Tronca de Nadal
A tronca, toza u tizón de Nadal (u tamién de Navidat) ye un elemento caracteristico d'as tradicions nadalencas altoaragonesas, asinas como d'as tierras vecinas catalana y occitana, probablement ligata a lo folclor, a machia y a mitolochía pirinencas, a la tradición de l'árbol de Nadal y a ritos y celebracions antigos d'o solsticio d'hibierno.
Como s'indica más enta debant, se troba buena cosa de variants d'istos ritos, pero por un regular consiste en posar a Nueit de Nadal (Nueit Buena) en o fogaril u a canto d'iste, a toza más gran d'a lenyera, que s'ha guardato a esprés ta ista fiesta. Modernament se posa tamién chunto con l'árbol de Nadal. Os ninos d'a casa son os encargaus de decir bellas frases y bendicions rituals (encara que en bells lugars a bendición la fa o más viello u l'amo d'a casa). En ocasions, a bendición se fa dimpués de ruixiar a tronca con un sinyalín de vin mientres se prenuncia a bendición. En as zonas orientals de l'Alto Aragón, o ritual teneba una parte mas ludica, quan os ninos d'a casa pegaban trucazos a la toza ta que ista "cagase" os presents, que gosaban estar lamins, carambels, fruitos secos y altras cosetas ta minchar u chuguetz chicotz.
Con a despoblación y o progresivo declive d'a cultura popular de l'Alto Aragón, ista tradición, bien enradigata hue en Catalunya, quasi dispareix d'os rituals nadalencos aragoneses. En l'actualidat quantos colectivos miran de conservar y fomentar a suya celebración per tot Aragón.
Rituals tradicionals d'a tronca de Nadal
En l'Alto Aragón bi ha dos menas de rituals ta fer uso d'a tronca u toza de Nadal: en a zona occidental, o ritual consiste en bendecir a toza y deixar que ista se creme, mientres en a zona oriental, os ninons tamién gosan fer cagar a tronca.[1].
A bendición y crema d'a toza
En l'Aragón occidental, se fica a tronca en o fogaril, se bendiz, se li preta fuego y se deixa que se consuma. En muitos lugars se li encomendaba a o mas chicot d'a casa que s'asentase a escarramanchons sobre a toza y bendecise a tronca decindo as frases rituals, fendo o sinyal d'a cruz con un porrón de vin y una torta.[1].
Belunas d'as oracions de bendición d'a tronca que s'ha replegau son istas:
buena casa, buena brasa, que Dios mantenga a paz en ista casa
y en totz os que i sonDimpués se tornaba a repetir o sinyal d'a cruz con o porrón, decindo
yo te bendizco en o nombre d'o Pai,
d'o Fillo y d'o Espritu Santo. AménY se bebeba un trago de vin. Dimpués se rezaba por os muertos d'a casa, por os pais y os lolos.
Atras bendicions son:
tú por a boca y yo por o garganchón buen tizón, buena casa, buena brasa
que dios conserve a os amos d'esta casa (Cortiellas)Cristo bautizó a San Juan Yo te bautizo a ti toza en el día de Navidad
(Lanaja, an se baptiza a tronca con anís).
buena brasa Y Dios conserve
buen amo en esta casa (A Fueba)buena casa, buena brasa Dios mantenga a l'amo
y a la duenya d'esta casa(y fendo o sinyal d'a cruz con o porrón)
En Escalona, o más viello u l'amo d'a casa, encendeba o tizón y deciba o sermón:
Tú yes o tronco d'a casa
por ixo yo bendizco
con vin esta troncada
En nombre de Dios y o nino
que baixa ta la tierra
ta que ta ista casa traigas
a felicidat más plena
O primer trallo ta Tú,
porque Tú tot lo navegas
O segundo por nusatros
que nos des salut a espuertas
O tercero ta que nieve
y se críen as cosechas
O quarto ta que as arreses
no se disgracien ni mueran
Y o quinto ta que a Paz
nos espante toda guerra.Fer cagar a tronca
En a zona oriental (encluyindo-ie o Semontano, a Cinca Meya y mesmo bell lugar d'o Baixo Aragón) a tronca gosa tener, de conchunta con o sentiu ritual de bendición d'a tronca, un sentiu ludico que no amaneix tanto en a parte occidental. Asinas, s'ha de trigar una tronca que tienga bells foricons ta ficar-ie lamins, galletas, nueces, pinyons, guirlaches, mandarinas, figos, monedas, chuguetz, y asinas asinas.[1]
En bell momento d'a nueit, os pais ninvían a os fillos t'atra cambra (por eixemplo, con a enchaquia de ir a mullar as estenazas) ta que no veigan como se replena a tronca. Dimpués se lis grita y se les diz que ya pueden fer cagar a tronca, pegando-les firmes trucazos, que s'acompanyan de bellas frases, ditos u bendicions, fendo asinas que amaneixcan os presents ta os más chicotz. Dimpués, a tronca prencipia a cremar-se.
Beluns d'os ditos que se dicen son:
caga turrons
y pixa vi blanc (Soperún)picha vino blanc y caga turrón
de mazapán (Estadilla)En Veri, se chita dimpués un chorro de vin d'o porrón, y fendo o sinyal d'a cruz, se diz
Recuperación d'o costumbre
En os zaguers anyos a tradición de bendecir a tronca, y más que más, a de fer cagar a tronca como forma de dar as estrenas de Nadal a os ninos s'está recuperando fito fito, mesmo en as ciudatz, gracias a la faina divulgadera que fan bellas asociacions culturals como Ligallo de Fablans de l'Aragonés.
Referencias
- 2. BB. AA. La Navidad en Aragón. Colección CAI 100 (Nº 9), Edita CAI, Zaragoza, 1998.
- 3. Moreno Rodríguez, Pilar. La Navidad en el Alto Aragón. en Revista de Ciencias Sociales del Instituto de Estudios Altoaragoneses, ISSN 0518-4088, Nº 90, 1980 , pags. 407-424.
Vinclos externos
- A tronca de Nadal en fablans.org
- Articlo sobre a Tronca, de Pedro Arnal Cavero, publicau en primeras en o Heraldo d'Aragón y dimpuesas replegau en o libro Aragón de las Tierras Altas publicau en 1955.
- A tronca de Navidat en infoaragon.com
- Rituals de fuego y tronca de Nadal en aragonesasi.com
- Costumbres pirenaicos relacionaus con a tronca
- A toza de Navidat en Sobrepuerto