Legally Blonde

Iste articlo ye sobre una cinta de cine de comedia estausunidense de l'anyo 2001, ta atros usos, se veiga Legally Blonde (desambigación).

Legally Blonde
Títol	Legally Blonde
Póster teatralizau d'a cinta.
Ficha tecnica
Dirección	Robert Luketic
Dirección artistica	Daniel Bradford
Producción	Marc E. Platt Ric Kidney
Disenyo de producción	Missy Stewart
Guión adaptau	Karen McCullah Lutz Kirsten Smith
Basau en	Legally Blonde, novela d'Amanda Brown
Musica	Rolfe Kent
Fotografía	Anthony B. Richmond
Montache	Anita Brandt-Burgoyne
Vestuario	Sophie Carbonell
Actors	Reese Witherspoon Luke Wilson Selma Blair Matthew Davis Victor Garber Jennifer Coolidge Ali Larter Jessica Cauffiel Alanna Ubach Raquel Welch
Datos y cifras
País(es)	Estaus Unius
Anyo	2001
Debantadera	26 de chunio de 2001 Los Angeles (California, Estaus Unius)
	13 de chulio de 2001 Estaus Unius
Chenero(s)	Cine de comedia Cine de chudicios
Durada	96 min.
Idioma(s)	Anglés
Companyías
Productora(s)	Type A Films Marc E. Platt Productions Metro-Goldwyn-Mayer
Distribución	MGM Distribution Co. 20th Century Fox
Presupuesto	18 millons de dólars
Recauto	141,8 millons de dólars
Succesión de cintas
Succedita por	Legally Blonde 2: Red, White & Blonde
Informacions en bases de datos especializadas:

Reese Witherspoon, Elle Woods, en una imachen de 2016.

Luke Wilson, Emmett Richmond], en una imachen de 2016.

Selma Blair, Vivian Kensington, en una imachen de 2011.

Matthew Davis, Warner Huntington III, en una imachen de 2013.

Victor Garber, Profesor Callahan, en una imachen de 2017.

Jennifer Coolidge, Paulette, en una imachen de 2012.

Holland Taylor, Profesora Stromwell, en una imachen de 1994.

Ali Larter, Brooke Taylor Windham, en una imachen de 2010.

Jessica Cauffiel, Margot, en una imachen de 2009.

Alanna Ubach, Serena, en una imachen de 2019.

Oz Perkins, Dorky David.

Linda Cardellini, Chutney, en una imachen de 2011.

Meredith Scott Lynn, Enid, en una imachen de 2007.

Raquel Welch, Mrs. Windham Vandermark, en una imachen de 2010.

Edificio d'a Universidat de California en Los Angeles, tal como amanixe en a cinta.

Robert Luketic, Kirsten Smith y Karen McCullah en un posau con un fan mientres una exhibición d'a cinta en 2016.

Legally Blonde (títol orichinal en anglés, Legalment sora en aragonés, enguerada en Aragón con o títol en castellano de Una rubia muy legal, en aragonés Una sora muit legal) ye una cinta de cine estausunidense de cine de comedia chudicial de l'anyo 2001 dirichida por Robert Luketic (estando la suya primer cinta como director) seguntes un guión adaptau por Karen McCullah Lutz y Kirsten Smith basau en Legally Blonde, una novela d'Amanda Brown d'o mesmo anyo 2001. Con una Banda Sonora Orichinal de Rolfe Kent, una dirección de fotografía de Anthony B. Richmond y producida por Marc E. Platt y Ric Kidney ta las productoras Type A Films, Marc E. Platt Productions y Metro-Goldwyn-Mayer, en l'elenco d'a cinta se troban, entre d'atros actors, Reese Witherspoon, Luke Wilson, Selma Blair, Matthew Davis, Victor Garber, Jennifer Coolidge, Ali Larter, Jessica Cauffiel, Alanna Ubach y Raquel Welch.

En a cinta se conta la historia d'Elle Woods, una mesacha miembro d'una chermandat estudiantil que preba de recuperar a su novio Warner Huntington III en obtenendo un títol de licenciada en Dreito por a Facultat de Dreito d'a Universidat de Harvard. A trama argumental se basa en as experiencias d'a propia autora d'a novela orichinal, Amanda Brown, mientres os suyos estudios en a Facultat de Dreito d'a Universidat de Stanford, en estar ella una persona intresada en o mundo d'a moda y a belleza y leyer Elle, uns comportamientos que topaban con os comportamientos habituals d'os suyos companyers d'estudios. En l'anyo 2000 Brown conoixió a lo productor Marc E. Platt, qui l'aduyó a transformar o suyo argumento en una novela. Platt tamién contractó a los guionistas Karen McCullah Lutz y Kirsten Smith ta que redactasen un guión cinematografico en adaptando la novela. O prochectó clamó l'atención de Robert Luketic, un australiano que heba plegau en Hollywood dimpués de l'exito d'o suyo primer curtometrache comercial en Australia, Titsiana Booberini.

