, cuan ista marcha, los vagons quedan entazaga con as tropas. Johnnie tarda en parar cuenta de que ye solo en a persecución y ya ye masiau tarde ta tornar a buscar a los soldaus.

Cuan os espías nordistas paran cuenta de que les persigue la Texas preban de retardar la marcha d'a locomotora perseguidora. Mientres o desmebolique d'a persecución, as tropas confederadas de l'exercito de Tennessee reblan debant d'as tropas federals y perseguius y perseguidor se troban dezaga d'as linias nordistas. Alavez, os espías paran cuenta de que qui les persigue ye nomás que un solo hombre. En parar los trens, Johnnie marcha a esconder-se en una chicota selva amanada, chusto en o mesmo momento que prencipia una plevia intensa.

En chirar as umebras, Johnnie dentra en una casa ta robar bella cosa ta minchar, pero en escuitar rudios s'oculta baixo d'una mesa. Qui dentra en a cambra ye un grupo d'oficials nordistas y Johnnie escuita cómo explican un ataque sorpresa que son preparando, ataque en o cual lo puent Rock River chuga un papel esencial. Johnnie puet veyer tamién que portan presonera a Annabelle y la enzarran en una cambra. Johnnie consigue noquiar a los vichilants d'Annabelle y liberar-la, y toz dos marchan enta la selva en a plevia. De maitín, deciden marchar enta las linias sudistas ta prevenir-les de l'ataque federal y Johnnie puya a escondidas a Annabelle en un vagón, monta en The General y marcha enta las linias confederadas, perseguiu ista vez por or soldaus nordistas puyaus en a Texas, habendo-se chirau los papels de perseguius y perseguidors.

Elenco

Actor	Papel	Notas
Buster Keaton	Johnnie Gray
Marion Mack	Annabelle Lee
Glen Cavender	Capitán Anderson
Jim Farley	Cheneral Thatcher
Frederick Vroom	Cheneral sudista
Frank Barnes	Chirmán
Charles Henry Smith	Pai
Joe Keaton	Cheneral nordista
Mike Donlin	Cheneral nordista
Tom Nawn	Cheneral nordista
Henry Baird	Soldau	No acreditau
Joe Bricher	Soldau	No acreditau
Jimmy Bryant	Participant en o raid	No acreditau
Sergeant Bukowski	Oficial	No acreditau
C.C. Cruson	Oficial	No acreditau
Jack Dempster	Participant en o raid	No acreditau
Keith Fennell	Soldau	No acreditau
Budd Fine	Participant en o raid	No acreditau
Eddie Foster	Pompero d'o ferrocarril	No acreditau
Ronald Gilstrap	Soldau nordista	No acreditau
Frank Hagney	Reclutador confederau	No acreditau
Ray Hanford	Participant en o raid	No acreditau
Jack Hanlon	Papel menor	No acreditau
Al Hanson	Participant en o raid	No acreditau
Anthony Harvey	Participant en o raid	No acreditau
Edward Hearn	Oficial de l'exercito federal	No acreditau
Hilliard Karr	Soldau	No acreditau
Elgin Lessley	Cheneral nordista que ordena trescruzar o puent	No acreditau
Louis Lewyn	Soldau	No acreditau
Jackie Lowe	Mocet qui sigue a Johnny	No acreditau
Billy Lynn	Soldau	No acreditau
Ross McCutcheon	Participant en o raid	No acreditau
Tom Moran	Participant en o raid	No acreditau
Charles Phillips	Participant en o raid	No acreditau
Red Rial	Participant en o raid	No acreditau
Al St. John	Oficial a lo canto d'o caballo	No acreditau
Harold Terry	Soldau nordista	No acreditau
Ray Thomas	Participant en o raid	No acreditau
Red Thompson	Participant en o raid	No acreditau
James Walsh	Soldau	No acreditau
Kenneth Hawley Ward	Soldau	No acreditau
John Wilson	Soldau federal	No acreditau
Jean Woodward	Papel indeterminau	No acreditau

