Castillón de Sobrarbe

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo tracta sobre o lugar de Castillón de Sobrarbe. Ta atros usos d'o toponimo «Castillón», se veiga Castillón (desambigación).

Castillón de Sobrarbe Castejón de Sobrarbe
Lugar d'Aragón
Envista parcial de Castillón de Sobrarbe.
Entidat  • País  • Provincia  • Comarca  • Municipio	Lugar  Aragón  Uesca Sobrarbe L'Aínsa-Sobrarbe
Partiu chudicial	Boltanya
Población  • Total	8 hab. (2011)
Altaria  • Meyana	603 m.
Distancia  • 101 km  • 21,5 km	enta Uesca enta L'Aínsa
Codigo postal	22330
Chentilicio	castillonero/-a
Patrons	Sant Póliz
Parroquial  • Diocesi  • Arcipestrau  • Parroquia	Uesca Semontano-Sobrarbe Asumpción de Ntra. Sra.
Coordenadas
Castillón de Sobrarbe Castillón de Sobrarbe en Aragón

Castillón de Sobrarbe (oficialment, en castellano, «Castejón de Sobrarbe») ye un lugar aragonés d'o municipio de l'Aínsa-Sobrarbe, en a comarca de Sobrarbe y provincia de Uesca. A suya población ye de 8 habitants (2011).

Castillón de Sobrarbe fue capital d'o municipio homonimo, que formaba en chunto con a Pardina y con a Torre, as suyas aldeyas, dende a primer constitución d'os municipios modernos en 1834. En 1845 se les unió Camporretuno, que enantes heba estau un municipio independient. O municipio de Castillón desapareixió en a decada de 1960, absorviu en o municipio de l'Aínsa.

Cheografía

Castillón de Sobrarbe se troba a 603 metros d'altaria, en a valle d'o río Susía, y fa parte d'o que tradicionalment se conoix como o Viello Sobrarbe. Ye en un sarrato Norte→sud que se prolarga como estribación d'o sistema de Buil-Camporretuno de camín cara ta'l Susía, con o barranco de Castillón por a baixant occidental y unatro barranco mas fino, afluent de l'anterior, por a man oriental.

Por alto de lugar s'envista un tozal, a on que se troba as enrunas d'o castiello d'o Castellar.

Por alto d'a población, se'n destaca un tozal con a punta de penya, a on que encara en l'actualidat se i puede vesitar as enrunas d'una torre, que correspondeba a o castiello que posiblement le da nombre a Castillón, y que en a comarca se conoix como lo Castellar.

Ta Castillón se i arriba por a carretera local HU-V-3611, que i remata. Ista carretera se pilla en Mediano, en l'A-138, y esnaviesa por a Pardina y por a Torre, que son aldeyas historicas de Castillón, tot comunicando as tres poblacions d'a ribera izquierda d'o Susía.

Demografía

Evolución demografica

1992 1994 1996 1997 1998 1999 2000 2001 2002 - - - - - - 7 6 5

2003 2004 2005 2006 2007 2008 2009 2010 2011 5 4 4 5 8 8 8 8 8

2021 2022 2023 2024 2025 2026 2027 2028 - - - - - - - - - -

1990- : población de dreito. Fuent: Intercensal en l'INE, Series de población en l'INE y Relación d'unidaz poblacionals en l'INE.

Monimentos

A ilesia de l'Asumpción, d'o sieglo XVI. En l'actualidat en prou mal estau.

O monimento mas destacable de Castillón ye a suya ilesia, antiga parroquial, que data d'o sieglo XVI.

A ilesia tiene diferents inscripcions feitas en momentos dispersos en a Historia, por o que se'n puede dar treslau d'as diferents epocas constructivas. O cuerpo principal, que ye un d'os mas voluminosos en a comarca de Sobrarbe, data d'o sieglo XVI y tiene una doble inscripción: La una ye una calendata, de 1547 y ubicada en a portalada, en a que se lei un mensache parcialment conservau «maestro Miguel de [...]»; a segunda ye una inscripción en l'interior, a on que i diz «Johan Tellet me fyzo 1557». O dito Chuan Tellet tamién ye o mayestro de a ilesia de Santa Olaria d'o Elsón.

A ilesia destaca por a suya voluminosa nau, altera, y a torre d'o campanal, robusta y d'estilo clarament gotico funcional, a l'estilo de como se feban en l'Alto Aragón a part d'alavez.

En l'actualidat, o templo se troba zarrau a'l publico por o suyo mal estau. Bels trozos de tellau s'ha mirau ta protecher-los, provisionalment, con lonas que fan fiero a l'aspecto pero que se miran ta privar que l'augua percole t'adintro.

Además, en o tozal que ha o mismo nombre, se i puede vesitar as enrunas d'o Castellar, que ye declarau Bien d'Intrés Cultural (codigo SIPCA 1-INM-HUE-003-907-010).

Toponimia

950 anyos de Castellone, 1049-1999.

O nombre de Castillón fa referencia a la presencia d'un castiello en os arredols, que beluns situan en as enrunas d'o Castellar, en l'altura d'o cerro que sinyorea la población por alto.

En os textos medievals i amaneix de tan antigos como dende o sieglo XI, de cuan se'n tiene una mención, a primera, en l'anyo 1049 y con o nombre de «Castellone». Sobre ixa primer mención penchón una placa conmemorativa que se puede veyer en a frontera d'una casa d'o lugar, tot recordando os 950 anyos d'existencia documentada de Castillón.

Imáchens

• 
  Puerta en una casa d'o lugar.
• 
  Envista parcial de a ilesia de l'Asumpción, con as lonas en tapando-le o tellau.
• 
  A portalada d'a ilesia.
• 
  Una carrera, encara empedrada, en Castillón.
• 
  Arco

Fiestas

• 28 de mayo, romería ta la ermita de Santa Waldesca, en chunto con os habitants de a Torre, a Pardina y Camporretuno.
• 13 d'agosto, Fiesta Mayor fendo-le honras a sant Póliz. Se va en romería ta la ermita de Sant Póliz, en chunto con os habitants d'a Pardina, a Torre y Camporretuno.

Se veiga tamién

• Castiello d'o Castellar
• Ilesia de Santa maría de l'Asumpción

Vinclos externos

• Se veigan as imáchens de Commons sobre Castillón de Sobrarbe.

• Datos: Q567866
• Multimedia: Castejón de Sobrarbe / Q567866