L'enguero d'a cinta estió lo 13 de chulio de 2001 en obtenendo a-saber-lo d'exito entre lo publico, en recaudando 141,8 millons de dólars en total en toz os países, contra un presupuesto de nomás que 18 millons, en recebindo amás criticas moderadament positivas que centraban lo milor d'a cinta en l'actuación d'a suya protagonista, Reese Witherspoon. La cinta recibió dos nominacions a los Premios Globos d'Oro (Millor Cinta y Millor Actriz) en a suya 59^ena edición y recibió un Premio MTV Movie & TV a la Millor Actriz.

L'exito d'a cinta prevocó la creación d'una franquicia propia d'a cinta que se tradució en una serie de treballos: la secuela Legally Blonde 2: Red, White & Blonde (2003, Charles Herman-Wurmfeld), un spin-off directo ta video (Legally Blondes, 2009, Savage Steve Holland), y un musical, Legally Blonde enguerau en 2007 en San Francisco y Nueva York y protagonizau por Laura Bell Bundy. En 2020 s'anunció que s'heba contractau a Mindy Kaling y Dan Goor ta preparar un nuevo guión d'una cinta que heba d'enguerar-se en 2022 pero lo prochecto s'ha posposau sin calendata definida.

Argumento

Elle Woods ye una mesacha sora estudiant de merchandising de moda y miembro destacau d'una chirmandat estudiantil con un novio de buena familia, Warner Huntington III. Bel día lo suyo novio la convida a cenar en un luxoso restaurant y Elle creye que ye ta pedir-la en matrimonio, pero Warner li diz que creba la relación en considerar que Elle no ye una persona prou dosera y no estará la muller adecuada ta lo futuro senador d'o Senau d'Estaus Unius que él creye será en rematar los suyos estudios en a Facultat de Dreito d'a Universidat de Harvard que principará nomás que remate lo verano. Elle queda escachuflada, pero bien luego traza un plan ta recuperar a lo suyo novio: ella tamién estudiará Dreito en a Universidat de Harvard y asinas lo podrá convencer de que sí que en ye, la muller adecuada ta él. alavez escomencipia un duro treballo de preparación ta l'examen d'acceso y finalment Elle obtién una nota prou elevada en a preba d'admisión en a facultat de Dreito, una preba standardizada existent en Estaus Unius ta matricular-se en bella facultat de Dreito, y ye admesa en a Universidat de Harvard.

En plegar en Harvard, que se troba en Cambridge (Massachusetts) cuan ella procede de California, Elle troba una mentalidat bien diferent en os suyos companyers de clase y se li fa difícil d'adaptar-se'n. Tamién consigue trobar a Warner, qui ye un d'os suyos nuevos companyeros d'estudios, pero que ye festechando y s'ha comprometiu con Vivian Kensington, la suya antiga novia; Vivian se rechufla d'Elle y fa ta ridiculizar-la en clase, en considerar que Elle ye una simplarra. Un d'os profesors tién a costumbre de contractar ta lo suyo bufet d'avogaus a estudiants destacaus con buenas notas, y Elle li diz a Warner que ella fará un poder ta estar una d'as seleccionadas, pero Warner no creye que ella pueda estar esleyida, en considerar que no tien as capacidaz intelectuals que s'amenistan ta estar-lo. En parar cuenta de que Warner mai no la considerará como una persona con suficient madureza intelectual, Elle decide dmostrar-le que sí que en ye y luitar por una d'istas plazas en o bufet.