Producción

En primerías de 1926 Clyde Bruckman, un colaborador de Buster Keaton, li charró a iste sobre as memorias de William Pittenger, un soldau de l'exercito federal mientres a Guerra Civil estausunidense, que heba publicau en 1889 con o títol de The Great Locomotive Chase y a on explicaba que heba participau en 1862 en o raid d'Andrews. Keaton yera un gran aficionau a los ferrocarrils y heba leyiu o libro, pero pensó que encara que las memorias de Bruckman yeran escritas dende la perspectiva nordista lo publico no acceptaría que se considerase a los confederaus como "los malos d'a cinta" (mai millor dito) y creyó que yera millor fer un cambeo de perspectiva ta convertir en protagonistas a los sudistas. Keaton planeyaba filmar la cinta en o mesmo puesto a on s'heban escaiciu los feitos y prebó de logar l'autentica The General, que en ixas envueltas se conservaba en a Chattanooga Union Station, una gara en Chattanooga, estando propiedat d'a Nashville, Chattanooga and St. Louis Railway. Pero los propietarios d'a locomotora, en conoixer que Keaton quereba rodar una comedia, no acceptoron.

En abril de 1926 Burt Jackson (o cherent de localizacions de Keaton) trobó una redolada en Oregón a on encara bi heba ferrocarrils y locomotoras antigos en fucionamiento y que consideraba que podeban emplegar-se en a cinta. La Oregon, Pacific and Eastern Railway encara teneba en servicio dos locomotoras antigas, que feba servir ta lo transporte de mercaderías, en concreto de fusta d'as selvas d'Oregón. Jackson mercó las dos locomotoras y dimpués encara mercó una tercera ta emplegar-la en a escena d'o colapso d'o puent.

Joseph M. Schenck, o productor d'a cinta, yera entusiasmau con tot ixo y li concedió finalment a Keaton un presupuesto de 400.000 dólars. Keaton adedicó semanas a estudiar o guión y a preparar escenas, amás de dixar creixer o suyo cabello. Tamién decidió contractar como actriz protagonista a Marion Mack, qui treballaba como miembro d'as Sennett Bathing Beauties, un grupo de mesachas que actuaban en grupo en as cintas d'o productor Mack Sennett en trache de banyo.

Rodache

L'elenco y l'equipo con o suyo equipe plegoron en Cottage Grove o 27 de mayo de 1926, con 18 vagons de mercaderías con canyons d'a guerra civil, vagons de pasachers reconstruyius, dilichencias, casas y treballadors, instalando-se en l'Hotel Bartell, amán d'Eugene, ta comenzar la construcción d'o escenario lo 31 de mayo. Dende alavez dixó de funcionar lo servicio regular de ferrocarril en Cottage Grove dica la fin d'o rodache; tanimientres, un tercio d'o presupuesto d'a cinta se gastó en Cottage GRove, en contractando 1.500 d'os suyos habitants.

L'8 de chunio empecipió la filmación propiament dita. Mientres o rodache, en primeras Keaton ignoraba de raso a Marion Mack, qui explicaba que Keaton se relacionaba nomás que con a suya colla, pero dimpués sí que tenioron contacto mas fluyiu. Lo rodache continaba con alegría entre los miembros de l'equipo, que mesmo emplegaban os domingos en chugar a béisbol contra los habitants d'o lugar, que deciban que Keaton podría haber estau un buen profesional.

La United Artists fació un comunicau de prensa a on explicaba que en ixe momento la cinta teneba 3.000 personas en nomina y se gastaban 400 dólars cada hora. O productor Schenck empecipió a fogar-se con os creixents costes d'a cinta y amás amaneixioron chicots accidents que cada vegada l'incrementaban mas.

