Ir al contenido

Lenato

De Biquipedia
(Reendrezau dende Lenau)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Una casa con lenato de lenastras.

O lenau (en as variedaz d'aragonés central que mas conservan oclusivas xordas intervocalicas lenato, y en ribagorzano llenau[1]) ye un tipo de tellau cubillato con lenastra u con losetas de pizarra.

Os lenaus fan parte d'o paisache tipico de l'Alto Aragón, aon materials como a piedra s'ha preferiu antes que atros pa cubillar as casas.

Bel vocabulario[editar | modificar o codigo]

Tradicionalment en Sobrarbe, es lenatos teneban una bastida de bigas que se diz fustes, filas y costalers, sobre as que se mete l'entarabidato de varas de senera u de canyizo u por contra un maderato de rechas,[2] y tot se feba aposentar con tillo.

A bizquera[2] ye una fileta u filetón (mes fino que as filas) que se mete a meya altura, transversal sobre os fustes y por tanto paralela a la cuminera, si o lenato ye extenso, y sirve pa privar u retardar asinas que se combe.

Os fustes de refuerzo u «costalers» tamién pueden decir-se «crepos» en Sobrarbe.[2] En Ribagorza, estas bigas costaleras reciben o nombre de «quebros»,[3] y son os «capirons» en ansotano.[4] A biga en a cual remata la bastida y a traviés d'a cual se refirma sobre a frontera se diz biga zapatera por eixemplo en Sobrarbe[2] y val d'Ansó[4] u biga paretera en Ribagorza.[3] A gran biga central y mas alta d'a bastida ye la cuminera, u llomera en Ribagorza.[3]

A tixera[2] ye una estructura triangular de bigas trescruzadas que forman una escuadra de refuerzo pa lo lenato tipico de dos versants.

Referencias[editar | modificar o codigo]

  1. BALLARÍN CORNEL, Ángel, Diccionario del benasqués; Zaragoza, 1978. Consultable en linia a traviés de (an)(es)(fr)(en) Diccionario del benasqués. Consultato lo 2 de chinero de 2020
  2. 2,0 2,1 2,2 2,3 2,4 (es) WILMES, Rudolf. El Valle de Vió. Estudio etnográfico-lingüístico de un valle altoaragonés. P. 142. Ed. PRAMES. Zaragoza, 1996. ISBN 84-87601-64-2
  3. 3,0 3,1 3,2 FERRAZ CASTÁN, Vicente, Vocabulario del dialecto que se habla en la Alta Ribagorza (1934) (Facsímil). Aladrada ediciones. Zaragoza, 2013. ISBN 978-84-940886-6-7
  4. 4,0 4,1 BARCOS, Miguel Ánchel, El Aragonés Ansotano: estudio lingüístico de Ansó y Fago; Institución «Fernando el Católico» + Gara d'Edizions. Zaragoza, 2007. ISBN 978-84-8094-058-0

Se veiga tamién[editar | modificar o codigo]

Enlaces externos[editar | modificar o codigo]