Cuan Callahan, o profesor en cuestión, fa l'anuncio d'os estudiants que dentrarán en o suyo bufet, diz que entre éls se troban Warner y Vivian pero tamién Elle, ta sorpresa de Warner y Vivian. O primer caso que se lis presenta ta treballar-ie ye o caso d'una instructora de fitness, Brooke Windham, a qui Elle conoixeba d'antes mas en haber estau una d'as suyas alumnas en as suyas clases de fitness, y a qui Elle valora y respecta. Brooke ye acusada de l'asasinato d'o suyo esposo, un hombre de muita mas edat que ella, estando-ne lo testigo principal de l'acusación la filla d'o falleixiu, qui viviba con su pai y con a suya madrastra Brooke. Brooke diz a los suyos avogaus que ella tien una coartada pero que no lis quiere explicar, debant d'a suya incomprensión, y Elle decide visitar a Brooke en a garchola a on se troba dica lo chudicio y conoixer cual ye ixa coartada; finalment, Brooke li explica que li yeran fendo una liposucción pero que si se conoix que s'heba sometiu a una intervención d'ixe tipo la suya reputación como instructora de fitness s'arruinaría. Elle marcha d'ista entrevista convencida d'a inocencia de Brooke y decidida a contrimostrar-la. Cuan Callahan desiche a Elle que li diga cual ye ixa coartada que ha conseguiu conoixer, Elle se niega y nomás li diz que ye muit buena. Una d'as consecuencias d'a suya negativa a revelar-la ye que Vivian veye a Elle con mas respecto y finalment li confiesa que Warner no heba obteniu la nota que s'amenistaba ta acceder a la Universidat y que nomás que ha podiu dentrar-ie porque la suya familia l'ha aduyau con os suyos contactos.

Bella tarde, Callahan preba de seducir a Elle, qui creye alavez que nomás que por ixo l'ha contractau ta lo suyo bufet. Decide albandonar lo bufet y la facultat y tornar en a suya casa en California, pero finalment li explica los feitos a Emmett Richmond, qui ye un d'os chóvens asociaus de Callahan en o bufet y que creye que Ellen tien un gran potencial como avogada, y Emmett finalment convence a Elle ta que no marche. Cuan Brooke conoix los feitos, decide despedir a Callahan como avogau y sustituirlo por Elle, a qui Emmett refirma como avogau en exercicio ta que encara que sía una estudiant pueda estar l'avogada de Brooke en o chudicio. Agora nomás cal que Elle consiga prebar la inocencia d'a suya nueva y primera client. En o chudicio posterior, Elle, gracias a las suyas conoixencias d'o campo d'a moda, consigue desmontar las acusacions y finalment consigue que confiese la filla d'a victima, que ye la verdadera culpable de l'asasinato.

Elenco

Actor	Papel	Notas
Reese Witherspoon	Elle Woods
Luke Wilson	Emmett Richmond
Selma Blair	Vivian Kensington
Matthew Davis	Warner Huntington III
Victor Garber	Profesor Callahan
Jennifer Coolidge	Paulette
Holland Taylor	Profesora Stromwell
Ali Larter	Brooke Taylor Windham
Jessica Cauffiel	Margot
Alanna Ubach	Serena
Oz Perkins	Dorky David
Linda Cardellini	Chutney
Bruce Thomas	Treballador d'UPS
Meredith Scott Lynn	Enid
Raquel Welch	Mrs. Windham Vandermark
Samantha Lemole	Claire
Kelly Nyks	Aaron
Ted Kairys	Gerard
Michael B. Silver	Bobby
Kimberly McCullough	Amy
Shannon O'Hurley	Fiscat d'o districto Joyce Rafferty
Greg Serano	Enrique
Francesca P. Roberts	Marina R. Bickford
Lisa Arch	Vendedora d'a boutique
Natalie Barish	Clienta d'a manicura
Cici Lau	Manicura en Los Angeles
Allyce Beasley	Asesora en Los Angeles
Kevin Cooney	Chefe d'admisions
Ted Rooney	Mesache d'admisions
David Moreland	Mesache d'admisions
Wayne Federman	Mesache d'admisions
James Read	Pai d'Elle
Tane McClure	Mai d'Elle
Niklaus Lange
Doug Spinuzza	Ivan Berliner
Lisa K. Wyatt	Garcholera
Jason Christopher	Chuck
Corinne Reilly	Periodista
Victoria Mahoney	Periodista
Lacey Beeman
Melissa Anne Young	Cheerleader sora
Brody Hutzler	Grant
Chaney Kley	Brandon
John Cantwell	Maurice
Ondrea De Vincentis	Aduyant de Callahan
Terence Michael	Recepcionista
Nectar Rose	Estudiant de primer anyo
Jodi Harris	Miembro d'a chermandat estudiantil
Patricia Kimes	Motorista sora
Sasha Barrese	Mesacha
Kelly Driscoll	Conductora sora
Elizabeth Matthews	Miembro d'a chermandat estudiantil
Kennedy Stone	Miembro d'a chermandat estudiantil
Gary Ambrosia	Estudiant en Harvard	No acreditau
Joan Blair	Presonera	No acreditada
Christopher Bunyan	Oficial de policía	No acreditau
Ali Chen	Manicura	No acreditada
Gary Castro Churchwell	Estudiant de Harvard	No acreditau
Curt Clendenin		No acreditau
Joe Dolan	asistent en a sala d'o chudicio	No acreditau
Melanie Hope Gassaway	Miembro d'a chermandat estudiantil	No acreditada
Amber Goetz	Miembro d'a chermandat estudiantil	No acreditada
Matt Hall		No acreditau
Carol Hatchett	Masachista	No acreditada
Mark Heidelberger	Estudiant en Harvard	No acreditau
Richard Hillman	Estudiant en l'instituto	No acreditau
Seth Adam Jones	Estudiant	No acreditau
John Kapelos	Dewey Newcombe	No acreditau
Charles M. Kerper	Chugador de fútbol americano	No acreditau
Joanna Krupa		No acreditada
Dean Mason	Garcholera	No acreditau
Paul McMichael	Estudiant	No acreditau
Beverly Polcyn	Bailarina en o salón de belleza	No acreditada
Kate Roxburgh	Muller en a fiesta	No acreditada
Scott Ryan	Mesache con mirallos	No acreditau
Rachel Ryling	Miembro d'a fraternidat	No acreditada
Nikky Smedley	Papel menor	No acreditau
Jimmy Star	Asistent en a sala d'o chudicio	No acreditau
Dylan White	Periodista	No acreditau
Jenna Z. Wilson	Presonera	No acreditau