O 23 de chulio, Keaton filmó a escena d'o choque de trens en una selva de coniferas amán de Cottage Grove y Keato convidó a los habitants a presenciar o choque, presentando-se 3.000 u 4.000 habitants, incluyindo-ie 500 miembros d'a Guardia Nacional d'Oregón que heban participau como extras en escenas de batalla. Ta la filmación, Keaton fació servir 6 camaras, con cuantas tomas. Lo coste total d'a filmación d'a escena estió de 42.000 dólars, la filmación mas cara d'una sola escea de todo lo cine mudo. En rematar a filmación la productora dixó los repuis d'as locomotoras en a guilera d'o río, repuis que se convertioron en una atracción turistica d'o lugar dica que mientres a Segunda Guerra Mundial se recuperoron como ferrincallo ta contribuyir en o esfuezo belico estausunidense.

En filmar unas escenas, esclató un gran incendio que li costó a la productora 50.000 dólars y que amás fació que o 6 d'agosto s'albandonase lo rodache y l'equipo tornase en Los Angeles en no poder filmar por o fumo de l'incendio. dica que no plegoron as plevias a finals d'agosto no podioron tornar a filmar y finalment remató lo rodache o 16 de setiembre y prencipiaba lo proceso d'edición d'a filmación, con a intención d'enguerar la cinta en aviento.

Critica

En enguerar-se la cinta no tenió pas masiau exito de publico, en mesmo no plegar con os 500.000 dólars recaudaus inicialment en Estaus Unius, salvando-se lo recaudo nomás que por os ingresos foranos, que equilibroron lo balance. Tanimientres, dende alavez la cinta ha millorau muitismo la suya critica, plegando hue a estar considerada como una d'as millors cintas d'o cine estausunidense.

The General s'engueró en primeras o 31 d'aviento de 1926 en dos chicoz cines de Tokio, en Chapón. Yera `revisto d'enguerar-la en Nueva York, en Estaus Unius, o 22 de chinero de 1927 en o prestichioso Capitol Theatre, pero s'estaba exhibindo con a-saber-lo d'exito la cinta Flesh and the Devil y finalment The General no s'engueró so que lo 5 de febrero. En una semana, lo recaudo estió de 50.992 dólars, un recaudo alto u baixo normal, con un recaudo total en Estaus Unius de 474.264 dólars, luent d'os 750.000 dólars que s'hena invertiu.

Criticas contemporanias

Las primeras criticas estioron francament negativas. Asinas, en Variety se deciba sobre un teatro a on s'exhibiba que:

Dimpués de cuatro semanas de buenos negocios con Flesh and the Devil, parixe que practicament se morirá de fambre ista semana. (The General) ye luent d'estar divertida... (y) ...ye un fracaso.

Mordaunt Hall, o critico cinematografico d'o The New York Times, afirmó:

A producción en sí ye prou bien montada, pero no se puet decir que sía una cinta muit divertida (...) Isto no ye tan bueno como los anteriors treballos d'o Sr. Keaton.

Mordaunt Hall

En Los Angeles Times se deciba que:

No ye ni una comedia pura ni un drama emocionant ...(que)... esturruza terriblement con una persecución larga y fatigosa d'una locomotora por una atra

En Motion Picture Classic la calificaban de:

...comedia suau sobre la Guerra civil, que no ye pas a lo livel d'os millors estándards de Keaton

En o New York Herald Tribune deciban que:

...(ye una cinta) ...larga y tediosa, lo menos divertiu que mai no ha feito Keaton

O escritor Robert E. Sherwood afirmó que:

Belún podría heber-li dito a Buster Keaton que ye difícil de fer reír en veyer hombres que mueren en un campo de batalla.

Robert E. Sherwood

Criticas posteriors

Tanimientres la critica posterior ha moficicau muitismo ixas primeras consideracions sobre The General, que hue ye considerada como un d'os grans clasicos d'o cine mudo y mesmo como una obra mayestra y una d'as mllors cintas d'a historia d'o cine.

