Taifa de Denya

De Biquipedia
Ir a la navegación Ir a la búsqueda
دانية والبليار
ṭāʾifa Dāniya

Taifa de Denya
3by2white.svg 1010 — 1091 3by2white.svg
Situación de
Capital Denya
Idioma oficial
 • Atros idiomas
Arabe
Mozarabe levantín
Relichión Musulmana sunita
Gubierno Emirato
Periodo historico Edat Meya
 • Independencia de lo Califato de Cordoba 1010
 • Anexión a la Taifa de Zaragoza 1091

Lo Reino u Taifa de Denya estió un reino musulmán que amainixió quan se desfació lo Califato de Cordoba, enta lo 1010. La fundó lo emir y antigo esclavo d'orichen eslavo Muchahid en un chicot territorio formato por Bairén, Orba, Alteya, Callosa, Sagra, Cocentaina y Bocairent y lurs redolatas, tenendo Denya u Dàniyya como capital. A elite la formaban antigos soldatos musulmans d'Europa de l'Este, estando una de las taifas eslavonas. Muchahid teneba lo cargo de gobernador dica 1013, quan se proclamó rechent de l'Omeya Al-Moaiti, a qui deixó mandar no más que en qüestions relichiosas.

En 1015 conquirió las islas Balears y los meses vinients atacó Cerdenya. Derrotó a los sardos y s'establió en lo Campidanu, pero los chenoveses y pisans la'n facioron fuera. En 1016 deposó a Al-Moaiti y dió las funcions relichiosas suyas a Abdallah ben Obeidallah, de qui estió rechent teorico dica 1018 por lo menos, quan Denya y Balears reconoixioron como califa a Al-Murtada u Al-Mostadi. En 1021 ocupó Elch, Oriuela y Alicant que perteneixeban a Khairan d'Almería; ixe mesmo anyo tamién Muchahid nomenó a lo suyo sobrín Abd Allah gobernador de las Balears (morió en 1036). En los anyos vinients fació uns quantos ataques navals a las costas catalanas, destacando lo de 1023 a Tortosa. Lo 1038 ocupó Lorca y lo norte de Murcia. En 1039 atacó Valencia, que dependeba d'un emir d'Almería, pero no consiguió ocupar-la y en 1040 firmoron la paz. Tamién en 1040 asoció a lo gobierno a lo suyo fillo Hassan, pero en 1043 lo apartó de la poder probablement por conspirar.

Con Muchahid, la Taifa de Denya se desvinió un important centro maritimo y comercial; se i acunyaba una moneda que duró dica la invasión almuade, estando la Taifa de Denya lo primer reino taifa en acunyar moneda.

Muchahid morió en 1044 y lo succedió lo suyo fillo Ali ben Muchahid Iqbal al-Dawla. En 1045 reconoixioron como emir en Tortosa a Mokatil, probablement chirman de Muchahid. En 1058 Ali atorgó a lo bispe de Barcelona churisdicción sobre las ilesias de lo suyo reino. Lo mesmo anyo l'antigo Emir de Tortosa, Labib, con l'aduya de la Taifa de Zaragoza recuperó la poder, pero en 1059 Alí tornó ta Tortosa con un exercito y posó en la trono a Yala al-Amiri. En 1076, Al-Muqtadir de Zaragoza ocupó Tortosa y continó contra Denya que tamién ocupó. Alí fuyó a las Balears on lo gobernador local Abdallah al-Murtada lo rezibió pero no lo reconoixió como emir, títol que asumió el mesmo. Por 5 anyadas, Denya dependió de la Taifa de Zaragoza.

Al-Muqtadir morió en 1081 y dixó Denya, Leida y Tortosa a lo suyo fillo Al-Mundir Imad al-Dawla que establió la suya capital en Exatiba, y a sobén se clama Taifa d'Exatiba. Ocupó Alicán, que heba caito en mans de Murcia (alavez de la Taifa de Sevilla). En 1082 fació liga con Berenguer Remón II de Barcelona contra lo suyo chirmán Abu Amir Yusuf ben Ahmad ben Hud al-Mutamin de Zaragoza, y unas fuerzas aliadas asetioron Almenar pero los zaragozans ganoron y ensobinoron a lo conte de Barcelona, que poco dimpués tornaría a estar libre. Lo mercenario castellán Rodrigo Díaz de Vivar, a lo servicio de los zaragozans combatió contra l'emir d'Exatiba.

En 1086 lo rei Al-Qadir de Valencia atacó Exatiba, y Al-Mundir demandó aduya a los suyos aliatos lo conte de Barcelona, lo rei d'Aragón y Pamplona y lo conte d'Urchel. Quan los catalans abanzoron enta Valencia los walís de Murviedro, Segorb, Exerica y Almenara se declaroron independients. Derrotoron A Al-Qadir A man d'Exatiba. Los catalans quereban atacar la ciudat quan los Al-Mutamin de Zaragoza atacó Leida, encara que los aragoneses tamién atacaban y li prenioron Monzón por un tiempo, tornoron ta Leida pa luitar contra los zaragozans, y los facioron tornar-se'n.

En 1087 morió Abdallah al-Murtada de las Balears y las islas declaroron la suya obediencia A Al-Mundir. En 1089 lo emir d'Exatiba y los catalans atacoron Valencia aproveitando que lo Cit yera un tiempo fuera, en Castiella. Lo rei castellán li mandó tornar ta Levant pa aduyar A lo suyo protechito lo rei de Valencia Al-Qadir, y debant de los mercenarios bien entrenatos los catalans y los suyos aliatos locals rebloron y se'n fueron ta Requena. En la campanya de 1090, los catalans y castellans s'encaroron en la Batalla de Pinar de Tebar, que se piensa que estió en Penya Roya. Lo Cit derrotó a Berenguer Remón II, cayó presionero y lo deixó marchar dimpués de pagar un buen rescate.

En 1090 morió Al-Mundir y repartió lo suyo reino: Leida y Tortosa pa lo suyo fillo Sulaiman Sayyid al-Dawla, y Exatiba, Denya y las Balears pa Mobaxer Nasir al-Dawla. Los zaragozans ocuporon allora Leida mientres los valencians albanzoron ta lo sud y ocuporon Elch y lo castiello de Polop.

En 1091 l'almorabet Yusuf se presentó en Denya que ocupó con muita facilidat. Mobaxer fuyó ta las Balears.

Denya quedó en mans de los almorabetz dica lo 1145. Dende 1145 dica 1170 pasó ta la taifa de Valencia y en 1170 a los almuades, dica 1225. Atra vegata dependió de la nueva taifa de Valencia dica 1244, quan la ocuporon los exercitos aragoneses que conqueriban Valencia pa lo rei Chaime I d'Aragón.