Tetra (peix)

Iste articlo trata sobre os peixes tetra. Ta altros usos d'o termino «tetra» se veiga Tetra.

*Tetra*
Un tetra emperador (Nematobrycon palmeri) y cualques tetras neón (Paracheirodon innesi) de fundo. Totas dos, especies sudamericanas.
Clasificación cientifica
Dominio:	Eukaryota
Reino:	Animalia
Subreino:	Vertebrata
Filo:	Chordata
Clase:	Actinopterygii
Orden:	Characiformes
Familias
Familias de peixes tetra: Alestiidae Characidae Lebiasinidae

Tetra ye una denominación popular ta bellas especies de peixes d'augua dolza, de mida chiqueta, orichinarias de latituz tropicals y subtropicals d'o mundo, especialment d'America Central y d'o Sud, anque bi n'ha tamién que dimanan d'altros continents, como lo sud-este asiatico y d'as cuencas d'os grans ríos d'Africa. "Tetra" ye un caso de denominación polifiletica, en a que se i concaben especies de muitos cheneros diferents, y dica de diferents familias zoolochicas, y lo suyo emplego se limita, sobretot, en l'ambito de l'acuaricultura y acuariofilia, en estando un termino que careix totalment de garra valor taxonomica.

Descripción

Os peixes ditos tetra solen compartir cualques carateristicas que son as que fan que os afeccionatos troben consenso en dar-les ixa denominación popular. Tienen o cuerpo comprimito lateralment, con aletas caudal, dorsal y anal unicas, dos aletas ventrals y dos pectorals. A boca la i tienen frontal (a diferencia d'as especies d'a orden Cyprinodontiformes —guppys, mollys, etc. —, tamién populars en acuariofilia, que la i tienen superior) pos capturan l'alimento que flota en l'augua a meya altaria, mostrando-se bien cautelosos por instinto cuan el capturan en a superficie y careixendo d'a tendencia que tienen os Cyprinidae (carpas) ta exforicar en o fundo ta buscar-lo, recullendo-lo a lo mas cuan se troba reposau en bella superficie. Bellas especies, concretament as que perteneixen en a familia Characidae con a sola excepción d'as especies miembros d'o chenero Nematobrycon, a demés tienen una aleta adiposa.

Nombre

D'alcuerdo con bels autors, a denominación "tetra", que ye un radical lexico que en griego significa "cuatre", dimana d'as cuatre aletas unicas que tienen os miembros d'a familia Characidae: caudal, dorsal, anal y adiposa (Characidae ye a familia que mes gran numer d'especies cautivables tiene). Alavez, a denominación s'habría feito posteriorment extensiva a totas as especies que se pareixen tamién d'ista familia concreta de peixes, sin que fuese preciso que perteneixesen en os Characidae u nian que tenesen l'aleta adiposa que ye carateristica d'ixa familia taxonomica.

Imáchens

Os nombres populars, mesos d'entre clavetas (« »), corresponden con os nombres populars como se's sole conoixer en Espanya, por el que se citan castellano.