Asinas, o critico cinematografico britanico David Robinson diz:

Cadaguna d'as tomas tien l'autenticidat y la composición correcta sin pretensions d'una fotografía d'a Guerra civil de Mathew Brady

David Robinson

Ta lo critico britanico Raymond Durgnat:

Puet estar que The General sía la (cinta) mas polida on a suya fotografía grisa, lo suyo buen uello ta las linias vivaces y burciadas d'as grans locomotoras, con os suyos quitanieus en forma de proa, con o suyo movimiento polidament sosteniu

Raymond Durgnat

En 2015 la critica cinematografica Eileen Jones, en a revista Jacobin, con una ideolochía d'ezquierda politica, calificaban a The General como una obra mayestra comica, pero a la vegada la criticaban por o suyo negacionismo y promoción d'a leyenda negacionista d'a Lost Cause of the Confederacy ("causa perdida d'a Confederación", un tipo de negacionismo historico consistent en afirmar que la luita d'os Estaus Confederaus d'America no teneba relación con a luita contra la esclavitut y estió una luita chusta y heroica).

En a revista Sight & Sound, que fa una enquesta decenal sobre la lista d'as millors cintas, os criticos clasificoron a The General en a posición numero 8 en 1972 y en a posición 10 en 1982, estando en a posición 34 en a lista d'os criticos en 2012 y en a posición 75 en a lista d'os directors. En 2002 o critico Roger Ebert incluyó The General en a 10^ena posición en a suya lista The Great Movies.

Ta lo critico espanyol Alberto Abuín:

The General significó l'inicio d'a fin d'o chenial, en toz os aspectos, Buster Keaton. A decadencia, anyos dimpués "esborrada" gracias a los sempiternos escritors de Cahiers du Cinéma, que reividicoron a cinta como la obra mayestra que ye. Pero ixo estió muito dimpués d'as suras criricas recibidas cuan s'engueró, porque bien pocos consideroron de buen gusto reír-se'n d'a Guerra civil, lamentable episodio en a propia historia d'Estaus Unius

Alberto Abuín

Ta lo critico Joaquín Juan Penalva:

Produz una mica de vertido d'escribir sobre una cinta como El maquinista de la General en estar, sin garra dandalo, debant d'una d'as obras mayestras d'o seteno arte, no nomás d'a comedia u d'o cine mudo, so que d'o cine en cheneral. En o momento d'estar enguerada la cinta recibió una fría acullida tanto por a critica como por o publico, puet estar porque narraba en clau de comedia un episodio d'a Guerra de Secesión, pero la verdat ye que dende alavez no ha feito mas que creixer, y la suya factura sorprén cuasi 90 anyadas dimpués d'estar enguerada

Joaquín Juan Penalva

Mesuras de preservación

En 1989 a Biblioteca d'o Congreso d'os Estaus Unius establió lo National Film Registry con a misión de seleccionar ta la suya preservación ta lo futuro de cintas con caracteristicas culturalment, historica u estetica significativas y en ista primera tangada de cintas incluyó The General; coo comparación, atras cintas incorporadas en ixa primera tangada u edición estioron The Best Years of Our Lives, Casablanca, Citizen Kane, Gone with the Wind, Singin' in the Rain, Snow White and the Seven Dwarfs, Star Wars Episode IV: A New Hope, Sunset Boulevard u The Wizard of Oz.

Se veiga tamién

• Cine en 1926.
• Cintas de 1926.

Vinclos externos

• Se veigan as imáchens de Commons sobre The General.
• (en) The General en YouTube.
• (en) The General en Internet Movie Database.
• (en) The General en Rotten Tomatoes.
• (en) The General en TCM Movie Database.
• (en) The General en AllMovie.
• (en) / (es) The General en FilmAffinity.
• (en) The General en l' American Film Institute Catalog de l'American Film Institute.
• (en) The General en a International Buster Keaton Society.
• (en) The General en Allociné.

• Datos: Q850159
• Multimedia: The General / Q850159