Nematobrycon palmeri
![]() |
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
Nematobrycon palmeri | ||||||||||||||||||||
![]() Nematobrycon palmeri fembra | ||||||||||||||||||||
| ||||||||||||||||||||
| ||||||||||||||||||||
Nematobrycon palmeri | ||||||||||||||||||||
Eingenmann, 1911 |
Nematobrycon palmeri (Eingenmann, 1911) ye una especie de peix tropical d'augua dulza en a familia Characidae, d'entre 5 y 6,5 cm de lonchitut en os exemplars adultos. Ista especie ye natural d'os ríos Atrato y San Juan, en a cuenca caribenya d'America d'o Sud, en puestos en os que a vechetación i ye densa. En captividat, gosan fuyir d'a luz intensa y en aquarios con densidat de vechetación plantada se fincan per d'entre as plantas a més gran parte d'o día.
En Espanya, se'l comercializa con o nombre popular de «Tetra emperador», per a envistabilidat d'as suyas colors. Presenta una faixa de color negra intensa lonchitudinal per cada costato d'o cuerpo, dende l'operclo dica la coda, prolargando-se-ie alavetz a traviés de l'aleta caudal en a que i gosa marcar una protrusión central, en o sino, que ye pigmentada d'a mesma color e i constituye una continación d'a faixa corporal. O vriente ye de color clareta, sin de guaire peculiaridatz, pero en o dorso, alto de la dita faixa negra, a color ye marrón clareta pero con brilluras metalizadas, iridescents, de color azul clareta u torquesa, que se manifiestan u no d'alcuerdo con l'anglo en el que i faiga incidencia la luz. Ista zaguer caracteristica de color el fa d'entivocar-se a sobén con una altra especie, Inpaichthys kerri, que per ixe motivo recibe o nombre popular de «falso tetra emperador».
As semellanzas d'entre N. palmeri y Inpaichthys kerri son numbrosas, y cal que se las saba destinguir ta no entivocar-las. Tan ye lo problema que no se fa mica raro de trobar as dos especies chuntas en os comercios, a la venta como si totz fuesen "verdaders" tetras emperador. Una buena observación que se puede fer (sobretot quan es que s'ofreixen no son animals de tot adultos) ye de parar cuenta con l'aleta adiposa, que ye l'aleta chicorrona que muitas especies de Characidae tienen alto en a coda, d'entre l'aleta dorsal y la caudal. Ixa aleta, en a comparanza d'entre istas dos especies, no se troba si que en Inpaichthys kerri y ye ausent en Nematobrycon palmeri. En N. palmeri, a demés, o uello tiene una caracteristica color azul u torquesa, que no se troba en Inpaichthys kerri. En exemplars adultos, Nematobrycon palmeri manifiesta una forma ostentosament más robusta que no Inpaichthys kerri.
O tetra emperador vive bien a temperaturas d'augua d'entre 22 y 26 °C, con un Ph d'entre 6,5 y 7,2 puntos (neutras u muit leverament acidas), y una dureza Gh d'entre 4 y 10º. Tienen habitos muit tranquilos, per el que no se fa guaire recomendable de mantener-los en aquarios en os que i haigan de convivir con especies más niervudas u que es encorran. En captividat se gosa reproducir con freqüencia quan se les i proporcionan as condicions correctas.
Imáchens[editar | modificar o codigo]
Se veiga tamién[editar | modificar o codigo]
Vinclos externos[editar | modificar o codigo]
Wikispecies tiene un articlo sobre Nematobrycon palmeri.
Se veigan as imachens de Commons sobre Nematobrycon palmeri.