Producción

Chenesi

Amanda Brown publicó en 2001 la suya novela Legally Blonde basando-se en as suyas propias experiencias mientres os suyos estudios en 1993 en a Facultat de Dreito d'a Universidat de Stanford. En estar ella una persona intresada en o mundo d'a moda y a belleza y leyer Elle, uns comportamientos que topaban con os comportamientos habituals d'os suyos companyers d'estudios, tenió a-saberlos problemas. Cuan heba leyiu un folleto de propaganda d'a facultat adrezau a las mullers churistas de Stanford heba pensau que si asistiba en ixa reunión podría trobar-ie atras mullers malvas. Tanimientres,

...asistiei a la reunión i ixo no yeran pas mullers. Yeran personas francament de morros. La muller que la dirichiba adedicó tres anyadas en Stanford en tractando de cambiar o nombre de "semestre" a "ovmestre". Esclaté en risas y alavez podié veyer que toz en ixa reunión preneban ixo en serio. Asinas que no facié amigos en ixe puesto.

Brown escribió a sus pais bellas cartas en explicando-les as suyas experiencias en a facultat y en primeras pensó escribir un ensayo sobre las suyas experiencias en Stanford, pero un achent literario li recomanó que en cuentas d'ixo transformase lo suyo material enta una novela. Brown estudió en tallers d'escriptura y finalment remató lo manuscrito d'o libro, pero d'entrada no trobó qui li publicase. Bel tiempo dimpués tornó a ninviar o suyo manuscrito, pero ista vegada escrito en papel de color de rosa (anecdota que se recupera en a cinta), y ixó clamó l'atención d'un achent, qui lo mesmo día lo ninvió a estudios cinematograficos y editorials, esclatando una autentica guerra d'ofertas dende los estudios cinematograficos dica que finalment la Metro-Goldwyn-Mayer en mercó los dreitos cinematograficos; la mai d'Amanda pensaba que mesmo podría plegar a obtener dica 10.000 dólars, pero finalment recibió muitos mas diners. Tanimientres, respective d'o libro garra interpresa d'o sector editorial s'intresó.

O productor cinematografico Marc E. Platt en leyer o manuscrito inedito s'intrigó por o personache d'Elle Woods:

Ixo que me rabatió d'ista historia ye que ye hilarant, sexy, y a la vegada refortaleix (...) o mundo mira a Ellen y veye belún que ye soro y poliu, pero garra cosa mas. Elle, d'atra man, ni se chuzga a si mesma ni a garra atra persona. Piensa que o mundo ye chenial, ella ye chenial, toz son chenials y garra cosa puet cambiar ixo. Ye realment una heroína moderna incontenible.

Marc E. Platt

En a primavera de 2000, os guionistas Karen McCullah Lutz y Kirsten Smith estioron dos días en o campus d'a Universidat de Stanford en rechirando ta la elaboración d'o guión. Paralelament, Robert Luketic, un director australiano que plegaba en ixas envueltas en o cine de Hollywood dimpués de l'exito d'o suyo primer treballo profesional en o cine australiano, un curtometrache titulau Titsiana Booberini (1997Y y que buscabna un prochecto ta fer una cinta revolucinara y garra convencional, s'intresó por o prochecto:

Heba estau leyendo mientres dos anyadas, sin trobar garra cosa a on i podese meter a mía marca personal, dica que apareixió Legally Blonde.

