Transilvania

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Mapa de Rumania con Transilvania resaltada en color amariella.

Transilvania (rumano: Ardeal u Transilvania, hongaro: Erdély) ye una rechión historica localizada en o centro de Rumanía, rodeyada por os Carpatos. A capital d'a rechión, Cluj-Napoca, ye situada en a meseta, mientres que Braşov y Sibiu, unas d'as principals ciudaz, son en o semontano d'os Carpatos.

En a famosa novela de Bram Stoker, Transilvania yera d'on proveniba o Conte Dracula.

Cheografía

A rechión ye una antiga cuenca sedimentaria terciaria plena (plataforma) y rodeyada de tot por os Carpatos meridionals, os Carpatos orientals y os Monts Apuseni ("Monts de Ponient" en rumano), cordeleras d'os Carpatos. As montanyas rodeyan a rechión como una parete y en cualques puestos avanzan ta l'interior. Os principals ríos son Mureş y Târnava, afluents d'o Tisza y o río Olt, afluent d'o Danubio.

Toponimia

Encara que en rumano tamién se diga Transilvania este toponimo ye una composición latina culta que significa dezaga d'as selvas (a lo estilo d'o toponimo moncayín Trasmoz y de Trassierra, que no tienen -n- en o prefixo trans- porque son patrimonials en aragonés) y os rumanos tamién la emplegan pero mes en contextos de charrar con forans u escribir pa estar leitos por forans. Ardeal ye como gosan dicir-ne por un regular y fa referencia a un terreno ondulau con una sucesión de cabezos u pueyos (deal en rumano) que bi ha por tota a plataforma transilvana, que tien un modelau cheolochico pareixiu a lo semontano pirenenco u d'o Baixo Aragón por estar tamién en una plataforma con sedimentos terciarios, en este caso a plataforma d'Ebro. Ardeal, Ar deal significa en rumano "zona de pueyos", "zona de cabezos". O toponimo hongaro Erdély se conecta con o rumano Ardeal, encara que os autors hongaros tiengan una interpretación como Erdõ-elve, "dillá d'a selva".

En alemán ye Siebenbürgen, fendo referencia a las siet ciudaz fortificadas u burgos medievals saxons mes importants: Klausenburg (Cluj), Kronstadt (Braşov), Hermannstadt (Sibiu), Schässburg (Sighişoara), Mediasch (Mediaş), Mühlbach (Sebeş), e Bistritz (Bistriţa).

En serbio ye Transilvanija, en turco ye Erdel, en eslovaco ye Sedmohradsko u Transylvania y en polaco, Siedmiogród, talment reflectando que os saxons transilvanos teneban relacions con os polacos.

Composición etnica

A población mayoritaria son os vlacos, que dende a formación d'o nacionalismo rumano y dimpués o estau de Rumanía s'autodenominan rumanos. Bi ha una important minoría hongara, una minoría secul asimilada dende fa muito a os hongaros y una minoría huei muito redueita de saxons transilvanos. Tamién bi ha chitans, que yeran nomadas y no teneban arias de poblamiento compacta, pero encomienzan a tener-ne. Tamién bi ha atras minorías pero no son numericament ni territorialment importants.

Datos: Q39473
Multimedia: Transylvania / Q39473