Ensifera

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Iste articlo tracta sobre os Ensifera, una suborden d'insectos. Ta o chenero d'Aves, se veiga Ensifera (chenero).
Ensifera
Tettigonia viridissima, una pantingana muit común, gran y vistosa.
Denominacions populars
Pantinganas, pintinganas, grillas, grillos, grillons, grichas, langostos
Clasificación cientifica
Eukaryota
Animalia
Arthropoda
Insecta
Orthoptera
Ensifera

Os ensifers u ensiferos (pronunciau /ensi'fes/~/ensi'feɾos/, como "ensifés" u "ensiféros" respectivament; cientificament Ensifera -en latín-) son una suborden d'insectos ortopteros caracterizaus por as antenas largas que tienen, en toz os casos feitas de mas de trenta artillos.[1][2]

Descripción[editar | modificar o codigo]

Os ensiferos son insectos terrestres, herbivoros en a mayoría de casos. Habitan en a vechetación preta, en a hierba altera, o brancamen d'os árbols, matigals y matullars. Muitas especies son arboricolas,[2] especialment as que viven en ecosistemas tropicals dominaus por a selva. Tamién i ha especies que s'han especializau en fer una vida soterrana,[2] y s'ha descrito ensifers que habitan plenament en l'interior d'esplugas y atras cavidaz naturals en ausencia de luz.[2]

Muitas especies tienen colors cripticas que les aduyan a camuflar-se con as plantas, estratechia que ye primordial en a supervivencia de muitas especies, pus son presas ta muitos atros grupos d'animals, como as aus, os reptils y bels mamiferos.

As antenas son mas largas que en os suyos parients os celiferos y, en comparanza con a relativament poca funcionalidat d'aquéllas, en a mayoría d'especies d'ensifers se fan servir ta palpar o entorno. Un gran numer d'especies descritas son nocturnas.[2]

As fembras adultas de todas as especies tienen un ovopositor u oviscapto, que puede gosar estar de grans dimensions en cualques casos.[2] As dimensions y dureza d'os cercos que se troba a canto y canto de l'oviscapto son un d'os caracters que s'emplega ta clasificar as tres superfamilias acceptadas en o grupo: Grylloidea, Rhaphidophoroidea y Tettigonoidea.[3]

Imáchens[editar | modificar o codigo]

Referencias[editar | modificar o codigo]

  1. (es) Ensifera, consultada o 22 de septiembre de 2012.
  2. 2,0 2,1 2,2 2,3 2,4 2,5 (en) Ensifera en a pachina Tree of Life project; consultada o 22 de septiembre de 2012.
  3. (es) Suborden Ensifera. Clave de superfamilias, consultau o 22 de septiembre de 2012.

Vinclos externos[editar | modificar o codigo]