Robert Luketic

Desembolique

Luketic explicó que cuan decidió empentar o prochecto no sabeban que la cinta s'estructuraría finalment como en tractando l'empoderamiento femenín, so que pensaban mas en una cinta de chambretas mulladas y peitos. Diz Luketic que "de feito lo primer guión d'a cinta yera atreviu y obsceno, pareixiu a American Pie". O chudicio por asasinato no feba pas parte d'a trama argumental i en ixe guión inicial Elle remataba tenendo una relación sentimental con un profesor, pero finalment decidioron transformar o guión enta un atro que amostrase la capacidat de superación de l'adversitat. Cuan decidirion iste cambio en a trama argumental, s'adhibioron nuevos personaches, como ye o caso de Paulette, perfeccionando mas os detalles.

Ta lo papel protagonista d'a cinta, se consideró a Charlize Theron, Gwyneth Paltrow, Alicia Silverstone, Katherine Heigl, Christina Applegate, Milla Jovovich y Jennifer Love Hewitt, pero Luketic dició que "dende la pachina cinco d'o guión ya sabebai que querebai que Reese estase qui interpretase ixe papel" y que "querebai a belún con seriedat y cerebro", que "teneba que haber-ie mas cosas dezaga d'una cara y Reese encaixaba en ixo perfactament". Witherspoon estió de feito la primera persona en leyer completament o guión y no se ninvió a garra atra actriz. O director de cásting d'a cinta, Joseph Middleton, ya heba treballau con Reese Witherspoon en as cintas The Man in the Moon (1991, Robert Mulligan) y A Far Off Place (1993, Mikael Salomon) y refirmó a elección de Reese ta lo papel nomás que Platt en charró. Applegate, a qui se li heba oferiu, refusó lo papel, y Platt suchirió ufrir-lo a Britney Spears, pero se descartó dimpués d'a suya actuación en o programa de televisión Saturday Night Live. Tanimientres, cuan se decidioron finalment por Reese Witherspoon la productora d'a cinta, Metro-Goldwyn-Mayer, no yera masiau convencida porque o papel de Tracy Flick que heba interpretau en Election (1999, Alexander Payne) la heba dixau encasillada en ixe tipo de papels. "Pensoron que yo yerai una avrispa", dició posteriorment Witherspoon. De feito Witherspoon heba estau descartada ta cuantos papels dimpués d'a suya interpretación en Election. Lo suyo apoderau finalment li aconselló que se reunise con o director d'a Metro, porque no aprebaría que li concedisen o papel en pensar que ella yera realment como lo personache que interpretaba en Election, y li aconselló que se presnetase en a entrevista con un vestiu sexy. Witherspoon tenió cuantas sesions d'audicions ta lo papel y tenió bellas reunions con Luketic ta tractar de cómo enfocar o personache porque yera una mica dificil que a lo publico li dase angunia por una mesacha que conduciba un Porsche.

Ta lo papel de Paulette, la manicura amiga d'Elle, esleyoron a Jennifer Coolidge, encara que se deciba que Courtney Love y Kathy Najimy teneban intrés en ixe papel. Ta interpretar a Vivian, a nueva novia de Warner, la guionista Kirsten Smith suchirió a Chloë Sevigny pero finalment se decidioron por Selma Blair, qui ya heba treballau anteriorment con Witherspoon en Cruel Intentions (1999, Roger Kumble), fendo asinas que la suya buena relación aduyase a lo suyo treballo en ista cinta. Ali Larter heba d'interpretar a una d'as miembros d'a cermandat d'estudiants femenina pero nomás que leyó lo guión s'entusiasmó con o pepal de Brooke Taylor Windham, la instructora de fitness acusada d'asasinato.

Cuan os guionistas yeran treballando en o guión en configurando lo personache d'Emmett Richmond, en realidat en todo momento yeran pensando en l'actor Luke Wilson. Cuan se yeran fendo as audicions ta l'actor que heba d'interpretar-lo, Karen McCullah Lutz dició que "y si femos l'audición a Luke Wilson ta lo papel de Luke Wilson?". En primeras se pensó en l'actor Paul Bettany, pero en estar britanico l'equipo consideró que yera millor esleyir un estausunidense.

D'o guión se facioron dica 10 borradors diferents y se refeba constantment, mesmo treballando-ne de nueiz os guionistas en as succesivas reelaboracions. Una escena que finalment no se fació servir en o montache definitivo d'a cinta yera un cameo d'a chuez Judy Sheindlin, muit conoixida d'o publico estausunidense por o suyo reality show legal Judge Judy, pero finalmen se descartó cuan a chuez no podió fer a filmación. Alavez, Alanna Ubach fació la sucherencia de que se reescribise o papel ta estar interpretau por un personache masculín y que fese ixe papel Ryan Phillippe, qui yera casau con Witherspoon, pero la mesma Witherspoon consideró que no sería posible desembolicar ista idea.

