Urano (planeta)

Urano
Caracteristicas orbitals
Radio meyo:	2,8709722·1012 km
Excentricidat:	0,04716771
Periodo orbital (sideral):	84a 3d 15,66h
Periodo orbital (sinodico):	369,7 días
Inclinación:	0,76986°
Velocidat orbital meya:	6,8352 km/s
Satelites:	27
Caracteristicas fisicas
Diametro equatorial:	51.118 km
Superficie:	8.130.000.000 km²
Masa:	8,686×1025 kg
Densidat meya:	1,29 g/cm³
Gravedat superficial:	8,69 m/s²
Velocidat d'escape:	21,29 km/s
Periodo de rotación:	-17h 14m (movimiento retrograu)
Inclinación axial:	97,86°
Albedo:	0,51
Temperatura superficial:
• Minima:	59 K
• Meyana:	68 K
Caracteristicas atmosfericas
Hidrochén	83%
Helio	15%
Metano	1,99%
Amoniaco	0,01%
Etano	0,00025%
Acetileno	0,00001%
Monoxido de carbonio	Trazas
Sulfuro d'hidrochén	Trazas

Iste articlo ye sobre a planeta, ta atros usos d'iste termin se veiga Urano.

Urano ye a sietena planeta dende o Sol, a tercera mas gran y a quatrena mas masiva d'o Sistema Solar. Se clama asinas en honor a la divinidat griega d'o cielo Urano (en griego Οὐρανός) o pai de Cronos (Saturno) y o lolo de Zeus (Chupiter). Encara que ye visible a lo uello humán como as atras cinco planetas clasicas, nunca no fue reconoixito como planeta por os observadors antigos debito a la lentitut d'a suya orbita. Sir William Herschel anunció lo suyo descubrimiento lo 13 de marzo de 1781, expandindo asinas os limites conoixitos d'o Sistema Solar por primera vegata en a historia moderna. Tamién estió lo primer descubrimiento d'una planeta emplegando un telescopio.

Urano ye parellán en composición a Neptuno, y os dos tienen una composición diferent d'as atras dos chigants gaseosas (Chupiter y Saturno). Por ixo, os astronomos a vegatas las clasifican en una categoría diferent, as chigants chelatas. L'atmosfera d'Urano, encara que ye parellana a la de Chupiter y Saturno por o feito d'estar composata prencipalment d'hidrochén y helio, contiene una proporción superior de chelos, como augua, amoniaco y metano, chunto con trazas d'hidrocarburos. Tien l'atmosfera planetaria mas freda d'o Sistema Solar, con una temperatura minima de 49 K (−224 °C). Tien una estructura de nubles complexa, por rans, a on que se creye que as nubles mas baixas son d'augua, y as mas altas de metano. En contraste, o interior d'Urano se composa prencipalment de chelo y roca.

Como as atras planetas chigants, Urano tien un sistema d'aniellos, una magnetosfera, y numerosos satelites. O sistema d'Urano tiene una configuración unica respective a las atras planetas porque o suyo eixe de rotación ye muit tombato, quasi dica o suyo plan de revolución arredol d'o Sol. Por tanto, os suyos polos norte y sud se troban a on la mayoría d'as atras planetas tienen o equador. Vistos dende a Tierra, os aniellos d'Urano pueden pareixer que rodian a planeta como una diana, y que os satelites chiran a lo suyo arredol como as agullas d'un reloch, encara que en 2007 y 2008, os aniellos apareixioron de costato. En 1986, as imachens d'o Voyager 2 amostroron Urano como una planeta sin garra caracteristica especial en a banda de luz visible, sin as bandas de nubles u tempestatz asociatas con os atros chigants. Manimenos, os observadors terrestres han visto sinyals de cambeos d'estación y un aumento de l'actividat meteorolochica en os zaguers anyos a mida que Urano s'amana a lo suyo equinoccio. As velocidatz d'o viento en Urano pueden plegar dica os 250 metros por segundo (900 km/h).