Corylus

Corylus
Corylus avellana
Denominacions populars
abillanera / abellanera, abechanera, abillanero / abellanero, abillaner
Clasificación cientifica
Dominio:	Eukaryota
Reino:	Plantae
División:	Magnoliophyta
Clase:	Magnoliopsida
Orden:	Fagales
Familia:	Betulaceae
Chenero:	Corylus
Descripción
Corylus L., 1753
Especies
Especies de Corylus: Corylus americana Corylus avellana Corylus chinensis Corylus colurna Corylus cornuta Corylus ferox Corylus heterophylla Corylus jacquemontii Corylus maxima Corylus sieboldiana Corylus tibetica

As abillaneras u abillaners (nombre cientifico Corylus) son un chenero d'árbols de fuella caduca en a familia Betulaceae, anque cualques autors el deseparan en chunto con Carpinus y Ostrya en una altra familia, dita Corylaceae. O chenero conta con arredol de 10 especies descritas y distribuitas arredol en as latituz temperatas de l'hemisferio norte.

As fuellas suyas son simplas, de laderas aserratas doblement (ixo ye, que sobre cada "dient" se i forman altras mes chicononas). As flors naixen d'antes que no las fuellas, con distribución monoica (ixo ye, que un solo árbol en tiene d'os dos sexos) anque forman amentos deseparatos, cadagún con flors en exclusiva d'un d'os sexos. Os amentos masculins penchan 5 u 10 cm en as brancas, con una carateristica color blanca amarellisca, y os amentos femenins son muit chicoz, cuasi que ocultos en as chemas d'a branca, d'a on que ne demanarán as abellanas, y en amaneixen ta fora d'ixa estructura só que os estilos de color royisca u rusienca.

As abillanas son o fruito d'estes árbols, son nueces d'entre 1 e 2,5 cm de lonchitut, y 1 u 2 cm de diametro. Como tamién pasa en os carpins (chenero Carpinus), a forma de l'involucro de bractias que acompanian l'abillana fan a diferencia que, posatas en comparanza, permite que se clasifiquen as especies d'este chenero.

As dos especies millor apreciatas en agricultura, en dintro d'este chenero, son l'abillanera d'Europa occidental (Corylus avellana) que pocas vegatas gosa pasar d'un port arbustivo gran, y l'abillanera turca (Corylus colurna) que en comparanza se gosa manifestar coma árbol de grans dimensions (se n'han puesto describir eixemplars que feban dica 35 metros d'altaria). As abillaneras bordes en o Pireneu fan parte d'a vechetación tipica en as marguins d'os campos, y tamién en os sotos d'os ríos, las menos de vegatas feitos creixer coma campet caultivato de forma intencional.

Ditos y mazadas

• «Ye mas cerenyo que vara d'abellanera»

Vinclos externos

• Wikispecies tiene un articlo sobre Corylus.
• Se veigan as imáchens de Commons sobre Corylus.

• Datos: Q145889
• Multimedia: Corylus / Q145889
• Especies: Corylus