Copenaguen

	Copenaguen; København
	Localidat de Dinamarca
	; Seu d'o concello de Copenaguen.
Estau; • Rechión; • Comuna	Dinamarca; Capital; Copenaguen (København)
Superficie	455 km²
Población; • Total; • Densidat	; 1.181.239 hab. (2025); 2596 hab/km²
Altaria; • Meyana	; 14 m.
Codigo postal	1000
Coordenadas	55°40’34’’N12°34’ 8’’E
	Copenaguen Copenaguen en Dinamarca
	Copenaguen Copenaguen en Europa
	Web oficial

Copenaguen ye a ciudat principal y mas antiga d'o Reino de Dinamarca, y la capital d'o estau danés.^[1]

Copenaguen ye a seu d'o Parlamento, d'o Gubierno y d'a monarquía danesa, institucions ubicadas en o centro d'a ciudat.

Nombre d'a ciudat

O nombre autoctono d'a capital danesa, København, procede de l'antigo nombre Købmandshavn, que en danés significa "puerto de mercaders", o que da ideya d'a suya posición estratechica en o mar Baltico.

O nombre d'a ciudat en a mayoría d'idiomas europeus deriva d'a denominación alemana, Kopenhagen. Asinas, l'anglés Copenhagen, o castellano y francés Copenhague, o catalán Copenhaguen, l'italiano Copenaghen u lo portugués Copenhaga.

Cheografía

Copenaguen se troba principalment en a costa oriental de l'isla de Zelandia u Sjælland, con una parte d'a ciudat sobre l'isla d'Amager. Enta l'este, Copenaguen acara l'Øresund, o estreito de mar que desapara Dinamarca de Suecia, y que achunta la mar d'o Norte con a mar Baltica.

En a costa oposada, se troban as ciudaz suecas de Malmö y Landskrona.

O municipio de Copenaguen ye, chunto con os de Frederiksberg y Bornholm, un d'os tres que no perteneixen a garra comarca de Dinamarca.

A ciudat de Copenaguen se divide en 15 districtos clamaus bydele.

Copenaguen fa tamién parte d'a conoixida como rechión de l'Øresund, que abraca tdta la parte oriental d'o Sjælland, en Dinamarca, y la parte occidental d'Escania, en Suecia.

Población

L'aria metropolitana de Copenaguen, o Hovedstadsområdet, conta con 1.181.239 d'habitants. D'éls, 528.208 (2010) residen en o municipio de Copenaguen, 96.718 (2010) en o municipio de Frederiksberg, 71.052 (2010) en o municipio de Gentofte y 485.261 en belaltros municipios amanaus.

A rechión de l'Øresund conta, en chunto, con 2.800.000 d'habitants.

Historia

Copenaguen fue fundada probablement arredol de l'anyo 1000 per Svend I y lo fillo suyo, Canut O Gran. Estió solo que un lugar de pescadors dica la metat d'o sieglo XII, cuan se tornó mas important en prener-ne posesión o bispe Absalón, qui la fortificó en 1167. O sobrebuen puerto aduyó a lo creiximiento de Copenaguen, fendo-ne un gran centro de comercio en o norte d'Europa, o que daría o nombre a la ciudat. Ixo tamién contrebuyó a continos ataques per parte d'a Hansa u Ligallo Hanseatico.

Dende l'anyo 1658 dica lo 1659, fue asechada per os suecos en o reinau de Carlos X. En 1801, os barcos britanicos de l'almirant Hyde Parker combatioron contra l'armada danesa en o puerto de Copenaguen en a que se conoix como batalla de Copenaguen. En 1807, a ciudat sofrió grans danyos y centenars de personas morioron en ser Copenaguen bombardiada con codetes Congreve per parte d'os britanicos a fin que Dinamarca no reblase debant d'a flota de Napoleón.

En a Segunda Guerra Mundial, Copenaguen y Dinamarca entera fueron ocupadas per tropas alemanas entre lo 9 d'abril de 1940 y lo 4 de mayo de 1945. De l'inte que remató la guerra, a ciudat no ha deixau de creixer.

Dende lo verano de 2000, as ciudaz de Copenaguen y Malmö son comunicadas per un puent de peache, o puent de l'Øresund, que permite cruzar de Dinamarca enta Suecia igual per carretera como per ferrocarril. Fue inaugurau en chulio de 2000 per o rei Carlos XVI Gustau de Suecia y la reina Margalida II de Dinamarca. En consecuencia, Copenaguen s'ha convertiu en o centro d'un aria metropolitana que abraca las dos nacions.

Bels puestos d'interés

L'Amalienborg Slot u Palacio Amalienborg.
Bakken (O Tozal, o mas antigo parque d'atraccions en funcionamiento).
A Ciudat Libre de Christiania.
Christiansborg Slot u Palacio Christiansborg.
Frederiks Kirken u Ilesia de Frederico (tamién dita la Ilesia de Marbre).
Gefionspringvandet (A fuent Gefion).
Nationalmuseet u Museu Nacional de Dinamarca.
O Museu Ny Carlsberg Glyptotek.
Nyhavn.
O Rosenborg Slot u castiello de Rosenborg.
A estatua d'A Sireneta.
L'Operahuset i København u Teatro d'Opera de Copenaguen.
O Tivoli.
O Københavns Zoo u Zoo de Copenaguen.

Referencias

↑ (en) Carolyn Bain, Michael Booth y Fran Parnell: Denmark, 2008, Lonely Planet. ISBN 978-1-74104-669-4.

Vinclos externos

Se veigan as imáchens de Commons sobre Copenaguen.
(da)/(en) Web turistica oficial de Copenaguen y redolada.
(da)/(en) Pachina web oficial d'o municipio de Copenaguen.
(es) Webd'información sobre Copenaguen y la Rechión de l'Oresund.
(en) Web d'imáchens de Copenaguen.
Webcam d'a Plaza d'o Concello (a imachen s'esviella cada 20 segundos).

Datos: Q1748
Multimedia: Copenhagen / Q1748

[1] (en) Carolyn Bain, Michael Booth y Fran Parnell: Denmark, 2008, Lonely Planet. ISBN 978-1-74104-669-4.

[1]