Silvestre Tornasol

De Biquipedia
Ir a la navegación Ir a la búsqueda
Silvestre Tornasol
Profesor Tornasol
Profesor Tornasol
Información personal
Ocupación: Scientifico
Personache de cómic
Cómic: As aventuras de Tintín
Debuixant: Hergé
Anyo: 1944

O Profesor Silvestre Tornasol (en francés Professeur Tryphon Tournesol[1]) ye un personache d'a serie de cómic As aventuras de Tintín, talment o quarto en importancia dimpués de Tintín, Milú y o Capitán Haddock, caracterizau por estar un inventor excentrico y practicament xordo.

A suya imachen fisica s'inspira en la d'o profesor y inventor Auguste Piccard, un amigo de Hergé.[2]

Historia[editar | editar código]

O inventor suizo Auguste Piccard sirvió d'inspiración a Hergé pa la creyación d'o profesor Tornasol.

O recurso d'o sabio un poco excentrico y embabiecau ya teneba antecendents en As aventuras de Tintín: por eixemplo, Filemón Ciclón, o echiptologo de Les Cigares du pharaon, u o especialista en numismatica y filatelia que apareixe en Le sceptre d'Ottokar, Néstor Halambique. Hergé presentó a Tornasol en Le Trésor de Rackham le Rouge como un scientifico xordo que ofreixe a os expedicionarios un submarino con forma de tiburón. O recurso d'a xordera propiciaba as situacions comicas.

A la fin d'iste álbum, ye Tornasol qui, con os diners ganaus d'a venda d'o submarino a o gubierno, merca o castiello de Moulinsart pa o capitán Haddock, en compensación por haber-le deixau prebar o submarino en la expedición a l'Unicornio.

Os rols que cumple en as historias son d'os mas variaus, indo dende distraito encetador de bells gags por meyo d'a xordera u as suyas excentricidatz, a estar qui resuelve bell problema scientificament u a elaborar un dispositivo que tendrá bella utilidat en a trama. Muitas vegadas l'aventura chira arredol d'ell: tanto en Les 7 boules de cristal y a suya continación Le Temple du Soleil, como dimpués en L'Affaire Tournesol, a on ye raptau y a resta de personaches han de salir a o suyo rescate. En Objectif Lune y a suya continación On a marché sur la Lune desembolica a tecnolochía que permite fer o viache a la Luna. Istos dos volumens constituyen mas bien una excepción respecto a o personache de Tornasol y como tracta a la sciencia en cheneral. Pues diz que a suya especialidat ye l'astronautica, treballa en instalacions d'alta tecnolochía rodiado por un numeroso equipo de scientificos y se mete audifonos pa sentir, por lo que as confusions tipicas d'a suya xordera no i apareixen y a suya actividad como scientifico se pareixe mas a como se desembolica l'actividat scientifica en cheneral. Son caracteristicos d'o Profesor Tornasol portar un pendulo y practicar a radiestesia.

En a resta d'historietas treballa en solitario y reyaliza actividatz en quantos campos. En Le Trésor de Rackham le Rouge ye un inventor d'excentricos aparatos, a mayoría d'escasa utilidat: en Tintin au Pays de l'Or Noir descubre o component con que se sabotea a benzina, a forma d'anular-lo y una cura pa os curiosos mals que paten Asín y Azín; en L'Affaire Tournesol inventa una poderosa arma a base d'ultrasonidos; en Coke en stock ye desembolicando uns patins motorizaus; en As choyas d'a Castafiore investiga as posibilidatz d'a televisión a color; y en Tintin et les Picaros un tractamiento contra l'alcoholismo. Como se puet veyer, dengún scientifico podría abracar o estudio sistematico de tantas arias y encara menos lograr tals resultaus treballando nomás solenco.

Referencias[editar | editar código]

  1. (es) "Character Names in French and English", Peeters, 2012
  2. Horeau, Yves The Adventures of Tintin at Sea 1999, traducción en anglés de 2004 d'o National Maritime Museum, publicau por John Maurray, ISBN 0-7195-6119-1. Capítol de personaches externos, dibuixaus en as Aventuras.

Bibliografía[editar | editar código]