Tin-Tan

De Biquipedia
Ir a la navegación Ir a la búsqueda
Start hand.svg Esta fuella ye escrita en chistabín.

El Tin-Tan ye una danza tradicional de l'Alto Aragón e mutos puestos d'Occitania (Aquitania, el Bearn, etz.). Ye una danza de diversión populare, que no s'ha puesto relacionare con garra festividat u ocasión relichiosa, e que anque n'el costau espanyol d'es Pireneus la i danzan es adultos, en Francia se considera una baile d'es críos, que la bailan a sobén nomás que ta chugare.

Una d'as caracteristicas más marcadas d'el tin-tan ye la suya simpleza, que se gosa acompanyare con unas parolas simples e que podese pareixer que no tienen guaire sentido pero que cumplen, seguntes la opinión d'es estudiosos, una función nemotecnica en a introducción d'esta danza:

Tin-tan, tira-me la garra
Tin-tan, tira-me-la tú
Tin-tan, si no me ne tiras
Tin-tan, no seré ta tú

En a danza, que se fa per parellas, es dos miembros d'a parella se posan l'uno cara con l'altro e se cogen las mans con es brazos estendidos ta debant e ta baixo e cruzaus per l'altura d'el codo, e en esta posición que alavez quedan, emprecipian a bailar esplazando-se de costau con saltironetz en linia recta primer ta la dreta, e dimpués tornando-ie ta la izquerda. Quan plegan ta'l puesto a on heban emprencipiau, cambean el dance per un momento e alzan alternativament las garras p'el canto de las d'el suyo companyero.

En l'Alto Aragón s'ha puesto decumentare el tin-tan, más que en garra puesto, en as valles de Chistau e La Comuna, a on encara el bailan, anque el coneixen en mutos puestos más per la comarca d'el Sobrarbe pero ya no se i baila. Ye una pieza elemental de las danzas tradicionals, e per la suya simpleza ye una d'as millors que primer se fan ensenyare á's que comienzan con es bailes.

Se veiga tamién[editar | editar código]

Bibliografía[editar | editar código]

  1. RIAZUELO FANTOVA, Isabel: El Tin-tan, pags. 77 enta 85, adintro de Danzas de Sobrarbe. Sender Edicions + Ayuntamiento de Bielsa, Zaragoza, 2001.