Decebal

De Biquipedia
Ir ta: navego, busca
Decebal
Rei de Dacia
Reinato 87-106
Muerte 106
Predecesor Duras
Succesor sin succesor
Pai Scorilo

Decebal (inicialment se deciba Diorpanaeus) estió rei d'os dacos entre l'anyo 87 y l'anyo 106, derrotato por o emperador hispano-román Trachán, qui anexionó Dacia a lo Imperio Román.

O estato centralizato de Dacia se trobaba en o suyo apocheu de poder baixo o rei Decebal. Manimenos més restrinchito de l'aria cheografica d'a Dacia de tiempos de Burebista (82 a.C-44 a.C), y comprendeba os territorios d'as actuals Transilvania, Banato, Oltenia y centro y sud de Moldavia. O nuevo estato yera més poderoso y millor organizato. As mugas d'o estato daco en ixas envueltas de Burevista yeran a l'este a Mar Negra, a lo sud os Monts Haemus (Monts Balcans), a l'ueste o Danubio meyo. Os progresos rechistratos en ixos tiempos por part d'a sociedat daca yeran multiples y importants: una población numerosa y agrupata arredol de ciudatz fortificatas (ditas dava en daco, equivalents a las briga d'os celtas d'Hispania), con una viva actividat economica, ligallos comercials con o mundo greco-román, una cultura floreixent con poderosos elementos orichinals.

Personalidat[editar | editar código]

O rei Decebal fació muitas guerras con os romans, que li farán ser reconoixitas habilidatz militars y politicas. A lo principio d'o sieglo III, quasi 150 anyos d'a consolidación de Decebal, o historiador román Dio Cassius li fació un retrato elochioso:

Yera muito hábil en a guerra y listo pa actual, sabendo trigar l'inte pa atacar a los enemigos y pa retirar-se a tiempo, sabendo fer servir con habilidat una victoria y escapar bien d'una derrota segura. Por ixo ell ha estato por muito tiempo un temito adversario d'os romans.

En un vaso funerario descubirto en Sarmizegetusa Regia se puet leyer o texto: DECEBALVS PER SCORILO. Unas interpretacions consideran que significaría en luenga daca Decebal fillo de Scorilo, unas atras consideran que significaría en latín Decebal por Scorilo.

A primera guerra dacica[editar | editar código]

As confrontacions entre dacos y romans se reprenioron en tiempos de Trachán. A principios de l'anyo 101 lo exercito román condueito por o mesmo emperador y dimpués d'una preparación de quasi 3 anyadas, atacó Dacia con 13-14 lechions y atras unidatz d'auxiliars (en total uns 150.000 soldaus). O 25 de marzo de 101 o emperador deixó Roma, travesó o Danubio por puents formaus por barcas en Lederata (Ramna) y Dierna (Orșova) penetrando en Dacia por o Banato. Dio Cassius menciona o episodio en o que os buros (dacos d'Oltenia) y os suyos aliaus li ninvioron a Trachán un fongo granizo a on yera entallau un mesache que aconsellaba a los romans que millor se'n tornasen por o que lis podeba pasar. Se desvinió a Batalla de Tapae en verano de l'anyo 101, batalla en a Decébal prebó d'aturar a ofensiva romana. Manimenos a batalla remató con victoria romana.

En hibierno y primavera de l'anyo 102 Decébal ye esconfito en Nicopolis y Istrum y en Dobrucha en Adamclissi. En a santmigalada de l'anyo 102, Decébal ye obligau a acceptar una paz muito desfavorable pa Dacia: o rei daco heba d'escachar os muros d'as ciudatz-fortaleza (as dava de Dacia, equivalents a las briga de Celtiberia), de ceder una serie de territorios y de renunciar a qualsiquier independencia en politica externa.

A segunda guerra dacica[editar | editar código]

Suicidio de Decebal, detalle en a Columna Trachana, Roma.

Por orden de Trachán, Apolodoro de Domás, o incheniero més famoso d'ixos tiempos, construyó en l'anyo 103-105 un puent sobre o Danubio entre Drobeta y Pontes. As lechions romanas lo trescurzoron en verano de l'anyo 105, encomenzando a segunda Guerra Dacica.

