Can de Chira altoaragonés

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Iste articlo tracta sobre o Can de Chira, raza de cans oriunda d'Aragón. Ta os cans que se les diz asinas por o suyo oficio, se veiga Can de chira.
Un Can de Chira, con a coda larga.

O Can de Chira altoaragonés ye una raza de cans, no reconoixida por bellas federacions caninas, orichinaria d'o Pireneu y Prepireneu uescano. Tamién se conoix como Can de Chira aragonés y, sobre tot d'entre os criadors canins y afeccionaus, simplament como Can de Chira.

A manca de reconoiximiento formal de a raza, a nivel internacional, se gosa deber a'l numero tan reduciu d'exemplars documentaus que cumplan os caracters d'o suyo cánon racial, consecuencia de l'elevadismo grau de tremescluz con belatras razas que han sufierto en as zagueras decadas[1]. Anque se calcula que buena cosa d'os cans de chirar que s'emplega en l'actualidat en l'Alto Aragón poseyen sangre d'ista población, son muit poquez os que cumplen o estereotipo fisico necesario ta declarar-los-ne miembros[1].

Caracteristicas[editar | modificar o codigo]

Un eixemplar lanudet. En a raza i ha animals de pelo liso y tamién de pelo mas rizadet.

O estereotipo d'o Can de Chira ye un can de mida meyana u chicorrona, con altaria d'entre 42 y 47 cm en o lumo en os masclos[2], y d'entre 38 y 43 cm en as fembras[2], y pesos que bailan d'entre os 12 kg minimos dexichibles a las fembras dica os 20 kg maximos que s'accepta en os masclos[2].

A cabeza ye chicorrona y con forma de falca. O cuerpo, anque macizo, tiene a espalda recta y se refirma bien sobre as cuatro patas, de forma que l'animal se gosa mover con fluideza y elegancia, y tiene buena resistencia.

O cranio ye lupoide, con o mueso recto y de lonchitut meya. A proporción d'entre a cara y o cranio ye meya, 4/5[2] u dica 1/1[1]. Os parpiellos y as mucosas oculars y nasals son negras, mientres que o uello tiene siempre l'iris marrón[2]. As orellas, que amaneixen meyas-altas, pinchan lasas cuan l'animal ye en reposo[2] y cayen t'adebant, t'a cara, cuan mete atención[2]. As dients son blancas[2], con a dentadura completa, y o mosigo el fa en zarrando en estixera.

Se respecta tanto os animals con a coda larga (que cuan corre se meta recta) como curtos, que ixo ye que la i tienen de meya lonchitut dende que naixen. En i ha tamién de coda curta. O cuello fuerte y recto, y a tripa que designa una linia moderadament ascendient, completan o perfil anatomico d'un Can de Chira.

Pelache[editar | modificar o codigo]

O pelo ye semi-largo; mas largo por debaixo, en a tripa, as tarrias y en os codos d'as patas, y sensiblement mas curto por alto[2]. En i ha eixemplars de pelo rizoso y atros de pelo liso.

Un elemento muit important en as caracteristicas d'o Can de Chira altoaragonés son a color muina (negra) en o pelache, con dos malletas claras y retondas alto d'os uellos y una depigmentación en os baixos d'o cuerpo (tripa, interior d'as patas, gorga, etc.) que fa que ixas partes sían marrons, grisas u dica blancas. O mueso ha d'estar una continación d'as colors claras d'abaixo, pero ha de tener a parte superior fusca, de forma que d'entre una y l'atra s'estableixca una transición progresiva de coloración y no pas una linia delimitadera d'entre todas dos pigmentacions[1].

O Can de Chira tiene dos espolons por cuentas d'uno en as patas zagueras[1], y uno solo en as debanteras.

Historia[editar | modificar o codigo]

Un pastor pirenenco (sieglo XIX) con os suyos cans. O de a dreita representa os rasgos prencipals d'un Can de Chira, mientres que o d'a ezquierda estaría un mostín.

O cánon racial d'o Can de Chira se basa en l'alcordanza popular d'os cans que tradicionalment se teneba ta conducir os ganaus, prencipalment os recuerdos de a chent d'as cheneracions que os vidon en a primera metat d'o sieglo XX, cuan encara yeran abundants. Anque probablement a raza ha sufierto una influencia chenetica intensa de belatras razas, sobre tot en o sieglo XX, se mira ta recuperar os eixemplars con as caracteristicas que mas fidelment representen aquels cans que enantes s'heba feito servir.

Se considera esencials ta ista reconstrucción bellas imáchens, de en zaguerías d'o sieglo XIX[3], en as que se i vei pastors d'o Pireneu aragonés con os canidos que teneban ta treballar.

Imáchens[editar | modificar o codigo]

Referencias[editar | modificar o codigo]

  1. 1,0 1,1 1,2 1,3 1,4 (es) Reportache sobre o Can de Chira emitiu en Aragón TV; consultau o 18 de marzo de 2012.
  2. 2,0 2,1 2,2 2,3 2,4 2,5 2,6 2,7 2,8 (es) «La Raza», en a web CandeChira.org.; consultada o 18 de marzo de 2012.
  3. (es) «Historia», en a web CandeChira.org; consultada o 18 de marzo de 2012.

Vinclos externos[editar | modificar o codigo]