Ta lo suyo papel, Witherspoon estudió a las mesachas miembros d'as chermandaz en os campus universitarios yu en sus puestos de reunions, asistindo-ne a cenas con ellas, encara que simpre lis feba la broma de que yera fendo un "estudio antropolochico". Witherspoon consideró que ixo li permitió de tener una visión mas ampla d'o suyo personache y d'admirar a las miembros d'as chirmandaz y lo suyo treballo, en veyendo cómo son d'educadas as miembros y cómo valoran las suyas amistaz femeninas y las relacions entre ellas. No estió la sola miembro de l'elenco en analizar o mundo universitario y mesmo los guionistas McCullah y Smith estioron bellos días en a facultat, mesmo asistindo a bellas clases de Dreito.

Reese Witherspoon en una entrevista sobre lo suyo personache, dició que:

Se veye a tanta gente polida en iste mundo, mas que mas en o mundo en que vivo, y muitos d'os tuyos primers instintos son descartar a las mullers que se dixan a pelleta en a suya apariencia como si no tomasen en serio o suyo treballo, las suyas relacions... Creigo que toz plegan naturalment en ixas conclusions... Yera intresada en explorar la diferencia entre [la forma en que] belún se veye y cómo la chent los percibe y cómo son en realidat. No soy necesariament alegre y esbrumosa todo lo tiempo, y por ixo ha estau un gran esfuerzo mantener-me despierta y la cantidat de cudiau y enerchía que ella mete en muitas cosas ha estau realment un desafío ta yo y tractar de transmitir ixa luchereza en todo momento ye treballo duro.

Reese Witherspoon

Disenyo de vestuario

A dinsenyadora de vestuario d'a cinta, Sophie De Rakoff (u Sophie Carbonell), se fació bien luego amiga de Reese Witherspoon nomás que descubrioron un intrés común en Dolly Parton. Se decidió que Elle heba de tener una color caracteristica y lo dilema yera de decidir qué color esleyir. Sophiy y Reese visitoron bellas chermandaz en considerando puet estar que bella tonalidat de color azul pero en rematar as visitas decidioron que a sola color que podeba representar a Elle yera la color rosa. Tamién estió important en a cinta la peluquería, porque Elle porta dica 40 peinaus diferents mientres a cinta.

Filmación

Dimpués d'a cinta, Luketic confesó que lo suyo primer día de rodache yera aterrau. Dica l'inte nomás que heba treballau en un curtometrache d'una durada de 10 minutos con un equipo de nomás que 10 personas y de rapiconte se trobaba "con 200 personas en l'equipo y tenendo suficients cambions y remolques como ta rodiar un cuartón".

Lo nombre d'a universidat a on se desembolicaba la historia heba estau un problema, en negarse la Universidat de Stanford y la Universidat d'o Sud de California a que s'emplegasen os suyos nombres en a cinta, en considerar a USC que en o guión bi heba masiaus estereotipos sobre una estudiant miembro d'una chermandat; finalment, a producción decidió d'ambientar a cinta en una universidat ficticia, dita CULA.

Encara que lo rodache d'a cinta s'escaició en a suya mayor parte en a Universidat de Harvard, bellas escenas se filmoron realment en a Universidat de California en Los Angeles, en o California Institute of Technology y en a Rose City High School en Pasadena (California), dende octubre dica aviento de 2000.

A famosa escena de "clocar-se, sacar peito" cuasi que no amanixe en a cinta. McCullah Lutz y Kirsten Smith explicoron dimpués en una entrevista que: "Marc E. Platt quereba una trama B ta Paulette (Jennifer Coolidge)", dició McCullah Lutz. "En primeras pensamos: Caldría fer un robo en a tienda?", dició Kirsten Smith, "Creigo que pasamos una semana u dos en tractando de descubrir cual heba d'estar a trama B y ista escena. Bi heba tramas criminals. Yeramos pensando escena tras escena y todo se sentiba muit extranyo tonalment". Mientres se trobaban pensando en un bar en Los Angeles, McCullah Lutz trobó la solución: que Elle amostrase a Paulette un movimiento ta enamorar a lo treballador d'UPS. En l'impulso d'o momento, Smith inventó un movimiento, levantando-se y amostrando lo que dimpués se convertió en "clocar-se, sacar peito". Smith diz: "estió una invención espontania, un movimiento d'una empelucada en un bar". A Robert Luketic li cuacó la idea y finalment se transformó en un numero de baile en a cinta, con corografía de Toni Basil.