Abandonato por os aliatos, atacato por o Banato, por a foz d'o río Olt y Moldavia, y constreito de contino a la defensiva, Deceban se retiró a los Monts Orăștiei. Dimpués d'a conquiesta d'as poderosas fortalezas que corisaban l'acceso enta a capital: Blidaru, Costești, Piatra Roșie, Bănița, Căpâlna y Tilișca, as lechions romanas encomenzoron o setio de Sarmizegetusa Regia.

A penar d'a fura resistencia, a ciudat-fortaleza fue conquiesta y destruita dica os alazetz. Decebal, chunto con bells capitans, consiguió fuyir d'a ciudat prebando de continar a resistencia contra os romans en o interior d'o país. Fue encorrito por a caballería romana y pa no cayer vivo en mans d'o enemigo, Decebal se suicidó, o que ye testimoniato en a estela funeraria trobata en Grammeni y perteneixent a Tiberius Claudius Maximus, o explorador que li levó a Trachán a cabeza y a man dreita de Decebal quan yera acampato en Ranisstorum.

Mencions en fuents aragonesas[editar | editar código]

Ye mencionato en a versión aragonesa d'a "Historia contra los paganos" d'Orosio en o capítol que dedican a lo emperador Domicián:

Et fizo guerras co(n)tra los germanos et contra aq(ue)llos de dacia por sus legados co(n) grant dapnage et detrime(n)to d(e)la re publica co(m)mo seya uerdat q(ue) encara en la ciudat despedac[']assse et destruyesse el senado et el pueblo et de fuera la huest maltractada et assallida d(e)los enemigos fuesse atorme(n)tada por continuo matamie(n)to et acuchillamie(n)to d(e)llos. Et q(u)antas batallas fuero(n) fechas co(n) diurpane rey de aq(ue)llos de dacia et co(n) su caudillo fusco. Et q(u)antos matamientos et acuchillamie(n)tos d(e)los Romanos fuero(n) fechos dezir te lo ya et declararia en luengo p(ro)cesso sino(n) fuesse q(ue) cornelio tacito el qual aquesta ystoria (ystoria) muyt diligentme(n)t por orde(n) scriuio.[1]

En a Cronica de Sant Chuan d'a Penya, como atros textos aragoneses, confunden a los chetos con os godos seguindo a autors como Chordanes y mencionan a Decebal-Deorpeneu como un rei godo:

El primer rey con qui exieron los ditos godos de la dita isla huuo nombre Virig el cual fué buen batallero. Et muerto el dito Virig regnó sobre los ditos godos el rey Gaderico, et fué buen rey. Et depues de -14- aquesti regnó su fillo Fillimer. Et depues de aquesti regnó Zuera. Et depues de aquesti regnó Diameu. Et depues de aquesti regnó Calmoxen; et depues de aquesti Acanauso; et depues de aquesti Galafus; et depues de aquesti Calefus; et depues de aquesti Eurefilo; et depues de aquesti Gertufta; et depues de aquesti Dizaneu; et depues de aquesti Deorpeneu, et depues de aquesti regnó Stregot; et depues de aquesti regnó Gniua; et depues de aquesti Arrias; et depues Auriaro; et depues de aquesti Teberich; et depues de aquesti Exmanarich; et depues de aquesti regnaron Federich et Acenaricuo, et regnaron entrambos ensemble. Mas Acenaricuo sobreuiuió et regnó todo solo[2]

Tamién ye mencionato, esta vegata con o suyo nombre de rei d'os pueblos dacos, en a traducción aragonesa de "Breviarium ab Urbe condita":

et de luengo Reparo las Ciudades ultra el Regno en germania / et vencido detiualo / Sosmetido dacia facta prouincia ultra danubio en aq(ue)llos campos en los quales habitan los escayfalos uitoaalos et creuicenos et aq(ue)lla prouincia tuuo C. M(il) / passos por .x. vegadas / en derredor

Referencias[editar | editar código]