Morrena de Senegüé

De Biquipedia
Ir a la navegación Ir a la búsqueda
Morrena frontal de Senegüé
Morrenas laterals y terminal

A morrena de Senegüé ye una morrena terminal glaciar situada chunto a la localidat de Senegüé, en o municipio de Samianigo. La creyó a chelera d'o Galligo que baixaba dende a val de Tena dica iste puesto. Ye un tozal alargau con forma de meya luna y, encara que data de fa más de 35.000 anyos, ye prou bien conservada.

Formación[editar | editar código]

Mientres o maximo d'o Pleistoceno, a chelera d'o Galligo gosaba tener una lorgaria de dica 44 km, estendillando-se dende os altos picos d'a val de Tena dica a plana entre Senegüé y Samianigo. A suya fondaria en bells puntos yera de dica 400 metros. L'amplaria, entre Gavín y Sobremont plegaba a os 4 kilometros.

En depositar-sen aquí os materials arrocegaus por a chelera facioron d'entibadera d'as auguas de fusión d'ista, formando-se un laco entre Biescas y Senegüé que tenió un relleno de depositos lacustres de quasi 100 metros a l'altaria d'Oliván. A erosión de l'agua remató por crebar o cordón morrenico con o paso d'o tiempo, liberando-se asinas as auguas.

Centro d'Interpretación d'as Cheleras de Senegüé[editar | editar código]

Dende fa bells anyos se troba en Senegüé o Centro d'Interpretación d'as Cheleras, situau en a Torre Esfensiva d'os Baguer, edificio d'o sieglo XVI, y l'antiga casa d'o Mayestro, edificios restauraus por l'Asociación de Vecins de Senegüé.

O centro d'interpretación se divide en 4 salas distribuyidas en tres plantas. En a primera d'as salas se pueden trobar mapas y fotografías aerias d'o puesto a on se troba a morrena. A continación bi ha una segunda sala a on s'esplanica a traviés d'un vidio o fenomen d'o glaciarismo. A tercera sala, en o segundo piso, ye adedicada a conceptos chenerals sobre cheleras, periodizacions y dinamicas. En a zaguera sala bi ha información sobre as cheleras d'o Pireneu aragonés, especialment a chelera d'o Galligo.

Se veiga tamién[editar | editar código]

Vinclos externos[editar | editar código]