Ta la filmación d'as suyas escenas como Sra. Windham Vandermark, Raquel Welch solicitó a lo director de fotografía Anthony B. Richmond una iluminación especial a causa d'a suya obsesión por a luz; antiparte, ella mesma esleyiba lo suyo vestuario ta sentir-se millor.

En a versión inicial d'a cinta, remataba en o chuzgau nomás que Elle ganaba lo chudicio, con Elle en os escalerons d'o chuzgau besando-se con Emmett ta dimpués, con una engallada d'un anyo en o tiempo, amostrar a Elle y Vivian (que s'heba tenyiu de sora) organizando lo suyo propio club de churistas soras en a facultad. Tanimientres, cuan as primeras prebas d'audiencia mostroron que lo publico no lis cuacaba guaire iste final, McCullah Luz y Smith consultoron con Luketic, Platt y d'atros miembros de l'equipo de producción mientres que encara yeran en o vestibulo d'a sala de cine y toz alcordoron que s'amenistaba un nuevo final ta la cinta. Las prebas d'audiencia indicaban que lo publico quereba veyer triunfar a Elle, y se planteyó un final diferent a on la cinta rematase con Elle y Vivian en bebendo margaritas en una placha en Hawaii, estando-ne implicito que entre las dos bi heba una muit buena relación u mesmo que teneban una relación sentimental. Tamién se proponió que en rematar o chudicio Elle, l'acusada declarada inocent, la chuez, lo churau y toda la sala bailasen un numero musical.

Finalment, os guionistas escribioron un nuevo final, que ye lo final que amanixe en a cinta. Tanimientres, en iste caso la filamción s'escaició en o Dulwich College de Londres, en o Reino Uniu, en estar en ixe momento Witherspoon rondando-ne-ie The Importance of Being Earnest (2002, Oliver Parker). Como s'heba tallau o cabello ta lo suyo papel en ixa cinta y tamién Luke Wilson s'heba rasurau a cabeza ta lo suyo papel en The Royal Tenenbaums (2001, Wes Anderson) toz dos emplegoron pelucas ta la escena.

Recaudo

A cinta s'engueró en os Estaus Unius o 13 de chulio de 2001, dando en o suyo primer cabo de semana un recaudo de 20 millons de dólars, convertindo-se en un inesperau exito ta la Metro-Goldwyn-Mayer que en ixe momento se trobaba apurada de diners, enamplando encara los suyos resultaus o siguient cabo de semana, con un recaudo total de 96,5 millons de dólars en Estaus Unius y atros 45,2 millons en atros países, con un total mundial de 141,7 millons de dólars. En o Reino Uniu s'engueró lo 26 d'octubre, quedando en a segunda posición dezaga d'American Pie 2.

Critica

As criticas enta la cinta estioron cheneralment positivas, encara que sin d'entusiasmo. Roger Ebert la puntuó con tres estrelas sobre cuatro, en decindo que "ye imposible que no me cuacase" y que "Witherspoon sostenió sin masiau esfuerzo ista cinta con a suya vivacidat y lo suyo inchenio". Todd McCarthy en Variety calificaba la interpretación de Reese Witherspoon de "marabillosa y ganadora", ta continar decindo que "Witherspoon amuestra una atra vegada que ye una comediant digna de contimparanza con as grans d'a edat d'oro como Carole Lombard y Ginger Rogers". Michael Wilmington en o Chicago Tribune tamién elochió l'actuación de Witherspoon en decindo que "la sincronización comica estió impecable, la suya personalidat irresistible. Pero ye o suyo esprito y la suya inmersión en o papel o que realment impregna toda la cinta y fa que funcione", adhibindo que Witherspoon mete "tanto humor y dinamismo en Elle que nomás que ella eleva toda la cinta". B. Ruby Rich en The Nation la calificó como "la millor cinta d'empoderamiento ta las adolescents en anyos". Paul Clinton en a CNN elochiaba la cinta como "una satira descarada que conserva un mensache: creye en ti mesmo y engalza los tuyos suenios".

Tanimientres, d'atros estioron mas criticos con a cinta y con o suyo guión. Asinas, Kirk Honeycutt en The Hollywood Reporter describió la cinta como "predecible, cursi y sorprendentement escasa d'humor chenuino" pero "encara se salva gracias a la presencia magnetica de Witherspoon". Michael O'Sullivan en The Washington Post clamó a la cinta "una simplificación de Clueless pero sin o suyo inchenio niervoso". Jessica Winter en The Village Voice criticó la cinta como "una cinta de birolla vasuera que s'esbornega ta tornar-se nutritiva".

