Chinchecle
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
 Esta pachina ye escrita en belsetán.
|
Lo Chinchecle ye una danza relichiosa de carater solemne trobata en a valle de Bielsa (Sobrarbe) que se feba anyalment ta la romería d'agosto enta la ermita d'a virche de Pineta, concedindo con as fiestas de la villa. La danza se feba debant de la ermita, u tamién en a plaza de Bielsa. Actualment fa parte de lo repertorio d'El Corro d'es Bailes de Sant Chuan de Plan (en a vecina valle de Chistau) que la fan como pieza d'exhibición, anque en esta altra valle no ibi ha garra certeca que mai se i hese feta, per la relación que la danza tiene con a ermita belsetana, pos en Bielsa tal como la romería se fa cada vegada menos, la danza ya no se i fa mai.
Estructura, la gaita y lo cante
[editar | modificar o codigo]La pieza se composa de cuatre temas que son prencipals, d'es cuals lo primer yera-i una albada de lo tipico estilo que se i feban enantes en a provincia de Uesca; ixo ye, un cante d'una estrofa con cuatre versos a'l son de la gaita, en seguindo las evolucions de lo instrument con a entonación vocal.
Las gaitas aragonesas tradicionals, como tamién pasaba con as gasconas, teneban una afinación diferent de como fan la mes gran parte d'es instruments mudernos en a musica occidental. Este, d'entre altras cosas, estió lo motivo d'a suya cuasi esaparición en o sieglo XX, perque i "desafinaban" cuan se tocaban en conchunto. Ta cantar-be con eras, per causa d'ixo, caleba experiencia y una tecnica especial que, d'alcuerdo con bels espertos, anque modeficata se trobaría en a base de lo cante muderno en as ixotas aragonesas. Esta tecnica se considera que ye cuasi de tot perduta, sin de guaires interpretes que la faigan bien de tot en aucasión de cantar con gaitas.
Lo cante d'esta albada inicial se feba seguindo es danzants una fila, mientres simplament caminaban, cantaban en coro y a'l son de la dita gaita. Es versos cantatos presentan variacions puntuals, estando-ne es mes representativos, d'alcuerdo con Isabel Riazuelo, es siguients:
L'autora presenta dos versions populars mes en o libro Danzas de Sobrarbe que son igualment solemnes, y una tercera mes humoristica a l'estilo de l'humor d'estes lugars, que ye la que se i trascribe de seguito:
La danza concide en a estructura con altras danzas relichiosas de lo Sobrarbe, como ye la dita "La Rosca" en a valle de Chistau. La diferencia se troba en a postura d'es brazos d'es danzants. Lo ritmo d'a musica fa cuatre temas, estando-ne lo primer lo un que introduce la pieza con a dita albada, ta que mes luego el seguixcan dos temas con brío y movimient, d'estructura ternaria siempre con a musica de la gaita, y rematando-la con un tema binario que fa d'ir que ye lo final.
Cas que se'n fese una baile d'exhibición, diz que esta pieza se sole continar con o Vals de la Gaita, per comenzar éste con o tema final de lo chinchecle.
Una versión d'esta pieza, interpretata per La Orquestina del Fabirol con gaita sobrarbenca, puet sentir-se a lo prencipio d'es videos que composan o conchunto documental de l'Archivo Audiovisual del Aragonés, feto per Fernando Romanos y Fernando Blas estes anyos pasatos.
Se veiga tamién
[editar | modificar o codigo]Bibliografía
[editar | modificar o codigo]- RIAZUELO FANTOVA, Isabel; "El Chinchecle", pags. 63 enta 70, adintro de Danzas de Sobrarbe. Sender Edicions + Ayuntamiento de Bielsa, Zaragoza, 2001.
Vinclos externos
[editar | modificar o codigo]| Control d'autoridaz |
|
|---|
Datos: Q8345386