Trifolium

*Trifolium*
Follamen de Trifolium repens
Denominacions populars
tefla / teflla, teflo, trefla, trefolio / trefollo, trifolio, entrépol
Clasificación cientifica
Dominio:	Eukaryota
Reino:	Plantae
División:	Magnoliophyta
Clase:	Magnoliopsida
Subclase:	Rosidae
Orden:	Fabales
Familia:	Fabaceae
Subfamilia:	Faboideae
Tribu:	Trifolieae
Chenero:	Trifolium
Descripción
*Trifolium* L., 1753
Distribución cheografica
Distribución de Trifolium.

As teflas^[1]^{[nota 1]} u treflas^[1] (d'o latín vulgar < *trifŭla; nombre cientifico Trifolium) son un chenero de plantas fabacias de port herbacio caracterizadas por que no tienen tallos aerio y por as suyas fuellas composadas con 3 foliolos. Tamién se conoixen como trefolios^[1]^{[nota 2]} u entrépols^[1].

Se'n troba especies en as latituz subtropicals y temperadas d'Eurasia y America, y en a francha costera d'o norte d'Africa. En o continent africano tamién i ha especies propias de climas tropicals. En total, i ha mas de 300 especies descritas en o chenero.

Descripción

Son hierbas baixas, de durada anyal, bianyal u perén de pocos anyos de vida, con fuellas composadas de tres foliolos. Espontaniament en amaneix eixemplars que en pueden tener un numero dispar, con 4, 5 u dica 7 foliolos.

As fuellas creixen en roseta, a ran de tierra, pus a planta no disposa de tallos aerios como muitas atras fabacias, y en muitas especies son fuertement fototacticas, o que significa que varian d'inclinación ta concarar-se o millor que pueden contra la luz, seguntes l'anglo en o que les incida en cada momento d'o día.

Anque no tienen tallos, fan bulbos simples que permiten que as especies bianyals u perens sobrevivan a l'hibierno reducidas a istas estructuras soterranias de resistencia.

As flors son labiadas, d'entre 1 y 5 mm cadaguna, y amaneixen en una inflorescencia en forma d'espiga. A color pende de a especie y, bellas vegadas, tamién de l'eixemplar: en o chenero en global son predominants as flors blancas y rosadas, pero tamién en i ha amariellas, moradas y encara royas.