Precisions legals

Legally Blonde ha recibiu tamién criticas provenients d'o mundo d'o Dreito por a suya descripción d'una facultat de Dreito y por o tractamiento que reciben en a cinta los preceptos legals estausunidenses.

Asinas, Devin Stone, un avogau y YouTuber estausunidense que gosa charrar en YouTube de temas churidicos y legals, explicaba que lo proceso que s'amuestra en a cinta d'a solicitud d'ingreso d'Elle en a facultat no ye posible, en ninviar un video con a suya presentación y no existir garra manera d'adhibir ixo en o sistema de solicitud d'a facultat de Dreito. Tampoco no se tracta de temas bien importants en a vida cuitiana d'una facultat de Dreito, como ye lo caso d'os exámens d'o primer semestre, que gosan provocar muito estrés entre los estudiants. Tamién considera que Elle Woods no teneba garra autoridat ta fer d'avogada cuan representó a Paulette Bonafonté en a reclamación por a custodia d'o suyo can, en calificando la suya conducta como "una gran violación d'a etica (profesional)": "mai no ha rematau os suyos estudios ni ha feito o suyo examen de colechiación y no tién garra dreito a decir de sí mesma que ye una avogada". "ixo se diz intrusismo profesional. Si belún descobrise que ella l'ha practicau mientres a suya estancia en una facultat de Dreito fácil que se le prohibise ingresar en un Colechio d'Avogaus en garra estau d'os Estaus Unius. L'exercicio no autorizau de l'advogacía en o estau de Massachusetts ye multau con 100 dólars u con pena de garchola por no mas de seis meses".

D'atra man, mientres as escenas d'o chudicio tamién se pueden trobar errors. Asinas, en primeras Elle Woods no hese podiu mai interrogar a un testigo en un chudicio penal. Tampoco en un mundo real garra chuez hese permitiu que l'acusau despedise a lo suyo avogau en bel meyo d'o chudicio y nomás que conservase un estudiant de Dreito, amás que garra estau d'Estaus Unius no permite que un estudiant en o suyo primer anyo de facultat represente a garra client debant d'o tribunal. En a cinta se cita la sentencia 3.03 d'o Tribunal Supremo de Massachusetts como precedent ta que Woods pueda representar a un client con a supervisión d'un avogau en exercicio, pero en realidat ixa norma nomás ye aplicable que a los estudiants Dreito en o suyo tercer anyo.

Premios

Premio	Calendata	Edición	Categoría	Premiau	Notas
Premios Globos d'Oro	2002	59ena edición d'os Premios Globos d'Oro	Nominada a lo Globo d'Oro a la Millor Cinta de Musical u Comedia	Legally Blonde
	2002	59ena edición d'os Premios Globos d'Oro	Nominada a lo Globo d'Oro a la Millor Actriz de Musical u Comedia	Reese Witherspoon
Premios Teen Choice	2001	Premios Teen Choice 2001	Teen Choice a la Millor Cinta d'o Verano	Legally Blonde
	2001	Premios Teen Choice 2001	Nominau a lo Teen Choice a lo Millor Villano	Victor Garber
	2001	Premios Teen Choice 2001	Nominada a lo Teen Choice a la Millor Chirrinta	Reese Witherspoon
Premios MTV Movie & TV	2002	Premios MTV Movie & TV 2002	MTV a la Millor Actuación en Comedia	Reese Witherspoon
	2002	Premios MTV Movie & TV 2002	MTV a la Millor Frase	Reese Witherspoon
	2002	Premios MTV Movie & TV 2002	MTV a lo Millor Vestiu	Reese Witherspoon
	2002	Premios MTV Movie & TV 2002	Nominada a lo MTV a la Millor Cinta	Legally Blonde
	2002	Premios MTV Movie & TV 2002	Nominada a lo MTV a la Millor Actriz	Reese Witherspoon
Premios Satellite	2002	6ena edición d'os Premios Satellite	Nominada a lo Satellite a la Millor Actriz	Reese Witherspoon
	2002	6ena edición d'os Premios Satellite	Nominada a lo Satellite a la Millor Banda Sonora Orichinal	Rolfe Kent
Premios BMI	2002		Satellite a la Millor Musica de Cinta	Rolfe Kent

Se veiga tamién

• Cine en 2001.
• Cintas de 2001.

Vinclos externos

• (en) Legally Blonde en Internet Movie Database.
• (en) Legally Blonde en AllMovie.
• (en) Legally Blonde en Box Office Mojo.
• (en) / (es) Legally Blonde en FilmAffinity.
• (en) Legally Blonde en Rotten Tomatoes.
• (fr) Legally Blonde en Allociné.