Pueyo
- Iste articlo ye sobre una traza d'accident cheografico; ta atros usos, se veiga Pueyo (desambigación).
Un pueyo, tozal u cabezo ye una part d'o terreno se vei més elevato que os terrenos d'arredol. Se gosa aplicar a un mont de mida chica y en podemos trobar arredol d'una cordelera, y tamién aislatos en una plana, como o Pueyo de Cebolla. Manimenos as tucas de bells monts reciben esta denominación por destacar respecto d'o resto d'a sierra u macizo on son presents.
A parabra pueyo con significato topografico ye tipicament aragonesa, se troba muito en a toponimia, encara que a castellanización ha feito que muitos toponimos con Pueyo haigan desapareixito y haigan quedato reinterpretatos como pollo, royo y de muitas trazas. A forma pueyo ye cognato de l'occitán puy/puech y d'o catalán pui. En aragonés os toponimos compuestos de "Pueyo de" + sustantivo pueden quedar abreviatos como "Pui de", en qualsiquier part tot d'o territorio sin estar por influencia occitana u catalana.
L'abundancia de relieves volcanicos en o Macizo Central francés ha feito que o francés haiga amprato como termin cheolochico a parabra occitana puy con o sentito de pueyo d'orichen volcanico, sobretot os conos de cenisa.
