Tin-Tan

De Biquipedia
(Reendrezau dende Tin Tan)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Esta fuella ye escrita en chistabín.

El Tin-Tan ye una danza tradicional de l'Alto Aragón e mutos puestos d'Occitania (Aquitania, el Bearn, etc.). Ye una danza de diversión populare, que no s'ha puesto relacionare con garra festividat u ocasión relichiosa, e que anque n'el costau espanyol d'es Pireneus la i danzan es adultos, en Francia se considera una baile d'es críos, que la bailan a sobén nomás que ta chugare.

Una d'as caracteristicas mas marcadas d'el tin-tan ye la suya simpleza, que se gosa acompanyare con unas parolas simples e que podese pareixer que no tienen guaire sentido pero que cumplen, seguntes la opinión d'es estudiosos, una función nemotecnica en a introducción d'esta danza:

Tin-tan, tira-me la garra
Tin-tan, tira-me-la tú
Tin-tan, si no me ne tiras
Tin-tan, no seré ta tú

En a danza, que se fa per parellas, es dos miembros d'a parella se posan l'uno cara con l'altro e se cogen las mans con es brazos estendidos ta debant e ta baixo e cruzaus per l'altura d'el codo, e en esta posición que alavez quedan, emprecipian a bailar esplazando-se de costau con saltironez en linia recta primer ta la dreta, e dimpués tornando-ie ta la izquerda. Cuan plegan ta'l puesto a on heban emprencipiau, cambean el dance per un momento e alzan alternativament las garras p'el canto de las d'el suyo companyero.

En l'Alto Aragón s'ha puesto decumentare el tin-tan, mas que en garra puesto, en as valles de Chistau e La Comuna, a on encara el bailan, anque el coneixen en mutos puestos mas per la comarca de Sobrarbe pero ya no se i baila. Ye una pieza elemental de las danzas tradicionals, e per la suya simpleza ye una d'as millors que primer se fan ensenyare a's que comienzan con es bailes.

Se veiga tamién[editar | modificar o codigo]

Bibliografía[editar | modificar o codigo]

  1. RIAZUELO FANTOVA, Isabel: El Tin-tan, pags. 77 enta 85, adintro de Danzas de Sobrarbe. Sender Edicions + Ayuntamiento de Bielsa, Zaragoza, 2001.